मालेगाव बॉम्बस्फोटातील आरोपी मेजर रमेश उपाध्याय यांच्या नावाने येरवडा जेलमध्ये मुंबईतून मोबाइल पाठवण्यात आल्याचे निष्पन्न झाले आहे. येरवडा पोलिस ठाण्यात या प्रकरणी गुन्हा दाखल झाला असून, कुरिअरच्या अनुषंगाने तपासही सुरू करण्यात आला आहे.
उपाध्याय यांना येरवडा जेलमधील अतिसुरक्षा विभागात ठेवण्यात आले आहे. जेलमध्ये त्यांच्या नावाने शुक्रवारी एक पार्सल आले होते. जेलचे अधिकारी हे पार्सल शनिवारी उघडून पाहत असताना एका पुस्तकात मोबाइल लपवल्याचा संशय आला. नागपूर जेलमध्ये मोठ्या प्रमाणात मोबाइल सापडल्याने राज्यभरात खळबळ उडाली आहे. या पार्श्वभूमीवर येरवडा जेलमध्ये मोबाइल पाठवण्याचा प्रकार गंभीरपणे घेण्यात आला आहे.
येरवडा पोलिसांनी पार्सलवर असलेला पत्ता आणि नावानुसार गुन्हा दाखल केला आहे; मात्र हे नाव आणि पत्ता बनावट असल्याचा पोलिसांचा संशय आहे. हे पार्सल आलेल्या पोस्ट ऑफिसमधून चौकशीला सुरुवात केली असल्याची माहिती येरवडा पोलिस ठाण्याचे पोलिस निरीक्षक विलास सोंडे यांनी दिली. हे पार्सल कोणत्या व्यक्तीने पाठवले, तसेच ते पाठवण्याचा उद्देश काय असावा, याचा शोध घेण्यात येत आहे .
येरवडा जेल प्रशासनाच्या सतर्कतेमुळे पार्सलमधील पुस्तकाचा पोलिसांना संशय आला होता. त्या पुस्तकाची काही पाने फाटलेली असल्याने पुस्तक व्यवस्थित उघडून पाहण्यात आले. त्या वेळी त्यामध्ये एका सिगारेटच्या आकाराच्या केसमध्ये स्मार्टफोन लपवण्यात आल्याचे लक्षात आले होते.
मोबाइल अॅप डाउनलोड करा आणि राहा अपडेट
