सावित्रीबाई फुले पुणे विद्यापीठाकडे यंदाच्या शैक्षणिक वर्षामध्ये रॅगिंगविषयीच्या एकूण चार तक्रारी झाल्याची धक्कादायक माहिती आता समोर येत आहे. त्यापैकी तीन तक्रारी कॉलेज पातळीवरून मागे घेण्यात आल्या, तर एका तक्रारीविषयी कॉलेज पातळीवर कारवाई झाल्याची माहिती विद्यापीठाकडूनच देण्यात आली आहे. रॅगिंगच्या या सर्व तक्रारींवरील कारवाई लालफितीच्या कारभारातच अडकून पडल्याने पीडितांना न्याय मिळणार तरी कधी, असा सवाल उपस्थित केला जात आहे.
एमआयटी इंजिनीअरिंग कॉलेजमध्ये विद्यार्थ्यावर झालेल्या रॅगिंगच्या प्रकारानंतर विद्यापीठाच्या कार्यक्षेत्रातील रॅगिंगच्या प्रकारांविषयी चौकशी सुरू झाली होती. 'एमआयटी'मधील रॅगिंगविषयी कॉलेज प्रशासनापाठोपाठ विद्यापीठाच्या विद्यार्थी कल्याण विभागानेही वेळेत कार्यवाही न केल्याने थेट संसदेमध्येही त्या विषयीचा प्रश्न उपस्थित करण्यात आला होता. त्यानंतर कॉलेजने रॅगिंग करणाऱ्या विद्यार्थ्यांवर कारवाईचे संकेत दिले होते. त्या पार्श्वभूमीवर विद्यापीठाच्या येत्या शनिवारी होणाऱ्या सिनेटमध्येही प्रश्न उपस्थित होणार असल्याने, यंदाची सिनेट चांगलीच गाजणार असल्याचे समोर येत आहे.
सिनेट सदस्य आणि विद्यार्थी प्रतिनिधी मयूर हिवाळे याने याविषयी उपस्थित केलेल्या प्रश्नाला उत्तर देताना विद्यापीठाने रॅगिंगच्या चार तक्रारी नोंदविण्यात आल्याची माहिती दिली आहे. या तक्रारींबाबत नेमकी काय कार्यवाही केली, या प्रश्नाला उत्तर देताना विद्यापीठ प्रशासनाने रॅगिंगविरोधी कायद्यातील तरतुदींनुसार संबंधित कॉलेजांना कारवाई करण्याचे आदेश दिल्याचे सांगण्यात आले आहे. त्यासाठी विद्यापीठाने वेळेत कार्यवाही केल्याचेही प्रशासनाने लेखी दिले आहे.
बैठकीत दाद मागणार
विद्यापीठ एकीकडे सर्व कार्यवाही वेळेत केल्याचे सांगत असले, तरी 'एमआयटी'मधील रॅगिंगच्या प्रकाराविरोधात विद्यापीठाने वेळीच पावले न उचलल्यानेच विद्यापीठाविरोधात थेट संसदेत प्रश्न उपस्थित झाला. हे वास्तव समोर असतानाही विद्यापीठाने पुन्हा एकदा चुकीची माहिती लिखित स्वरूपामध्ये दिल्याचे मयूरने सांगितले. विद्यार्थी प्रतिनिधी म्हणून या प्रकाराविरोधात सिनेटच्या बैठकीमध्येच दाद मागणार असल्याचेही मयूरने नमूद केले.
मोबाइल अॅप डाउनलोड करा आणि राहा अपडेट
