म. टा. प्रतिनिधी, पुणे
संशयी वृत्तीतून प्रेयसीवर वार करून तिचा निर्घृण खून केल्याप्रकरणी प्रियकराला जन्मठेप आणि पाच हजार रुपये दंडाची शिक्षा सुनावण्यात आली आहे. विशेष न्यायाधीश मंगला धोटे यांच्या कोर्टाने हा निकाल दिला. विजयकुमार दुधाळ (२४, रा. पिंपरी, सोलापूर) याला शिक्षा सुनावण्यात आली आहे. नीलम यदगिरी (२३, रा. जिद्द अपार्टमेंट, दत्तनगर, दिघी) या तरुणीचा खून करण्यात आला होता. या प्रकरणी समोद मुन्नालाल जादोन (३१, रा. दिघी) यांनी विश्रांतवाडी पोलिस स्टेशनमध्ये फिर्याद दाखल केली होती. या केसमध्ये सरकारी वकील हिरा बारी यांनी १३ साक्षीदार तपासले.
नीलमचे शिक्षण एमबीएपर्यंत झाले होते. आरोपी तळेगाव दाभाडे येथील डी. वाय पाटील कॉलेजमध्ये एमसीएचे शिक्षण घेत होता. नीलमचे आणि विजयचे मैत्रीतून प्रेमसंबध जुळले होते. तिला कल्याणीनगर येथील एका कंपनीत काम मिळाले होते. तिची पुण्यात राहण्याची व्यवस्था नव्हती. फिर्यादी समोद आणि विजय ओळखीचे असल्याने समोदने तिला भाड्याने रूम मिळवून दिली होती.
विजय लग्नासाठी तिच्यावर वारंवार दबाव आणत होता. ती शिक्षण पूर्ण झाल्यावर लग्न करू असे सांगत असे. नीलमची आई देखील त्याला शिक्षण पूर्ण झाल्यावर लग्न करून देऊ असे सांगत होती. मात्र, तो ऐकण्यास तयार नव्हता. त्याने गावाला जाऊन आत्महत्या करण्याचाही प्रयत्न केला होता. त्यानंतर त्याच्या गावाला जाऊन नीलमने व तिच्या आईने त्याला समजावून सांगितले होते. तरीही तो लग्न करण्यासाठी आग्रह धरून राहिला होता.
घटनेच्या पूर्वी तिची रूम पार्टनर बाहेर गेली असताना नीलम समोदच्या कुटुंबीयांसोबत राहिली होती. ही गोष्ट विजयला समजल्याने तो तिला वारंवार फोन करत होता. त्यामुळे तिने समोदला सकाळी लवकर रूमवर सोडण्यास सांगितले होते. समोदने तिला आठ ऑगस्ट २०११ रोजी सकाळी साडेनऊ वाजता सोडले. त्यानंतर विजयकुमार याने रूममध्ये जाऊन तिच्यावर चाकूने सपासप वार केले आणि तिला जखमी अवस्थेत तिथे टाकून तो पळून गेला. शेजारच्यांच्या घरात थांबलेल्या समोदने नीलमला उपचारासाठी हॉस्पिटलमध्ये दाखल केले. उपचारापूर्वीच तिचा मृत्यू झाला. घटनास्थळी आरोपी विजयचा फोटो पडला होता. विजयला पळून जाताना पाहणाऱ्या शेजाऱ्यांनीही त्याला ओळखले. त्याला अटक करण्यात आली, तेव्हा त्याच्या हाताला चाकूमुळे जखम झाली होती. बचावपक्षाने खून समोदनेच केल्याचा बचाव केला होता.
चोराला अटक
पुणे : रात्रीच्या वेळी रेल्वेमध्ये प्रवाशांच्या झोपेचा फायदा घेऊन चोऱ्या करणाऱ्या सराईत चोराला रेल्वे पोलिसांनी सापळा रचून अटक केली आहे. या प्रकरणी सचिन भिकाजी मुंडेकर (वय २८ रा. पावनळ, ता. दापोली) याला अटक करण्यात आली आहे.
आरोपीकडे अधिक तपास केला असता पुणे, लोणावळा रेल्वे स्टेशन येथे येऊन रात्रीच्या वेळी प्रवाशांच्या झोपेचा फायदा घेऊन तो बॅगा, पर्स, मोबाइल चोरत असल्याचे निष्पन्न झाले. त्याच्याकडून तीन गुन्हे उघडकीस आणण्यात आले. यात ७० हजार २०० रुपये किंमतीचा माल जप्त करण्यात आला आहे. रेल्वेचे पोलिस अधीक्षक विश्व पानसरे यांच्या मार्गदर्शनाखाली स्थानिक गुन्हे अन्वेषण शाखेचे पोलिस निरीक्षक अरुण मोरे, पोलिस उपनिरीक्षक नाना मापारी, उमेश बागली, धनंजय दुगाने, अमरदीप साळुंके, महेश कर्डीले, दत्तात्रय मोरे, अजय पारधी, तुषार गेंगजे, जगदीश सावंत यांच्या पथकाने ही कारवाई केली.
कामगाराच्या मृत्यूप्रकरणी तिघांवर गुन्हा दाखल
पुणे : सीसीटीव्ही बसविण्याचे काम सुरू असताना कामगाराचा तोल जाऊन मृत्यू झाला. या प्रकरणी चतुःश्रृंगी पोलिसांनी तिघांवर गुन्हा दाखल केला आहे. द आर्किड स्कूलच्या मुख्यप्रवेशद्वाराच्या बाजूच्या दोन नंबर गेटलगत पोलवर सीसीटीव्ही लावत असताना हा प्रकार घडला. १२ सप्टेंबर २०१४ रोजी ही घटना घडली. यात गणेश शंकर भंडारकवठे (२४, रा. पानमळा सिंहगड रोड) याचा मृत्यू झाला.
सीसीटीव्ही बसविण्याचे काम करत असताना कामगारांना सुरक्षेसाठी योग्य ती साधने न देता हलगर्जीपणा केल्याप्रकरणी निखील दरोडे (३०, रा. बाणेर), संपत आंबरे (३३, रा. फुरसुंगी, हडपसर), राहुल बागरेचा (४०, रा. बिबवेवाडी) या तिघांवर गुन्हा दाखल करण्यात आला आहे.
कर्जाच्या बहाण्याने फसवणूक
पिंपरीः गृहकर्ज देण्याच्या बहाण्याने विविध कारणांसाठी पैसे घेऊन सुमारे तीन लाखांचा गंडा घातल्याचा प्रकार नुकताच उघडकीस आला. श्रीराम फायनान्स कंपनीच्या नावावर ही फसवणूक करण्यात आली असून, कालिंदी मिश्रा (वय ४०, रा. पिंपरी) यांनी पिंपरी पोलिसांमध्ये फिर्याद दिली आहे.
श्रीराम फायनान्सचे साक्षी जैन, राहुल व आकांक्षा (पूर्ण नाव, पत्ता माहीत नाही.) यांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, साक्षी, राहुल आणि आकांक्षा या तिघांनी श्रीराम फायनान्सकडून मिश्रा यांना २० लाख रुपयांचे कर्ज मिळवून देण्याची हमी दिली. त्यासाठी मिश्रा यांच्याकडून आवश्यक कागदपत्रे घेऊन टाटा व्हॅल्यू कंपनीच्या नावे चेकद्वारे पैसे भरण्यास सांगितले. या तीन भामट्यांनी अशाप्रकारे एकूण तीन लाख २५ हजार रुपये स्वीकारले. सर्व कागदपत्रांची पूर्तता केल्यानंतर गृहकर्ज न मिळाल्यामुळे मिश्रा यांनी श्रीराम फायनान्सच्या वरील तिघांकडे पैसे परत मागितले. मात्र, पैसे देण्यास यांनी टाळाटाळ केली. त्यावेळी आपली फसवणूक झाल्य़ाचे मिश्रा यांच्या लक्षात आले.
पोलिसांना शिवीगाळ; तरुण अटकेत
पुणे : बिबवेवाडी परिसरात पेट्रोलिंग करत असलेल्या पोलिस उपनिरीक्षकाला आणि त्याच्या सहकाऱ्यांना शिवीगाळ करून, तसेच कोयता घेऊन त्यांच्या अंगावर धावून गेल्याप्रकरणी तरुणाला पोलिसांनी अटक केली. सरकारी कामात अडथळा आणल्याप्रकरणी विनोद बाळू गायकवाड (२५. रा. पद्मावतीनगर, बिबवेवाडी) असे अटक केलेल्याचे नाव आहे. या प्रकरणी बिबवेवाडी पोलिस स्टेशनचे पोलिस उपनिरीक्षक डी. सपकाळे यांनी फिर्याद दाखल केली आहे.
मोबाइल अॅप डाउनलोड करा आणि राहा अपडेट
