म. टा. प्रतिनिधी, पुणे
लोकसभा आणि विधानसभेच्या निवडणुकीत एकतर्फी यश मिळविणाऱ्या भारतीय जनता पक्षाची डाळ सहकार क्षेत्रात मात्र शिजू शकलेली नाही. जिल्हा बँकेच्या निवडणुकीत माजी उपमुख्यमंत्री अजित पवार यांनी मंगळवारी सर्वपक्षीय नेत्यांची मोट बांधली. त्यामुळे नियोजित पॅनेलमधील संभाव्य तगड्या उमेदवारांनीच माघार घेतल्याने भाजपच्या कथित आव्हानातील हवा निघून गेल्याचे बोलले जात आहे.
संपूर्ण जिल्ह्याचे लक्ष लागून राहिलेल्या जिल्हा बँकेच्या निवडणुकीत माघार घेण्याची मुदत मंगळवारी समाप्त झाली. या काळात पक्ष-गट बाजूला ठेवून प्रचंड तडजोडींचे राजकारण रंगले. राष्ट्रवादीतील असंतुष्ट मंडळींना सोबत घेऊन या निवडणुकीत आव्हान उभे करण्याची तयारी भाजपकडून करण्यात येत होती. परंतु, पवार यांनी काँग्रेससह राष्ट्रीय समाज पक्ष आणि भाजपमधील मंडळींशी संधान बांधले आणि अनेक तगड्या उमेदवारांनी निवडणुकीतूनच माघार घेतली. माघार घेणाऱ्यांमध्ये आमदार लक्ष्मण जगताप, राहुल कुल, तसेच अशोक पवार, मंगलदास बांदल, बापू पठारे आदी नेत्यांचा समावेश आहे. त्यामुळे भाजपच्या संभाव्य पॅनेलमध्ये तगडे उमेदवार मिळू शकलेले नाहीत. राष्ट्वादी काँग्रेसने काही ठिकाणी तडजोड; तर काही ठिकाणी मैत्रिपूर्ण लढतींचे धोरण ठेवून आपले पॅनेल जाहीर केले. मात्र, भाजपप्रणित पॅनेल अद्याप जाहीर होऊ शकलेले नाही. या पक्षाचे कार्यकर्ते काही गटांत निवडणुकीच्या रिंगणात आहेत.
माघारीची मुदत समाप्त झाल्यानंतर त्यामुळे जिल्ह्यातील सहा जागा बिनविरोध झाल्या आहेत. त्यामध्ये विधानसभेचे माजी सभापती दिलीप वळसे पाटील, आमदार संग्राम थोपटे, तसेच चंदुकाका जगताप, अप्पा जगदाळे, रमेश थोरात आणि रेवणनाथ दारवटकर यांचा समावेश आहे. दरम्यान, राष्ट्रवादीप्रणित सहकार पॅनेलच्या प्रचारास आज (बुधवारी) तळेगाव दाभाडे येथे प्रारंभ होणार असल्याचे जिल्हाध्यक्ष जालिंदर कामठे आणि बँकेचे अध्यक्ष दिगंबर दुर्गाडे यांनी सांगितले.
प्रमुख लढती
हवेली- प्रकाश म्हस्के - रोहिदास उंदरे, बारामती-अजित पवार - विलास काकडे, मावळ-माऊली दाभाडे - बाळासाहेब नेवाळे, ब गट- दत्तात्रय भरणे -प्रवीण तुपे, क गट- अनिल भोसले -प्रकाश पाचारणे, प्रवीण तुपे, विठ्ठल पवार, अशोक शेलार, ड गट-भालचंद्र जगताप -महादेव सोनावणे, ओबीसी- दिगंबर दुर्गाडे - अप्पासाहेब कड, प्रवीण तुपे, भटक्या विमुक्त जाती-मदन देवकाते-सुरेश जाधव, अनुसूचित जाती- तुकाराम सुपे,तुळशीदास भोईर,मार्तंड शेला, नवनाथ कांबळे, संजय मात्रे, महिला- वर्षा शिवले, हिराबाई खेडकर, अर्चना घारे
मैत्रिपूर्ण लढती
मुळशी- आत्माराम कलाटे-
राजेंद्र हगवणे
शिरूर- निवृत्तीअण्णा गवारी- जयश्री पलांडे, स्वप्निल गायकवाड
जुन्नर- संजय काळे, रघुनाथ लेंडे
खेड- दिलीप मोहिते- हिरामण सातकर, लक्ष्मण टोपे
मोबाइल अॅप डाउनलोड करा आणि राहा अपडेट