पुणे महानगर परिवहन महामंडळाच्या (पीएमपी) ताफ्यातील खासगी ठेकेदारांच्या बस अद्याप 'सुपात' असून, त्याचा फटका पीएमपीला सहन करावा लागत आहे. त्यामुळे, सर्व डेपोंनी लांबच्या पल्ल्यावर जाणाऱ्या मार्गांवर पीएमपीच्या ताफ्यातीलच बस पाठवाव्यात, असे आदेश प्रभारी अध्यक्ष व व्यवस्थापकीय संचालकांनी दिले आहेत.
गेल्या काही दिवसांत पीएमपीचे प्रभारी अध्यक्ष व व्यवस्थापकीय संचालक ओमप्रकाश बकोरिया यांनी निगडीसह कोथरूड, न. ता. वाडी आणि कात्रज या डेपोंना भेट दिली. त्यावेळी, काही ठिकाणी पीएमपीच्या ताफ्यातील बसपेक्षा ठेकेदारांच्या बसचा सरासरी प्रवास अधिक होत असल्याचे त्यांच्या निदर्शनास आले. खासगी ठेकेदारांच्या बसचा प्रवास सहा हजार किमीपर्यंत मर्यादित ठेवावा, अशा सूचना दिल्या असतानाही काही ठिकाणी नऊ ते दहा हजार किमी प्रवास होत असल्याचे आढळून आले. विशेषतः लांब पल्ल्याच्या अंतरावर खासगी ठेकेदारांच्या बस धावत असून, जवळच्या मार्गांवर पीएमपीच्या बस धावत असल्याचे स्पष्ट झाले. त्याचा वाढीव खर्चाचा बोजा पीएमपीवर पडत असल्याने खासगी ठेकेदारांच्या बसऐवजी पीएमपीच्या ताफ्यातील बस लांब पल्ल्यावर पाठविल्या जाव्या, असे स्पष्ट निर्देश बकोरिया यांनी संबंधित डेपो मॅनेजरना दिले.
लांबा पल्ल्यावर यापुढे पीएमपीच्या बस धावतील, अशा सूचनाही सर्वांना दिल्या असल्याचे ओमप्रकाश बकोरिया यांनी सांगितले. ठेकेदारांच्या बसमुळे पीएमपीचा तोटा होत असल्याचे निरीक्षण तत्कालीन अध्यक्ष व व्यवस्थापकीय संचालक डॉ. श्रीकर परदेशी यांनी मांडले होते. तसेच, त्यावर काही बंधने घालण्यात यावी, असेही सुचविले होते.
मोबाइल अॅप डाउनलोड करा आणि राहा अपडेट