खासगी परिवहन क्षेत्रातील बडे प्रस्थ असलेली कोंडुसकर ट्रॅव्हल्स कंपनी पुन्हा ड्रग्ज वादात अडकली आहे. तळेगावजवळ 'एक्स्प्रेस वे'वरील उर्से टोलनाका येथे इस्लामपूरहून मुंबईला नेण्यात येत असलेले 'मेफेड्रोन' हे ड्रग महसूल गुप्तचर संचालनालय (डीआरआय) आणि पुणे कस्टम यांनी संयुक्त कारवाईत पकडले. या प्रकरणी कोंडुसकरच्या मालकीची उपकंपनी असलेल्या ओंकार इंडस्ट्रीजच्या सहा कर्मचाऱ्यांना अटक करण्यात आली आहे. कारमधून तीन कोटी रुपये किमतीचे ५० किलो मेफेड्रोन जप्त करण्यात आले. त्यानंतर जिथे ड्रग बनवण्यात आले, त्या कंपनीवर छापा टाकून तब्बल साडेतीनशे किलो ड्रग जप्त करण्यात आले. रात्री उशिरापर्यंत मुंबई येथे गुन्हा दाखल करण्याचे काम सुरू होते.
'डीआरआय'च्या सूत्रांनी दिलेल्या माहितीनुसार, सांगली जिल्ह्यातील इस्लामपूर येथून मुंबईला अमली पदार्थाची तस्करी होणार असल्याची माहिती डीआरआय आणि कस्टमच्या अधिकाऱ्यांना खबऱ्याकडून मिळाली. त्यावरून अधिकाऱ्यांनी संबंधित गाडीचा पाठलाग सुरू करून उर्से टोलनाक्याजवळ व्हीआयपी लेनमधून पुढे जाणारी गाडी अडवली. त्यातून नासिर या व्यक्तीला अटक करण्यात आली. त्याच्या गाडीमध्ये पन्नास किलो मेफेड्रोन नावाचे ड्रग्ज आढळले. हे ड्रग्ज इस्लामपूर येथील एका कंपनीत तयार करण्यात आल्याचे नासिर याने सांगितले. त्यामुळे तेथे जाऊन पथकाने तपासणी केली असता तेथे ३४० किलो ड्रग्ज लपवून ठेवल्याचे आढळले. अधिकाऱ्यांनी हे ड्रग्ज जप्त केले. या प्रकरणी चौघांना चौकशीसाठी ताब्यात घेण्यात आले आहे.
महाराष्ट्र कनेक्शन
मागील महिन्यामध्ये दिल्ली येथे अशाच प्रकारचे ड्रग जप्त करण्यात आले होते. ते सांगलीतील कुर्डुवाडी येथे तयार करण्यात आले होते. त्यामुळे या ड्रग्जची मुख्य पाळेमुळे महाराष्ट्रातच असावीत, असा अंदाज 'डीआरआय'च्या केंद्रीय टीमला होता. त्यावरून पथकाने कुर्डुवाडी औद्योगिक वसाहतीमधील एका कंपनीवर धाड घातली होती, तेव्हा ट्रकमध्ये ५०० किलो मेफेड्रोन सापडले होते. त्याची किंमत ३० कोटी रुपये होती.
मोबाइल अॅप डाउनलोड करा आणि राहा अपडेट
