म. टा. प्रतिनिधी, पुणे
'स्वाइन फ्लू' पेशंटच्या संपर्कात येणाऱ्या राज्यातील अधिक डॉक्टर, आरोग्य कर्मचारी तसेच परिचारिकांसाठी केंद्र सरकारने तीन हजार प्रतिबंधक लसींची मदत पाठविली आहे. प्रामुख्याने पुण्यासह नागपूर, मुंबई, लातूर आणि औरंगाबाद या ठिकाणच्या आरोग्य कर्मचाऱ्यांना प्राधान्याने लस देण्यात येणार आहे. त्याशिवाय अन्य जिल्ह्यातील आरोग्य कर्मचाऱ्यांना मागणीनुसार लस पुरवठा केला जाणार आहे.
राज्यातील प्राथमिक आरोग्य केंद्रापासून ते जिल्हा हॉस्पिटलमध्ये 'स्वाइन फ्लू'चे पेशंट उपचार घेत आहेत. उपचाराच्या निमित्ताने पेशंटच्या सातत्याने संपर्कात येणाऱ्या डॉक्टरांसह परिचारिका, आरोग्य कर्मचाऱ्यांना रोग प्रतिकारशक्ती असणे आवश्यक आहे. त्यामुळेच २००९-१० मध्ये राज्यातील कर्मचारी, डॉक्टरांना लस देण्यात आली होती. त्या धोरणानुसार पुन्हा राज्याच्या आरोग्य विभागाने केंद्र सरकारकडे सरकारी आरोग्य कर्मचाऱ्यांसाठी लसीची मागणी केली होती.
'सरकारी आरोग्य कर्मचाऱ्यांना 'स्वाइन फ्लू'पासून संरक्षणासाठी लसीची केंद्राकडे मागणी करण्यात आली होती. त्या मागणीनुसार केंद्राने तीन हजार लस बुधवारी राज्याच्या आरोग्य खात्याला दिल्या. 'स्वाइन फ्लू' (एच१एन१), 'सिझनल फ्लू' (एच३एन२) आणि 'टाइप बी' अशा तीन विषाणूंना प्रतिकार करणाऱ्या लसीचा समावेश असलेली 'व्हॅक्सीग्रीप' नावाची 'ट्रायव्हॅक्सीन' लस आरोग्य खात्याला केंद्राकडून उपलब्ध झाली आहे. अतिदक्षता विभाग, स्वतंत्र कक्ष आणि 'स्वाइन फ्लू'च्या संशयित पेशंटवर उपचार करणाऱ्या डॉक्टरांसह परिचारिका, आरोग्य कर्मचाऱ्यांना ही लस देण्यात येणार आहे,' अशी माहिती राज्याचे रोग सर्वेक्षण अधिकारी डॉ. प्रदीप आवटे यांनी दिली.
राज्यात बारा हजार कर्मचारी डॉक्टर आहेत. त्यानुसार राज्याने केंद्राकडे बारा हजार लसींच्या डोसेसची मागणी करण्यात आली होती. त्यापैकी पहिल्या टप्प्यात पाच हजार लस द्यावी आणि नंतर उर्वरित चार हजार डोस देण्याची मागणी करण्यात आली होती. मात्र, पहिल्या टप्प्यात तीन हजार लसींचा केंद्राने पुरवठा केला आहे.
मोबाइल अॅप डाउनलोड करा आणि राहा अपडेट
