म. टा. प्रतिनिधी, पुणे
'पुढे काय वाढून ठेवले आहे, याचे ज्ञान असेल, तर परदेशी शिकायला जाण्याच्या अनुभवातील गंमत आणखी वाढू शकते,' असे टेस्ट ऑफ इंग्लिश अॅज फॉरेन लँग्वेज या परीक्षेच्या (टोफेल प्रोग्राम) कार्यकारी संचालक जेनिफर ब्राउन यांनी सांगितले.
परदेशात शिक्षणासाठी जाताना या प्रवासाचे उत्तम नियोजन कसे करायचे, हा परदेशी शिकायला जाणाऱ्या अनेकांपुढे मोठा प्रश्न असतो. त्याची माहिती देताना ब्राउन म्हणाल्या, 'परदेशी शिकायला जाणे ही आपल्यापेक्षा वेगळी संस्कृती अनुभवण्याची संधी असते. नवे कॉलेज, नवे विद्यापीठ, नवे विद्यार्थीजीवन याव्यतिरिक्त नवे पदार्थ आणि नवे लोक यांचीही ओळख या निमित्ताने होते. विविध मनोवृत्तीच्या व्यक्तींबरोबर प्रत्यक्ष संवादामुळे जगाचे आणखी सखोल ज्ञान होण्यास मदत होते.'
अर्थात, परदेशी जाण्याबाबत उत्सुकता असली, तरी या प्रवासाच्या अनुषंगाने काही महत्त्वाच्या बाबींवर लक्ष केंद्रीत करणे गरजेचे आहे. त्याकडे लक्ष दिल्यास परदेशात राहताना येऊ शकणाऱ्या समस्यांवर मात करणे शक्य होते. ब्राउन यांनी याबाबत विद्यार्थ्यांसाठी दिलेल्या चार महत्त्वाच्या टिप्स.
जागेविषयी माहिती घ्या
ज्या देशात शिकायला आणि पर्यायाने पुढचे काही महिने किंवा वर्ष राहायला जाणार आहात, तेथील संस्कृती, समाज, भाषा, हवामान, वाहतूक आणि जीवनशैली याबाबत जास्तीत जास्त माहिती करून घ्या. ही माहिती असेल, तर तेथे गेल्यावर तुम्ही अधिक आरामात राहू शकाल आणि नव्या गोष्टींचे दडपण तुम्हाला येणार नाही.
आर्थिक नियोजन
तुम्ही परदेशात शिकायला जाताना तेथील कोर्सची फी, राहण्याचा
खर्च आदी बाबींची माहिती गोळा केली असेलच; पण त्याशिवायही काही खर्च होऊ शकतात, याची तयारी ठेवा. स्थानिक प्रवास, सामाजिक उपक्रम, खरेदी आदींसाठी खर्च होऊ
शकतो. त्यामुळे अपरिहार्य प्रसंगांसाठीच्या खर्चाची तजवीज करून ठेवणे इष्ट.
कोर्सचे मूल्यमापन
जो कोर्स शिकायचा असेल आणि तो ज्या विद्यापीठात शिकायचा असेल, तो निवडताना त्याच्या ठिकाणाचे प्राधान्य त्याच्या आड येऊ नये. तुम्ही जो अभ्यासक्रम निवडला आहे, त्याबाबत व्यवस्थित माहिती घेऊन मगच योग्य तो निर्णय घ्या. म्हणजे एकदा अभ्यास सुरू केल्यावर, 'हे काही बरोबर नाही,' असे तुम्हाला वाटणार नाही.
गुंतवणुकीवरील परतावा
परदेशी शिकण्याची कल्पना आकर्षक असली, तरी अशी पदवी काय कामाची, ज्याचा तुमची व्यावसायिक उद्दिष्टे गाठण्यासाठी, नोकरी मिळण्यासाठी आणि पर्यायाने घेतलेले शैक्षणिक कर्ज फेडण्यासाठी काहीच उपयोग नाही! त्यामुळे जो कोणता पदवी अभ्यासक्रम शिकता आहात, त्याचे बाजारात मूल्य काय, याचीही माहिती घ्या. ही पदवी घेतल्यानंतर नोकरीच्या कोणत्या संधी आहेत, त्यातून सरासरी पॅकेज काय मिळेल, याचाही अभ्यास करा.
सुरुवातीलाच या सोप्या प्रश्नांची उत्तरे मिळवलीत, तर तुम्हाला पदवी घेऊन बाहेरच्या जगात गेल्यावर परिस्थितीशी सामना करणे अधिक सोपे जाईल.
मोबाइल अॅप डाउनलोड करा आणि राहा अपडेट