म. टा. वृत्तसेवा, भोर
भोर तालुक्यातील १४ गावे व १६ वाड्या आणि वस्त्यांमध्ये गेल्या १५ दिवसापासून तीव्र पाणी टंचाईला सुरवात झाली आहे. तेथील ग्रामपंचायतींनी पंचायत समितीकडे टँकरने पाणी पुरवठा सुरू करावा अशी मागणी केली आहे. पंचायत समितीच्या पाणी पुरवठा विभागाने त्याबाबतच्या मागणीचे प्रस्ताव जिल्हाधिकाऱ्यांकडे पुढील कार्यवाहीसाठी पाठविले आहेत.
वाढत्या उन्हामुळे ग्रामीण भागातील पाणवठ्यांची स्थिती बिकट होत चालली आहे. हे साठे कोरडे होत चालले आहेत. पाणी टंचाई असलेल्या गावांतील नागरिकांना सध्या पाणीसमस्येला तोंड द्यावे लागत आहे. महिलांना मैलोनमैल पायपीट करून पाणी आणावे लागते आहे. गेल्या वर्षी १५ एप्रिल रोजी काही गावांमधून टॅकरने पाणी पुरवठा सुरू करण्यात आला होता. कुडली बुद्रुक, निवंगण, शिरगाव येथील विहीरी कोरड्या पडल्या आहेत. दुर्गाडीच्या शिवकालीन विहिरीच्या तळाशी गाळ मिश्रित पाणी राहिले आहे. त्यामुळे येथील नागरिकांना पाण्यासाठी वणवण फिरावे लागते आहे.
धारांबेचे नागरिक उपलब्ध पाणी एकमेकांमध्ये वाटून घेतात. जेमतेम दोन हंडे पाणी पाणी प्रत्येकाला मिळते. जनावरांसाठी तीन किलोमीटर दूर असलेल्या नीरा-देवघर धरणावर जाऊन पाणी आणावे लागत आहे. वारवंड व हिर्डोशीच्या परिसरातील वाडी-वस्तीमधील नागरिकांनी नीरा देवघर धरणाच्या पात्रात खोलवर खड्डे खणले असून, पहाटे
मिळणारे हंडा-हंडा पाणी त्यातून गोळा केले जाते.
तालुक्यातील बहुतांश वाड्यांना पाणीटंचाई जाणवत असली तरी सरकारने अद्याप एकाही टँकरची परवानगी दिलेली नाही. त्यामुळे पाणी टंचाईग्रस्त ग्रामस्तांमध्ये नाराजीची भावना आहे. पाणी पुरवठा विभागाकडे ५० ठिकाणी विंधन विहिरींसाठी प्रस्ताव देण्यात आलेला आहे. त्यापैकी फक्त पाच ठिकाणी पाणी लागल्याचे सांगण्यात आले. तालुक्याच्या दोन्ही धरणखोऱ्यांत दर वर्षी आलटून-पालटून वरील गावांतून तीव्र पाणी समस्या फेब्रुवारीपासून सुरू होते. मे महिन्यात त्याची परिस्थिती अतिशय तीव्र आणि गंभीर झालेली असते. सरकारच्या लाल फितीच्या कारभारामुळे टँकर वेळेत आणि पुरेशा प्रमाणांत दिले जात नाहीत. परिणामी नागरिकांना त्याचा त्रास सहन करावा लागतो आहे. जनावरांचेही पाण्यावाचून खूप हाल होतात.. त्यामुळे या भागात पाणी टंचाई दूर होण्यासाठी कायमस्वरूपी उपाय योजना करण्यात यावी, अशी मागणी नागरिकांनी केली आहे.
या गावांना हवा
टँकरने पाणीपुरवठा शिरवली हि.मा.वारवंड डेरे गृहिणी कुरूंजी धारांबे धानिवली माझेरी कुडली बुद्रुक उंबार्डेवाडी निवंगणे बोपे डेहेणेची जळकेवाडी जयतपाडची हूंहेवस्ती, पसुरेची बिरामणे वस्ती कुरणे वस्ती
मोबाइल अॅप डाउनलोड करा आणि राहा अपडेट