भाडेकरारावरील शिवनेरी बसचा करार संपुष्टात आल्याने एसटी महामंडळाकडून प्रस्तावित नवीन बसची खरेदी अद्याप झालेली नाही. १० एप्रिलपर्यंत नवीन बस एसटीच्या ताफ्यात दाखल करण्याचे प्रयत्न निष्फळ ठरल्याने आता २० एप्रिलचा मुहूर्त काढण्यात आला आहे. त्यासाठी पुणे विभागातील तांत्रिक शाखेच्या तज्ज्ञांचे पथक बेंगळुरूला गाड्यांच्या तपासणीसाठी रवाना झाले आहे. पुणे-मुंबई आणि पुणे-औरंगाबाद मार्गावरील 'शिवनेरी'ला प्रवाशांचा चांगला प्रतिसाद मिळाला आहे. मात्र, शिवनेरी गाड्यांची संख्या कमी झाल्याने या सेवेवरील ताण वाढला आहे. त्यामुळे या गाड्यांचा करार संपुष्टात येण्यापूर्वीच एसटीने स्वमालकीच्या नवीन गाड्या खरेदी करण्याचा निर्णय घेतला होता. या गाड्या १० एप्रिलपर्यंत ताफ्यात दाखल होतील, अशी अपेक्षा अधिकाऱ्यांनी व्यक्त केली होती.
शिवनेरी बस सेवेसाठी एसटीने ठेकेदारांकडून ४० बसगाड्या भाडेतत्वावर घेतल्या आहेत तर, एसटीकडे स्वतःच्या मालकीच्या १० शिवनेरी आहेत. भाडेतत्वावरील नऊ गाड्यांचे करार नुकतेच संपले आहेत. करार संपणाऱ्या गाड्यांच्या कराराचे नुतनीकरण न करण्याचा निर्णय एसटीने यापूर्वीच घेतला आहे. त्याऐवजी एसटी स्वतःच शिवनेरी गाड्या खरेदी करणार आहे. बेंगळुरू येथून पुण्यासाठी नऊ आणि मुंबईसाठी तीन गाड्या खरेदी केल्या जाणार आहेत. या गाड्यांच्या तपासणीसाठी एसटीच्या तांत्रिक विभागातील तज्ज्ञांचे पथक तिकडे रवाना झाले आहे, अशी माहिती एसटीतील वरिष्ठ अधिकाऱ्यांनी दिली.
नवी डेडलाइनही चुकणार?
'एसटी'साठी ज्या गाड्या खरेदी केल्या जाणार आहेत, त्यांचा रंग, आसनव्यवस्था, सस्पेन्शन आणि अन्य सर्व तांत्रिक बाबींची तपासणी हे पथक करणार आहे. या तपासणीनंतर 'शिवनेरी' खरेदी केली जाईल. त्यासाठी लागणारी प्रक्रिया पाहता, २० एप्रिलपर्यंत एसटीच्या ताफ्यात नवीन बस दाखल होण्याची शक्यता धूसर असल्याची चर्चा आहे.
मोबाइल अॅप डाउनलोड करा आणि राहा अपडेट
