शहरातील कचऱ्याच्या समस्येवर मार्ग काढण्यासाठी प्रक्रिया प्रकल्पांच्या विकेंद्रीकरणातून कसबा-विश्रामबागवाडा क्षेत्रीय कार्यालयाच्या परिसरात येत्या आठवड्याभरात पाच आणि तीन टनाचे दोन खतनिर्मिती प्रकल्प कार्यान्वित होणार आहे. या प्रकल्पात दररोज आठ टन ओल्या कचऱ्यावर प्रक्रिया करून चोवीस तासांत खत तयार करण्यात येणार आहे.
कचऱ्याच्या समस्येवर मार्ग काढण्यासाठी प्रभागातील कचरा प्रभागातच जिरविण्याची संकल्पना मांडण्यात आली होती. त्यानुसार, कसबा आणि भवानी पेठ क्षेत्रीय कार्यालयांत तीन ते पाच टनांचे छोटे प्रकल्प उभारण्यास मान्यता देण्यात आली होती. कचऱ्यापासून २४ तासांत खतनिर्मिती करणाऱ्या तीन टनांच्या प्रकल्पाचे काम पालिकेच्या शनिपार येथील झाशीची राणी लक्ष्मीबाई शाळेच्या आवारात सुरू आहे. तर, पाच टनाच्या प्रकल्पाचे काम पालिकेच्या कार्यशाळेत सुरू आहे. या प्रकल्पांसाठी आवश्यक यंत्रणेची उभारणी पूर्ण झाली असून, त्याच्या काही प्राथमिक चाचण्या लवकरच घेण्यात येणार आहेत. हे प्रकल्प पूर्ण क्षमतेने कार्यान्वित होण्यास आणखी १० दिवसांचा कालावधी लागण्याची शक्यता आहे.
शहराच्या मध्यवस्तीत कचरा प्रक्रिया प्रकल्पांसाठी जागा मिळण्यास अडचण येण्याची शक्यता वर्तविली जात असताना, पालिकेच्याच मिळकतींमध्ये हे दोन्ही प्रकल्प उभारण्यात येत आहेत. हे प्रकल्प सुरू झाल्यानंतर विश्रामबागवाडा क्षेत्रीय कार्यालयाअंतर्गत दैनंदिन स्वरूपात सुमारे २० टन कचऱ्यावर प्रक्रिया होऊ शकणार आहे. पेशवे पार्क येथील बायोगॅस प्रकल्पात १० टन कचऱ्यावर प्रक्रिया केली जाते. हे दोन प्रकल्प कार्यान्वित झाल्यावर १८ टन कचऱ्यावर प्रक्रिया होऊ शकेल. आंबिल ओढा कॉलनीत दोनशे किलो कचऱ्यावर प्रक्रिया केली जात असून, पाचशे किलोचा असाच प्रकल्प नारायण पेठेत उभारला जाणार आहे. अत्यंत दाटीवाटीच्या आणि वर्दळीच्या मध्यवस्तीत अशा स्वरूपात छोटे प्रकल्प उभारले जाऊ शकणार असतील, तर त्याच धर्तीवर इतर ठिकाणीही याच प्रकारचे प्रकल्प उभारले जावेत असा आग्रह धरला जात आहे.
छोट्या प्रकल्पांद्वारे विल्हेवाट
शहराच्या १५ क्षेत्रीय कार्यालयांमध्ये सरासरी ८० ते १०० टन कचरा रोज निर्माण होतो. त्यापैकी ओल्या कचऱ्यावर प्रक्रिया करणारे असे छोटे-छोटे प्रकल्प कार्यान्वित होऊ शकले, तर कचऱ्याची समस्या कायमस्वरूपी सुटण्यास मदत होऊ शकणार आहे. तीन, पाच टनाच्या प्रकल्पांना खर्चही कमी येत असून, त्याद्वारे क्षेत्रीय कार्यालयातील संपूर्ण ओल्या कचऱ्यावर प्रक्रिया करणे शक्य होणार आहे. कसबा-विश्रामबागवाडा क्षेत्रीय कार्यालयाच्या हद्दीत मंडई परिसरातच हुतात्मा बाबू गेनू वाहनतळ (आर्यन) आणि सतीश मिसाळ वाहनतळ (मिनर्व्हा) या दोन्ही ठिकाणीही प्रत्येकी पाच-पाच टनांचे प्रकल्प उभारण्याच्या दृष्टीने नियोजन सुरू आहे, अशी माहिती प्रभाग समितीचे अध्यक्ष दिलीप काळोखे यांनी दिली.
कसबा-विश्रामबागवाडा क्षेत्रीय कार्यालय
दैनंदिन स्वरूपात निर्माण होणारा कचरा : ९० टन
सुका कचरा : सुमारे ५० टन
ओला कचरा : ३५ ते ४० टन
प्रक्रिया होणारा कचरा : २० टन
मोबाइल अॅप डाउनलोड करा आणि राहा अपडेट
