नाराज काँग्रेस कार्यकर्त्यांच्या मनोमिलनासाठी आज बैठक
म. टा. प्रतिनिधी, पिंपरी
पिंपरी-चिंचवड काँग्रेसमधील भांडणे मुंबई दरबारी पोचली असून, त्यावर तोडग्यासाठी प्रदेशाध्यक्ष अशोक चव्हाण यांच्या उपस्थितीत शुक्रवारी (पाच जून) प्रदेश कार्यालयात बैठक आयोजित करण्यात आली आहे. त्यापूर्वी शहरातील दोन्ही गटांच्या शिष्टमंडळाने मुंबई दौरा केला आहे.
काँग्रेसचे प्रभारी शहराध्यक्ष सचिन साठे यांच्या नेतृत्वाखाली नगरसेवक कैलास कदम, सद‍्गुरू कदम, जयश्री गावडे, राजाभाऊ गोलांडे, ज्योती भारती, गौतम आरकडे, संग्राम तावडे आदींनी बुधवारी (तीन जून) प्रदेशाध्यक्ष चव्हाण यांची भेट घेतली. तर, दोन दिवस आधी भाऊसाहेब भोईर आणि विनोद नढे यांनी चव्हाण यांची भेट घेतली आहे. शहर काँग्रेसमधील वाद आणि भोईर, नढे यांच्यावरील निलंबन प्रकरणाची पक्षश्रेष्ठींनी दखल घेतली असून, त्यावर तोडगा काढण्यासाठी शुक्रवारी (पाच जून) दुपारी साडेतीन वाजता मुंबईतील प्रदेश कार्यालयात बैठक आयोजित करण्यात आली आहे.
राष्ट्रवादी काँग्रेसच्या स्थापनेपूर्वी पिंपरी-चिंचवड महापालिकेवर निर्विवाद सत्ता असलेल्या काँग्रेसची आजची अवस्था दयनीय आहे. पक्षाची नौका बुडण्याच्या स्थितीत असताना नवसंजीवनी मिळण्याऐवजी अंतर्गत वादामुळे ती आणखी खोलात जात आहे. त्यामुळे काँग्रेसचे एकनिष्ठ कार्यकर्ते हवालदिल आहेत. शहरात काँग्रेस जिवंत राहिली पाहिजे, या अपेक्षेने ते पक्षश्रेष्ठींच्या संपर्कात आहेत. महापालिकेच्या २०१७ मधील निवडणुका नजरेसमोर ठेवून प्रमुख पक्षांनी संघटना बांधणीवर लक्ष केंद्रीत केले असताना आपण जर भांडत राहिलो तर, काँग्रेसवर प्रेम करणारे दुरावले जातील, अशी भीती हे कार्यकर्ते व्यक्त करीत आहेत. त्यामुळे एकजुटीसाठी पक्षश्रेष्ठींनी पुढाकार घ्यावा, अशी मागणी त्यांनी केली आहे. अंतर्गत वादामुळे पक्षाकडे नवीन कार्यकर्ते आकर्षित होत नाहीत. उलट आझमभाई पानसरे यांच्यासारखे स्थानिक नेते पक्षात येऊन पुन्हा बाहेर जातात. काही जण पक्ष सोडतात. त्यामुळे पक्ष टिकविण्यासाठी नवीन कार्यकर्त्यांची गरज असताना आहे त्या कार्यकर्त्यांवर कारवाई करून पक्ष आणखी कमकुवत करू नये, अशी भूमिका काही कार्यकर्त्यांनी घेतली आहे.
वाद नको, संवाद हवा
महापालिकेच्या निवडणुका दीड वर्षांनी होणार आहेत. त्यासाठी राष्ट्रवादी काँग्रेस, भारतीय जनता पक्ष, शिवसेनेने मोर्चेबांधणीला सुरुवात केली आहे. एकमेकांचे कार्यकर्ते खेचण्याचा प्रयत्न होत आहेत. ही बाब काँग्रेससाठी धोक्याचा इशारा आहे. त्यामुळे कार्यकर्त्यांवर निलंबनाची कारवाई करण्याऐवजी पक्षात एकजूट राखणे महत्त्वाचे आहे. सर्वांना सोबत घेऊनच निवडणुकीला सामोरे जाणे फायदेशीर ठरणार आहे, असा सूर काहींनी व्यक्त केला. त्याची दखल घेत शहरातील दोन गटांमधील मनोमिलनासाठी माजी आमदार रमेश बागवे यांची समन्वयक म्हणून निवड केल्याचे सूत्रांनी सांगितले.
शहराध्यक्ष निवडीचे वारे
शहराध्यक्ष साठे यांच्याकडे प्रभारी पद आहे. संघटनात्मक निवडणुकीच्या नंतरच अध्यक्षपद कायम होते. त्यावर डोळा ठेवून साठे यांनी मुंबई दौऱ्यात शक्तिप्रदर्शनाचा प्रयत्न केला. मात्र, पक्षाच्या ऑल इंडिया लिस्टमध्ये शहराध्यक्ष म्हणून भोईर यांचेच नाव आहे. त्यामुळे संघटनात्मक निवडणुकीसाठी साठे यांच्यासह हनुमंत भोसले, अशोक मोरे, मनोज कांबळे, कैलास कदम, संदेश नवले यांची नावे चर्चेत आहेत. त्यामुळे पक्षांतर्गत निवडणुकीबाबतही बैठकीत चर्चा होण्याची शक्यता आहे. त्यामुळे पक्षांतर्गत निवडणुकीत कोण बाजी मारणार या गोष्टीची चर्चा कार्यकर्त्यांमध्ये सुरू आहे. वैयक्तिक हेवेदावे बाजूला सारून निवड केली जाणार का, हा प्रश्नही उपस्थित करण्यात येत आहे.
मोबाइल अॅप डाउनलोड करा आणि राहा अपडेट
