'औपचारिक उद्घाटनापूर्वीच उड्डाणपूल खुला करण्याचा शिवसेनेचा प्रयत्न म्हणजे निव्वळ राजकीय स्टंट आहे. पालिका निवडणुका जवळ आल्याने आतापासूनच आम्ही 'करून दाखवले' हे जनतेपर्यंत पोहोचविण्याचा हा केविलवाणा प्रयत्न आहे,' अशा शब्दांत माजी उपमुख्यमंत्री अजित पवार यांनी शिवसेनेच्या उड्डाणपूल उद्घाटनाच्या राजकीय नाट्यावर भाष्य केले. स्वारगेट परिसरातील व्होल्गा चौकात (लक्ष्मीनारायण टॉकीज) उभारण्यात आलेल्या देशभक्त केशवराव जेधे उड्डाणपुलाचे उद्घाटन शनिवारी सकाळी पवार यांच्या हस्ते झाले. या उद्घाटनानंतर तातडीने पुढच्या कार्यक्रमाला रवाना झालेल्या पवार यांनी पिंपरीत पत्रकारांशी बोलताना शिवसेना आणि शिवसेनेचे शहरप्रमुख विनायक निम्हण यांच्यावर टीकास्त्र सोडले.
पवार यांच्या हस्ते शनिवारी उड्डाणपुलाचे उद्घाटन झाले असले, तरी गुरुवारी सकाळी निम्हण यांनी प्रतिकात्मक स्वरूपात उद्घाटन केले. त्याचा संदर्भ देत, 'निम्हण नुकतेच पुन्हा सेनेत दाखल झाले आहेत. त्यामुळे, मीच खरा शिवसैनिक आहे, हे दाखविण्यासाठी त्यांची धडपड सुरू आहे. पालिका निवडणुका जवळ आल्याने हा राजकीय स्टंट केला गेला', अशी सूचक टिपण्णी पवार यांनी केली. उड्डाणपुलाच्या उद्घाटनाच्या कार्यक्रमास पालकमंत्री गिरीश बापट, महापौर दत्तात्रय धनकवडे, उपमहापौर आबा बागूल, पालिका आयुक्त कुणाल कुमार, आमदार माधुरी मिसाळ, स्थायी समिती अध्यक्षा अश्विनी कदम, माजी आमदार मोहन जोशी यांच्यासह पालिकेतील विविध राजकीय पक्षांचे गटनेते आणि स्थानिक लोकप्रतिनिधी उपस्थित होते.
मोबाइल अॅप डाउनलोड करा आणि राहा अपडेट