'हरामखोर' या हिंदी सिनेमाच्या जाहिरातीसाठी महाराष्ट्र राज्य पाठ्यपुस्तक निर्मिती व अभ्यासक्रम संशोधन मंडळाच्या (बालभारती) बोधचिन्हाचा वापर केल्याप्रकरणी सिनेमाचे निर्माता अजय यादव, दिग्दर्शक श्लोक शर्मा, डिझायनर तारिणी डी. यांच्यावर पुण्यातील डेक्कन पोलिस ठाण्यात गुन्हा दाखल केला आहे. फसवणूक, 'कॉपी राइट' कायद्याचा भंग तसेच 'आयटी अॅक्ट'खाली गुन्हा दाखल करण्यात आला आहे.
'हरामखोर' या चित्रपटाच्या पोस्टरसाठी महाराष्ट्र राज्य पाठ्यपुस्तक निर्मिती व अभ्यासक्रम संशोधन मंडळाच्या (बालभारती) बोधचिन्हाचीच उचलेगिरी केल्याचे उघडकीस आल्यावर टीका झाली होती. बालभारतीचे विधी सल्लागार मोहन वीर यांनी दिलेल्या तक्रारीनुसार हा गुन्हा दाखल झाला आहे.
दिग्दर्शक श्लोक शर्मा यांनी 'हरामखोर' या चित्रपटाचे दिग्दर्शन केले आहे. या चित्रपटाचे चित्रिकरण पूर्ण झाले असून, सध्या ट्रेलर दाखविले जात आहेत. प्रसिद्ध अभिनेता नवाजुद्दीन सिद्दीकी या चित्रपटात शिक्षकाची भूमिका बजावत आहे. अभिनेत्री श्वेता त्रिपाठीने विद्यार्थिनीची भूमिका साकारली आहे. बोधचिन्हावर असलेल्या विद्यार्थ्याच्या ठिकाणी नवाजउद्दीनचे, तर विद्यार्थिनीच्या जागेवर श्वेताचे छायाचित्र प्रसिद्ध करण्यात आले आहे.
'हरामखोर' सिनेमाच्या जाहिरातींमध्ये हे बोधचिन्ह झळकू लागल्यानंतर सहा एप्रिल रोजी 'बालभारती'मध्ये तक्रारींचे फोन खणखणू लागले. त्यानंतर 'बालभारती'ने कायदेशीर बाजू तपासल्यानंतर कारवाईची भूमिका घेण्याचे धोरण स्वीकारले. 'बालभारती'चे विधी सल्लागार वीर यांनी डेक्कन पोलिस ठाण्यात सिनेमाच्या संबंधितांविरुद्ध गुन्हा दाखल केला. चित्रपटासाठी बोधचिन्हाचा वापर करणाऱ्या डिझायनर तारिणी डी. यांच्यासह तंत्रज्ञांनाही या गुन्ह्यांत सहआरोपी केले आहे.
मोबाइल अॅप डाउनलोड करा आणि राहा अपडेट