क्रीडा क्षेत्राच्या विस्तारासाठी जिल्हा क्रीडा प्रबोधिनी, स्वच्छ भारत अभियानासाठी ग्राम संस्कार वाहिनी आणि राज्य महामार्गांवर महिला-पुरुषांसाठी स्वच्छतागृह उभारणे, अशा विविध घोषणा जिल्हा परिषदेच्या आर्थिक वर्ष २०१५-१६ च्या अर्थसंकल्पात केल्या आहेत. परिषदेचे उपाध्यक्ष व वित्त समितीचे सभापती शुक्राचार्य वांजळे यांनी सर्वसाधारण सभेत २०१५-१६ या आर्थिक वर्षाकरीता १७८ कोटी ५० लाख रुपयांचा अर्थसंकल्प शुक्रवारी सादर केला.
वारकरी पेहराव परिधान केलेल्या वांजळे यांनी छत्रपती शिवाजी महाराज आणि राज्याचे पहिले मुख्यमंत्री यशवंतराव चव्हाण यांच्या पुतळ्यास पुष्पहार अर्पण करून सभागृहात प्रवेश केला. 'माऊली... माऊली'च्या जयघोषात सर्व सदस्यांनी त्यांचे स्वागत केले. अर्थसंकल्पात समाजकल्याण विभागासाठी तीन कोटी ८० लाख, महिला व बाल विकासासाठी १३ कोटी ९० लाख, आरोग्य विभागाला चार कोटी, सार्वजनिक आरोग्य स्थापत्य विभागाला तीन कोटी ५८ लाख २३ हजार, स्त्री जन्माच्या स्वागतासाठी ३० लाख रुपये, शिक्षण विभागासाठी आठ कोटी, बांधकामला ४८ कोटी ३९ लाख ९० हजार, छोटे पाटबंधारे विभागाला १४ कोटी, ४८ लाख ५० हजार, कृषीला सहा कोटी, पशुसंवर्धनला ३० लाख, सिंहस्थ कुंभमेळ्यासाठी ७५ लाख रुपये आणि अपंग कल्याणासाठी चार कोटी रुपयांची तरतूद करण्यात आली आहे. वारकऱ्यांसाठी २५ लाख रुपयांची विशेष तरतूद करण्यात आली आहे. सभागृहामध्ये एकमुखाने मान्यता दिली. मात्र, चर्चे दरम्यान त्यामध्ये काही सदस्यांनी सुधारणाही सुचविल्या. सभेला अध्यक्ष प्रदीप कंद, मुख्यकार्यकारी अधिकारी कांतिलाल उमाप, उपमुख्य कार्यकारी अधिकारी यशवंत शितोळे, सर्व खातेप्रमुख, विविध समित्यांचे सभापती उपस्थित होते. जिल्हा परिषदेच्या २०१५-१६ या वर्षाच्या अर्थसंकल्पाबरोबर २०१४-१५ चा अंतिम सुधारित अर्थसंकल्पही या वेळी सादर करण्यात आला. त्यामध्ये वर्षाच्या सुरुवातीचा शिल्लक निधी १०२ कोटी ३० लाख आणि अपेक्षित जमा १६८ कोटी ७४ लाख रुपये असा २७१ कोटी चार लाख जमेचा अर्थसंकल्प सादर करण्यात आला.
पंचायत विभागात तीन नव्या योजना
पंचायत विभागाअंतर्गत तीन नवीन योजनांचा समावेश करण्यात आला आहे. त्यामध्ये सुधारित शवदाहिनी, ग्रामसंस्कार वाहिनी आणि ग्रामीण भागात पुरुष व महिला स्वच्छतागृह बांधणे आदी योजनांचा समावेश आहे. त्यासाठी अनुक्रमे १० लाख, पाच लाख आणि एक कोटी रुपयांची तरतूद करण्यात आली आहे.
ई-प्रशासनासाठी तरतूद
जिल्हा परिषदेच्या कामकाजात सुलभता आणण्यासाठी नवीन कम्प्युटर प्रणाली विकसित करण्यासाठी सरकारच्या आदेशानुसार अंदाजपत्रकाच्या अर्धा टक्के रक्कम ई-प्रशासनासाठी राखून ठेवण्याची तरतूद केली आहे. सरकारी कामाकाजात गतिमानता आणण्यासाठी वित्त विभागातर्फे फाइल ट्रॅकिंग प्रणाली तयार करण्यात येणार आहे.
सदस्य घेणार गाव दत्तक
गावांच्या विकास साधण्याच्या उद्देशाने खासदार व आमदारांनी गाव दत्तक घेतल्याप्रमाणेच जिल्हा परिषदेच्या सदस्यांनीही गाव दत्तक घेण्याचा निर्णय सर्वसाधारण सभेत घेण्यात आला.सर्व सदस्यांनी त्यांचे स्वतःचे गाव सोडून अन्य गावाची निवड करून एका आठवड्यात नावे कळवावे, असे आवाहन शुक्राचार्य वांजळे यांनी केले.
वैयक्तिक लाभ योजनांची आज्ञावली
विविध योजनांचा लाभ एकच लाभार्थी अनेकदा लाभ घेण्याची शक्यता नाकारता येत नाही. त्यामुळे हा प्रकार टाळण्यासाठी चालू वर्षात वैयक्तिक लाभाच्या योजनांची आज्ञावली तयार करण्यात येईल. एकदा लाभ घेतल्यानंतर दुसऱ्या लाभासाठी प्रस्ताव प्राप्त झाल्यास दुबार म्हणून नाकारला जाईल.
सर्व विभागांना समान न्याय देण्याचा प्रयत्न या अर्थसंकल्पात केला आहे. प्रत्येकाला मदत व्हावी, या दृष्टीने नवीन योजना सुचविल्या आहेत.
शुक्राचार्य वांजळे (उपाध्यक्ष आणि सभापती, वित्त समिती जिल्हा परिषद)
मोबाइल अॅप डाउनलोड करा आणि राहा अपडेट
