म. टा. प्रतिनिधी, पुणे
उन्हाळी सुट्या सुरू झाल्यानंतर एसटी-रेल्वे स्टेशनवर झुंबड उडते. आधीच पायाभूत सुविधांची वानवा असताना गर्दीचा भार पेलताना अधिकारी वर्गाची परीक्षा पाहिली जाते. दुसरीकडे, प्रवाशांनादेखील या गैरसोयींचा सामना करताना प्रचंड मनस्ताप सोसावा लागतो. त्याचाच आढावा घेणारी ही मालिका...
'मॉडेल स्टेशन' म्हणून कायापालट करण्याच्या राजकारण्यांकडून केल्या जाणाऱ्या घोषणा प्रत्यक्षात वल्गनाच ठरत असल्याचे पुणे रेल्वे स्टेशनवर गुरुवारी सायंकाळी सिद्ध झाले. लांब पल्ल्यांच्या लागोपाठच्या तीन रेल्वे गाड्या, विलंबामुळे कोलमडलेले वेळापत्रक अशा परिस्थितीत हजारो प्रवाशांच्या गर्दीने स्टेशनवरील पायाभूत सुविधांचा पुरता बोजवारा उडाला. प्रसंगी चेंगराचेंगरीदेखील झाली. अखेर पोलिसांना पाचारण करून परिस्थिती नियंत्रणात आणली गेली. उन्हाळी सुटी सुरू होतानाच पुणे स्टेशनवर असे हाल झाल्याने प्रवाशांनी संतप्त प्रतिक्रिया व्यक्त केली.
पुणे-गोरखपूर एक्स्प्रेस या रेल्वेची पुणे स्टेशनहून सुटण्याची वेळ सायंकाळी सव्वाचार आहे. मात्र, गोरखपूरहून पुण्याला येणाऱ्या रेल्वेला दोन तास उशीर झाल्याने ही गाडी सुटण्यास बराच विलंब झाला. त्या पाठोपाठ पाच वाजून २५ मिनिटांनी सुटणारी झेलम एक्स्प्रेस आणि आझाद हिंद एक्स्प्रेस या दोन्ही रेल्वेंचे प्रवासीही प्लॅटफॉर्मवर दाखल झाले. एकाच वेळी तीन रेल्वेंचे प्रवासी स्टेशनवर असल्याने मोठी गर्दी झाली.
स्टेशनवर सुरक्षा यंत्रणेचा अभाव आहे; तसेच सरकत्या जिन्याचे काम अद्यापही मार्गी लागलेले नाही. त्यामुळे गर्दी झाल्यानंतर स्टेशनवरून बाहेर पडणेही मुश्कील होते. त्यातच प्लॅटफॉर्मवर पिण्यासाठी पाणी, बसण्यासाठी पुरेसे बेंचही नसल्याने प्रवाशांना त्रास सहन करावा लागला. लहान मुले-स्त्रिया आणि बऱ्याच बॅगा असल्याने प्रवाशांची तारांबळ उडत होती.
'उन्हाळी सुटीत प्लॅटफॉर्मवर नेहमीच मोठी गर्दी होते. काही रेल्वेंच्या वेळा अचानक बदलल्याने गोंधळ होतो. त्या गर्दीत काही अपघात घडण्याची शक्यता नाकारता येत नाही. त्यामुळे प्रशासनाने सावधगिरी बाळगण्याची गरज आहे. मोठी गर्दी झाल्यावर प्रवाशांना उन्हात थांबावे लागते. प्रवाशांचे हाल थांबवण्यासाठी रेल्वे प्रशासनाने प्लॅटफॉर्मवर प्रवाशांच्या सोयीसाठी शेड उभारली पाहिजे, अशी मागणी रेल्वे प्रवासी ग्रूपच्या अध्यक्षा हर्षा शहा यांनी केली.
मोबाइल अॅप डाउनलोड करा आणि राहा अपडेट
