अनैतिक मानवी वाहतूक प्रतिबंध कक्षाने (एएचटीयू) किरकटवाडी येथील 'सार्थक' लॉजवर छापा टाकत वेश्याव्यवसाय करणाऱ्या आठ तरुणींची सुटका केली. या वेळी दोघा दलालांना अटक करण्यात आली आहे. 'एएचटीयू' पुणे शहर वगळता जिल्ह्यात केलेली ही पहिलीच कारवाई आहे. या कारवाईमुळे पुणे जिल्ह्यात व्यवसाय करणाऱ्या दलालांना चपराक बसणार आहे.
कपील उर्फ गोटया महाले (रा. सिंहगड रोड, ता. हवेली) आणि तारा श्रीपती पोतदार (२८, सध्या रा. सिंहगड रोड. मूळ रा. झारखंड) अशी अटक करण्यात आलेल्या आरोपींची नावे आहेत. या रॅकेटमधील मुख्य साथीदार अजय मुंडे हा फरार असून त्याचा शोध घेण्यात येत असल्याची माहिती 'एएचटीयू'चे पोलिस निरीक्षक संजय निकम यांनी दिली.
महिला व बालकांच्या अनैतिक वाहतुकीस प्रतिबंध करण्यासाठी राज्य सरकारने मुंबई, ठाणे, पुण्यासह १२ ठिकाणी अनैतिक मानवी वाहतूक प्रतिबंध कक्षाची (एएचटीयु) स्थापना केली आहे. पुण्यातील कक्षाकडे शहर आणि ग्रामीणची हद्द देण्यात आली आहे. आरोपी गोट्या आणि मुंडे हे किरकटवाडी येथील सार्थक लॉजमध्ये वेश्याव्यवसाय करून घेत असल्याची माहिती पोलिस कर्मचारी गणेश जगताप यांना मिळाली होती. त्यानुसार सहायक निरीक्षक नीता मिसाळ, ज्योती राजेशिर्के, कर्मचारी जगताप, शशिकांत शिंदे, रमेश काळे, सुरेश विधाते, सचिन कोकरे, नितीन तेलंगे, राजेश उंबरे, सचिन शिंदे, महिला कर्मचारी दमयंती जगदाळे, अनुराधा ठोंबरे आणि प्रगती नाईकनवरे यांच्या पथकाने ही कारवाई केली. यावेळी लॉजमधील आठ तरुणींची सुटका केली.
उणेचा टोळी तडीपार
शहरात सुरू असलेल्या टोळी युद्धाच्या पार्श्वभूमीवर परिमंडळ एकचे उपायुक्त एम. बी. तांबडे यांनी उणेचा टोळीतील सात सदस्यांना एक वर्षासाठी पुणे शहर आणि जिल्ह्यातून तडीपार केले.
तेजस उर्फ तेजपाल चंपालाल उणेचा (रा. आंबेगाव पठार), राजेश मच्छिंद्र सुब्रे (वय २५, रा. हॅप्पी कॉलनी) विलास माणिक वारकरी (३५, रा. कोथरुड), रवींद्र लक्ष्मण पुजारी (२७, रा. कोथरुड), अनिल उत्तम सूर्यवंशी (२९, रा. कोथरूड), संजय गोवर्धन लोंढे (२६, रा. कोथरूड) आणि शंकर बळीराम साखरे (२६, रा. कोथरूड) अशी तडीपार केलेल्या आरोपींची नावे आहेत.
शहरात सुरू असलेल्या टोळी युद्धाचा बिमोड करण्यासाठी तांबडे यांनी ही कारवाई केली आहे. तांबडे यांनी गेल्यावर्षी गजा मारणे टोळीवर अशाच प्रकारे तडीपारीची कारवाई केली होती. या तडीपारीला त्यावेळी स्थगिती देण्यात आली होती.
दुचाकी चोर अटकेत
मित्रांच्या मदतीने पुण्यातील विविध भागांतून दुचाकी चोरणाऱ्या तरुणाला बंडगार्डन पोलिसांनी अटक केली. या प्रकरणी पोलिसांनी रोहित पुनमचंद टाक (२०, रा. काळेपडळ, हडपसर) याला अटक केली आहे. यापूर्वी सचिन रणदिवे या आरोपीला अटक करण्यात आली आहे; तर आकाश बनसोडे ( रा. घोरपडी गाव) याचा पोलिस शोध घेत आहेत. या प्रकरणी राजेश रंजन रंजीत कुमार (२५, रा. काळेवाडी फाटा) याने फिर्याद दाखल केली आहे. दहा जानेवारी रोजी आगरकरनगर येथे ही घटना घडली.
मोबाइल अॅप डाउनलोड करा आणि राहा अपडेट
