म. टा. प्रतिनिधी, पुणे
पुणे मेट्रोचा करण्यात आलेला डीपीआर योग्य असून, आता नव्याने पुन्हा मेट्रोचा डीपीआर करावा लागल्यास अन्य शहराच्या स्पर्धेतून पुणे मेट्रो मागे पडेल, अशी भीती मेट्रो मार्गाचा अभ्यास करण्यासाठी नेमण्यात आलेल्या समितीने व्यक्त केली.
पुणे मेट्रो प्रकल्पातील वनाझ ते रामवाडी या मेट्रो मार्गाबाबत स्थानिक लोकप्रतिनिधींबरोबर शहरातील स्वयंसेवी संस्थांच्या प्रतिनिधींनी आक्षेप घेतले आहेत. त्याचा अभ्यास करून त्यावर निर्णय घेण्यासाठी मुख्यमंत्री देवेंद्र फडणवीस यांनी पालकमंत्री गिरीश बापट यांच्या अध्यक्षतेखाली दहा सदस्यांची समिती नेमली आहे. या समितीची दुसरी बैठक गुरुवारी मुंबईत झाली. या बैठकीत सदस्यांना वाटणारे आक्षेप आणि मेट्रोतील त्रुटी यांचे सादरीकरण झाले. मेट्रोचा डीपीआर बदलावा, अशी मागणी करण्यात आली.
दिल्ली मेट्रो रेल कार्पोरेशनने (डीएमआरसी) केलेला पुणे मेट्रोचा डीपीआर योग्य असून, त्यात बदल करून नव्याने डीपीआर करायचे झाल्यास इतर शहराच्या स्पर्धेतून पुणे मेट्रो मागे पडेल अशी भीती व्यक्त करण्यात आली. पुणे मेट्रोला आधीच उशीर झाला असून, अजून किती वर्षे 'डीपीआर'वर चर्चा करणार, असे स्पष्ट करून प्रस्तावित मार्गात बदल नको, अशी भूमिका पालिकेचे आयुक्त कुणाल कुमार यांनी मांडली. मेट्रोचा डीपीआर चुकीचा असून, लक्ष्मी रोड तसेच मंडई परिसरातून जाणारी मेट्रो असावी, अशी मागणी उद्योजक अरुण फिरोदिया यांनी मांडली.
मेट्रो करताना येणाऱ्या आवश्यक त्या त्रुटी दूर कराव्यात. सध्या जो डीपीआर केला आहे; त्यामध्ये कोणताही बदल करण्याची आवश्यकता नसल्याचे पुणे मेट्रोचे माजी विशेष कार्याधिकारी शशिकांत लिमये यांनी सांगितले. समितीचे अध्यक्ष पालकमंत्री बापट यांनी सर्व सदस्यांच्या सूचना जाणून घेतल्या. या सर्व सूचना 'डीएमआरसी'कडे पाठविल्या जाणार आहेत. त्यावर डीएमआरसी अहवाल देणार असून, हा अहवाल मुख्यमंत्री फडणवीस यांनी ठरवून दिलेल्या मुदतीत त्यांच्याकडे पाठविला जाणार असल्याचे बापट यांनी सांगितले.
मोबाइल अॅप डाउनलोड करा आणि राहा अपडेट
