म. टा. प्रतिनिधी, पुणे
पुणे महानगर प्रादेशिक विकास प्राधिकरणाच्या (पीएमआरडीए) स्थापनेपूर्वी तत्त्वत: मंजूर झालेले बांधकाम नकाशे व बिगरशेती (एनए) परवानगीच्या फाइल्सला जिल्हाधिकाऱ्यांमार्फतच अंतिम मंजुरी देण्यास नगर विकास विभागाने हिरवा कंदिल दाखविला आहे. त्यामुळे 'पीएमआरडीए' व जिल्हाधिकारी कार्यालयाच्या 'प्रवासा'त अडकलेल्या शेकडो फाइल्सच्या मंजुरीचा अडथळा दूर झाला आहे.
'पीएमआरडीए'ची ३१ मार्च रोजी स्थापना करण्याचा निर्णय राज्य सरकारने घेतला आहे. त्यासंबंधीचा अध्यादेश जारी झाल्यानंतर 'पीएमआरडीए'च्या कार्यक्षेत्रातील इमारत बांधकाम नकाशे मंजूर करण्याचे जिल्हाधिकाऱ्यांचे अधिकार रद्द झाले. मात्र, 'पीएमआरडीए'ची स्थापना होण्यापूर्वी शेकडो फाइल्स जिल्हाधिकाऱ्याकडे मंजुरीसाठी दाखल झाल्या होत्या. त्यातील काही फाइल्सचे नकाशे मंजूर होऊन 'एनए'ची परवानगी राहिली होती, तर अनेक फाइल्सची टिपणे मंजूर होऊन त्या मंजुरीच्या प्रतीक्षेत होत्या. काही फाइल्समध्ये एनए चलन भरणे बाकी राहिले होते.
मंजुरीच्या अर्धवट स्थितीमधील फाइल्स 'पीएमआरडीए'कडे अंतिम मंजुरीसाठी पाठविण्याची प्रक्रिया सुरू झाली होती. जिल्हाधिकारी कार्यालयातून सुमारे ३९९ फाइल्स, तसेच मावळ प्रांत कार्यालयातून १६४, हवेली प्रांत कार्यालयातून ९६, खेडमधून ४२, पुणे शहर प्रांत कार्यालयातून ४१ व भोरमधून २६ फाइल्स 'पीएमआरडीए'कडे पाठविण्यात आल्या. या फाइल्स पाठवून जवळपास वीस दिवस झाले तरी त्यावर कोणताही निर्णय 'पीएमआरडीए'कडून झाला नाही. 'पीएमआरडीए'कडे कार्यालयच नसल्याने आणखी काही महिने या फाइल्सला मंजुरीसाठी थांबावे लागणार होते. त्यासंदर्भात ओरड सुरू झाल्याने जिल्हाधिकारी कार्यालयातून नगर विकास विभागाशी बोलणे सुरू होते. त्यासंदर्भात नगर विकास विभागाने ३१ मार्च पूर्वी मंजूर झालेल्या फाइल्सवर जिल्हाधिकारी कार्यालयानेच अंतिम मान्यता द्यावी, ३१ मार्चपूर्वी टिपण मंजूर असेलल्या फाइल्सची एनए परवानगी जिल्हाधिकाऱ्यांनी द्यावी आणि बांधकाम परवानगी मात्र 'पीएमआरडीए'कडून घ्यावी असे स्पष्ट करण्यात आले आहे.
जिल्हाधिकाऱ्यांनी ३१ मार्च पूर्वी बांधकाम नकाशे व एनए च्या फाइल मंजूर केल्यावर अहवाल सरकारला पाठवावा आणि कार्योत्तर मंजुरी घ्यावी, असेही स्पष्ट करण्यात आले.
कार्यालयाचे आज आकुर्डीत उद्घाटन
आकुर्डी येथील पिंपरी-चिंचवड नवनगर विकास प्राधिकरणामध्ये 'पीएमआरडीए'च्या कार्यालयाचे आज, एक मे रोजी उद्घाटन होणार आहे. जिल्ह्याचे पालकमंत्री गिरीश बापट या वेळी प्रमुख पाहुणे म्हणून उपस्थित राहणार आहेत.
प्रलंबित फाइल्सची विभागवार संख्या
कार्यालय : प्रलंबित फाइल्स
जिल्हाधिकारी कार्यालय : ३९९
मावळ प्रांत कार्यालय : १६४
हवेली प्रांत कार्यालय : ९६
खेड : ४२
पुणे शहर प्रांत कार्यालय : ४१
भोर : २६
मोबाइल अॅप डाउनलोड करा आणि राहा अपडेट
