पुणे-मुंबई-पुणे असा प्रवास करणाऱ्या चाकरमान्यांच्या जिव्ह्याळ्याचा विषय बनलेल्या 'डेक्कन क्वीन'मधील 'डायनिंग कार' सात महिन्यांच्या विश्रांतीनंतर प्रवाशांच्या सेवेत दाखल होणार आहे. दुरूस्तीच्या नावाखाली डिसेंबर महिन्यात 'डायनिंग कार' काढून घेऊन या सेवेला कायमची तिलांजली देण्याचा निर्णय घेण्यात आला होता. मात्र, प्रवाशांच्या आग्रहास्तव रेल्वे प्रशासनाने निर्णय मागे घेतला आहे.
पुणे - मुंबई या मार्गावर डेक्कन क्वीनची सेवा एक जून १९३० पासून सुरू झाली. तेव्हापासून या गाडीत डायनिंग कारची सेवा होती. इतक्या वर्षांच्या सेवेनंतर दुरूस्तीसाठी म्हणून डिसेंबर २०१४मध्ये प्रशासनाने डायनिंग कार सेवेतून बाद केली. मात्र, पाच महिने उलटल्यानंतरही डायनिंग कार सेवेत दाखल करण्यात आली नाही. माहितीच्या अधिकारात माहिती मागविल्यानंतर डायनिंग कार भंगारात काढल्याचे समोर आले. आणि त्यानंतर ती कायमस्वरूपी बंद केल्याचे स्पष्ट झाले. त्यानंतर रेल्वे प्रवासी संघटनांनी त्याविरोधात आवाज उठवला. परिणामी, रेल्वे प्रशासनाने डायनिंग कार पुन्हा सुरू करण्याचा निर्णय घेतला. रेल्वेच्या एसी डब्याचे नूतनीकरण करून त्याचे रूपांतर डायनिंग कारमध्ये केले जाणार असून, त्याचे काम सध्या सुरू आहे. येत्या एक जूनला डेक्कन क्वीनच्या ८६ व्या वर्धापनदिनी डायनिंग कार सेवेत आणण्याचा रेल्वे प्रशासनाचा प्रयत्न आहे.
देशात कमी पल्ल्याच्या गाड्यांमध्ये डायनिंग कार सुविधा दिली जात नाही. मात्र, डेक्कन क्वीन त्याला अपवाद ठरली आहे. या गाडीने प्रवास करणाऱ्या प्रवाशांसाठी डायनिंग कार अविभाज्य भाग बनली आहे.
.......
ही सेवा पुन्हा सुरू करण्याच्या निर्णयामुळे प्रवाशांचा विजय झाला आहे. डायनिंग कारमुळे डेक्कन क्वीनमधील वातावरण पुन्हा उत्साहवर्धक होईल.
हर्षा शहा, अध्यक्षा, रेल्वे प्रवासी मंच
मोबाइल अॅप डाउनलोड करा आणि राहा अपडेट