तापमानाचा पारा चाळिशीच्या दिशेने चढत असतानाच पुण्यामध्ये पुढील तीन दिवसांत गडगडाटासह पाऊस पडण्याची शक्यता पुणे वेधशाळेने वर्तवली आहे. दिवसभर हवा ढगाळ राहणार असून, तापमानाचा पारा ३६ अंश सेल्सिअसच्या पुढे असेल, असा अंदाज व्यक्त करण्यात आला आहे. दरम्यान, शुक्रवारी पुण्यामध्ये दिवसभरात ३७.६ अंश सेल्सिअस तापमानाची नोंद झाली.
उन्हाळ्यातील तापमानाच्या पाऱ्याने चढता क्रम धरला असून, गेल्या दोन दिवसांत राज्याच्या सर्व भागांतील नागरिक उकाड्याने हैराण झाले आहेत. दिवसभर उकाडा आणि संध्याकाळी ढगाळ हवा असे वातावरण सध्या अनुभवायला मिळते आहे. शुक्रवारी कोकण-गोव्याच्या काही भागांत कमाल तापमानात सरासरीच्या तुलनेत लक्षणीय वाढ, तर मध्य महाराष्ट्र, मराठवाडा आणि विदर्भाच्या काही भागांत कमाल तापमानात किंचित वाढ नोंदवली गेली. जळगावमध्ये ४०.३, अहमदनगरमध्ये ३९.२, कोल्हापूरमध्ये ३६.८, मालेगावमध्ये ४१.१, सोलापूरमध्ये ३९.७, औरंगाबादमध्ये ३८.४, तर नांदेडमध्ये ४० अंश सेल्सिअस तापमान नोंदवले गेले.
दरम्यान, पुण्यामध्ये दुपारनंतर ढगाळ हवेमुळे पावसाचे वातावरण निर्माण झाले होते; पण पाऊस पडला नाही. पुढील दोन दिवसांत मात्र पुणे परिसरामध्ये मुसळधार पावसाची शक्यता वेधशाळेने वर्तवली आहे. तसेच मध्य महाराष्ट्र आणि मराठवाड्यात तुरळक ठिकाणी गारांचा पाऊस पडण्याचा अंदाज वेधशाळेने वर्तवला आहे.
मोबाइल अॅप डाउनलोड करा आणि राहा अपडेट
