टीम मटा, पुणे
सार्वजनिक पायाभूत सुविधांच्या समस्यांमधून पुणेकरांची काही केल्या सुटका होण्याची चिन्हे नाहीत. रस्तोरस्ती केलेली खोदाई, त्यावरून आरोप-प्रत्यारोपांची मालिका, एका पावसातच सुविधांची त्रेधा अशा अक्षय्य समस्यांचा गेल्याच आठवड्यात सामना केल्यानंतर आता वीज-पाण्यापासून सार्वजनिक वाहतूकव्यवस्थेच्या बंदचा फटका सोसावा लागतो आहे.
पूर्व भागांत उद्या पाणी बंद
येत्या शुक्रवारी (१ मे) शहराच्या पूर्व भागांतील वीजपुरवठा दुरुस्तीच्या कामासाठी बंद राहणार असल्याने लष्कर जलकेंद्रामार्फत होणारा पाणीपुरवठा बंद राहणार आहे. तसेच, शनिवारी (२ मे) उशिरा व कमी दाबाने पाणीपुरवठा होईल, असे पालिकेच्या पाणीपुरवठा विभागातर्फे कळविण्यात आले आहे.
पाणीपुरवठा बंद राहणारा भाग पुढीलप्रमाणेः पुणे कॅम्प, डिफेन्स एरिया, कमांड हॉस्पिटल, जीई साऊथ, जाई नॉर्थ, सॅलिसबरी पार्क, घोरपडी, पुणे स्टेशन, ससून हॉस्पिटल, मंगळवार पेठ, पुणे-मुंबई रस्ता, शासकीय दूध डेअरी, न. ता. वाडी, पाटील इस्टेट, शिवाजीनगर परिसर, हडपसर, काळेपडळ, महंमदवाडी, केशवनगर, संपूर्ण वानवडी गाव, संपूर्ण कोंढवा, कोरेगाव पार्क, बोट क्लब रोड, खराडी, वडगावशेरी, महाराष्ट्र हौसिंग बोर्ड, नागपूर चाळ, येरवडा जेलरोड, संगमवाडी गावठाण.
बाजारातही उद्या शुकशुकाट
महाराष्ट्र दिन व कामगार दिनानिमित्ताने मार्केट यार्डातील प्रादेशिक बाजार समितीच्या गूळ भुसार, बाजार, फळे, भाजीपाल बाजार तसेच केळी बाजार व पान बाजार बंद राहणार आहे. त्याशिवाय वजनकाटा विभाग, खडकी उपबाजारही बंद राहणार आहे. त्यामुळे शेतकऱ्यांनीशेतीमाल विक्रीसाठी आणू नये असे आवाहन बाजार समिती प्रशासनाने गेले आहे. दोन मे रोजी शनिवारी साप्ताहिक सुट्टी असल्याने बाजार सलग दोन एक व दोन मे रोजी बंद राहणार आहे, असे समितीने कळविले आहे.
इंटकचाही बंदला पाठिंबा
'प्रस्तावित कायद्याला आमचा विरोध आहे. त्यामुळे गुरुवारी होणाऱ्या वाहतूक बंदला आमचा पाठिंबा असेल; पण पुणेकरांची गैरसोय होऊ नये म्हणून काम बंद ठेवले जाणार नाही,' असे 'इंटक'चे पुणे शहर अध्यक्ष राजेंद्र खराडे यांनी सांगितले.
एसटी व 'पीएमपी'ने प्रवास करणाऱ्यांची संख्या जास्त आहे. त्यामुळे या कामगार संघटना बंदमध्ये उतरल्यास सामान्यांना नाहक त्रास सहन करावा लागेल. या दोन्ही आस्थापनांच्या एकाही संघटनेने अद्याप बंदमध्ये सहभागी होणार असल्याचे अधिकृतपणे कळवले नसल्याचे संबंधित अधिकाऱ्यांनी स्पष्ट केले. त्यामुळे कोणी बंदमध्ये सहभागी झाल्यास त्यांच्यावर कायदेशीर कारवाई करण्यात येईल, अशी तंबी अधिकाऱ्यांनी दिली.
मुंबईत काळ्या-पिवळ्या टॅक्सी, तसेच एसटीमधील बहुतांश सर्वच संघटनांनी आंदोलनापासून दूर राहण्याचे धोरण स्वीकारल्याने आंदोलनाच्या यशस्वfतेबाबत शंका व्यक्त होत आहे. आंदोलनात उपनगरीय लोकल सेवा समाविष्ट नसल्याने मुंबईचे जनजीवन सुरू राहणार आहे.
मुंढवा, हडपसरला वीज बंद
महापारेषण कंपनीच्या वतीने फुरसुंगी उपकेंद्र ते मुंढवा उपकेंद्राची १३२ केव्ही क्षमतेची सिंगल सर्किट वाहिनी (टॉवर लाइन) मगरपट्टा उपकेंद्रातून डबल सर्किटमध्ये रूपांतरित करण्यात येणार आहे. हे काम सुरू असताना उद्या (शुक्रवारी) मुंढवा, हडपसर या परिसरातील वीजपुरवठा सकाळी सात ते सायंकाळी सात या वेळात बंद ठेवण्यात येणार आहे.
महापारेषणच्या फुरसुंगी उपकेंद्गातून निघणारी १३२ केव्ही मुंढवा वाहिनी ही सिंगल सर्किट असल्याने अनेकदा तांत्रिक बिघाडामुळे वीजपुरवठा खंडित होतो. पर्यायी वीजपुरवठ्याची सोय उपलब्ध करून देता येत नाही. त्यामुळे ही वाहिनी आता डबल सर्किटमध्ये रूपांतरित करून ती मगरपट्टा २२०/१३२ केव्ही उपकेंद्रातून उभारण्याचा निर्णय घेण्यात आला आहे. त्यासाठी मगरपट्टा उपकेंद्रात १०० एमव्हीए क्षमतेचे दोन ट्रान्स्फॉर्मर उभारण्यात आले आहेत. नव्या मुंढवा डबल सर्किट वाहिनीमुळे सुरळीत वीजपुरवठा आणि पर्यायी वीजपुरवठ्याची सोय उपलब्ध होणार आहे.
या कामामुळे शिर्केरोड, कुमार पॅरॅडाईज, कस्तुरी सेंटर, कीर्तनेबाग, मगरपट्टा-मुंढवा रोड, साडेसतरानळी, तुपेनगर, केशवनगर, मुंढवा गाव, कोरेगाव पार्क रोड, हडपसर रेल्वेस्थानक परिसर, बीटी कवडे रोड, भीमनगर, भारत फोर्ज कंपनी परिसर, पिंगळे वस्ती, नोबेल हॉस्पीटल, मेगासेंटर, कोरेगाव पार्क परिसर, साधू वासवानी रोड, आगरकरनगर, न्युक्लिअस मॉल, एसजीएस मॉल, क्लोव्हर सेंटर, सर्किट हाउस, गुरुद्वारा, एमजी रोड आदी परिसरात सकाळी सात ते सायंकाळी सात वाजेपर्यंत वीजपुरवठा बंद राहणार आहे, असे महापारेषण व 'महावितरण'च्या वतीने कळविण्यात आले आहे.
मोबाइल अॅप डाउनलोड करा आणि राहा अपडेट
