बँक ऑफ महाराष्ट्रच्या वाढत्या अनुत्पादित कर्जांमुळे रिझर्व्ह बँकेने निर्बंध घातले असून, मुंबई स्टॉक एक्स्चेंजला त्याची माहिती देण्यात आली आहे. मात्र, या निर्बंधांमुळे बँकेच्या नियमित कामकाजावर कोणताही परिणाम होणार नसल्याचे बँकेतर्फे स्पष्ट करण्यात आले आहे.
बँक ऑफ महाराष्ट्रने शनिवारी मुंबई स्टॉक एक्स्चेंजला पत्र पाठवून बँकेवर रिझर्व्ह बँकेने (प्रॉम्प्ट करेक्टिव्ह अॅक्शन) निर्बंध आणल्याची माहिती दिली आहे. रिझर्व्ह बँकेने १५ जून रोजी पाठविलेले पत्र बँकेला मिळाले असून, त्यानुसार बँक कार्यवाही करत असल्याचे म्हटले आहे. रिझर्व्ह बँकेने बँकेवर आणलेले निर्बंध हे बँकेची कामगिरी सुधारावी, बँकेच्या व्यवस्थापनात सुधारणा व्हावी, नफा वाढावा आणि बँकेच्या मालमत्तेचा (अॅसेट्स) दर्जा सुधारावा,यासाठी आहेत,असे या पत्रात म्हटले आहे.
प्रॉम्प्ट करेक्टिव्ह अॅक्शनमधील निर्बंधांनुसार बँकांना रिझर्व्ह बँकेच्या परवानगीशिवाय नव्या शाखा सुरू करता येत नाहीत. बँकांच्या उपकंपन्यांमध्ये गुंतवणूक करता येत नाही. बँकांच्या कामकाजातील काही गोष्टींवर रिझर्व्ह बँकेचे नियंत्रण राहते. बँकांना मान्यतेशिवाय मोठ्या रकमेची कर्ज (कॉपोरेट लेंडिंग) देण्यावरही निर्बंध असतात. यापैकी कोणते निर्बंध बँक ऑफ महाराष्ट्रवर लादण्यात आलेले आहेत, हे स्पष्ट होऊ शकलेले नाही.
‘पीसीए लागू होण्यासाठी काही निकष तपासण्यात येतात. त्यापैकी बँक ऑफ महाराष्ट्रचे फक्त निव्वळ अनुत्पादित कर्ज (नेट एनपीए) अधिक आहेत. नेट एनपीएचे प्रमाण ११.५० असल्याने बँकेवर निर्बंध लादण्यात आले आहेत. रिझर्व्ह बँकेने आम्हाला काही मार्गदर्शक तत्वे दिली आहेत. त्यानुसार बँकेचे कामकाज चालेल,’ असे बँकेचे व्यवस्थापकीय संचालक व मुख्य कार्यकारी अधिकारी रवींद्र मराठे यांनी ‘मटा’ ला सांगितले.
केंद्र सरकारने राष्ट्रीयीकृत बँकांच्या कामगिरीचा आढावा घेण्यासाठी व रोडमॅप निश्चित करण्यासाठी दोन वर्ष ज्ञानसंगम परिषदेचे आयोजन केले होते. पुण्यात झालेल्या पहिल्या ज्ञानसंगम परिषदेनंतर बँकांची कामगिरी सुधारण्यासाठी इंद्रधनुष्य या सात कलमी कार्यक्रमाची निश्चिती करण्यात आली. बँकांना या निकषांनुसार आपली आर्थिक कामगिरी सुधारण्याचे निर्देश देण्यात आले होते. त्यानंतर बँकांच्या कामगिरीचा आढावा घेण्यासाठी वारंवार उच्चस्तरीय बैठका घेण्यात आल्या. या आढाव्यानंतरही ज्या बँकांची कामगिरी सुधारलेली नाही, अशा बँकांवर रिझर्व्ह बँकेने बंधने घालण्यास सुरुवात केली आहे, असे सूत्रांनी सांगितले.
बँकेचे कामकाज नियमित सुरू
रिझर्व्ह बँकेने बँक ऑफ महाराष्ट्रवर काही निर्बंध आणले आहेत. मात्र, त्याचा संबंध दैनंदिन कामकाजाशी नाही. बँकेचे कामकाज नियमित सुरू राहणार आहे. बँकेला ठेवी स्वीकारणे, कर्ज देण्यावर बंधने नाहीत, असे बँकेचे व्यवस्थापकीय संचालक व सीईओ रवींद्र मराठे यांनी स्पष्ट केले.
निर्बंध असलेली पाचवी बँक
गेल्या काही दिवसात निर्बंध लादण्यात आलेली बँक ऑफ महाराष्ट्र ही पाचवी राष्ट्रीय बँक आहे. रिझर्व्ह बँकेने आतापर्यंत आयडीबीआय, देना, युको आणि सेंट्रल बँक ऑफ इंडियावर असे निर्बंध लादले आहेत. असे असले, तरी या बँकांचे दैनंदिन कामकाज नियमित सुरू आहे.
‘सर्वाधिक कर्जवसुली’
बँकेच्या निव्वळ अनुत्पादित कर्जांचे (नेट एनपीए) प्रमाण ३१ मार्च २०१७ नुसार ११.७६ टक्क्यांवर पोहोचले आहे. त्यामुळे रिझर्व्ह बँकेने बँकेवर निर्बंध आणले आहेत. २०१६-१७ मध्ये बँकेने ११.१८ टक्के भांडवल पर्याप्तता राखली आहे. तर बँकेच्या कासा खात्यांचे प्रमाण ३६.६ टक्क्यांवरून ४४.८९ टक्क्यांवर पोहोचले आहे. तर बँकेच्या व्याजेतर उत्पन्नात ४७ टक्क्यांनी वाढ झाली आहे. तर बँकेने गेल्या आर्थिक वर्षात सर्वाधिक कर्जवसुली केली आहे, असे बँकेच्या अधिकृत प्रसिद्धीपत्रकात म्हटले आहे.
मोबाइल अॅप डाउनलोड करा आणि राहा अपडेट
