पुण्यात ज्ञानोबा माऊली आणि तुकोबांच्या पालखी मार्गात अडथळा आणल्याप्रकरणी शिवप्रतिष्ठाण हिंदुस्थानच्या संभाजी भिडे आणि त्यांच्या कार्यकर्त्यांविरुद्ध पुण्याच्या डेक्कन पोलीस स्टेशनमध्ये गुन्हा दाखल करण्यात आला आहे.
फर्ग्युसन रस्त्यावरुन माऊलींची पालखी जात असताना, संभाजी भिडे गुरुजींचे काही समर्थक दिंडीच्या पुढे येऊन मार्गक्रमण करु लागले. यावर दिंडीतील प्रमुखांनी आक्षेप घेतला. यामुळे संभाजी भिडेंचे कार्यकर्ते व वारकऱ्यांमध्ये वाद निर्माण झाला. त्यामुळे माऊलींची पालखी गुडलक चौकात एकाच जागी थांबून राहिली. माऊलींच्या पालखीला पुण्यातील मुक्कामाच्या ठिकाणी पोहोचायला उशीर झाला. मागील अनेक वर्षांपासून भिडे गुरुजींचे समर्थक हा प्रकार करत असल्याचा आरोप दिंडीतल्या प्रमुखांनी केला. या प्रकाराची दखल घेत डेक्कन पोलिसांनी भिडे गुरुजी आणि पालखीत गोंधळ घालणाऱ्या कार्यकर्त्यांविरुद्ध गुन्हा दाखल केला.
भिडे गुरुजींच्या कार्यकर्त्यांकडून असा प्रकार नेहमी होत असल्याने वारकऱ्यांनी संताप व्यक्त केला. पोलिसांनी वारकऱ्यांची समजूत घातली व असा प्रकार आता यापुढे होणार नाही, असे लेखी हमीपत्र पोलिसांनी ज्ञानोबा माऊली पालखी प्रशासनाला दिल्याने यावर पडदा पडला. त्यानंतर ज्ञानेश्वर माऊली आणि तुकोबारायांची पालखी मार्गस्थ झाली.
वारीत गोंधळ झाला नाही
आम्ही केवळ ज्ञानोबा, तुकोबांच्या दर्शनासाठी या वारीत सहभागी होत असतो. आमच्या कार्यकर्त्यांनी वारीत कोणताही गोंधळ केला नाही किंवा कोणत्याही तलवारीही त्या ठिकाणी नेल्या नाहीत, असे स्पष्टीकरण श्री शिवप्रतिष्ठान हिंदुस्थानचे कार्यवाहक नितीन चौगुले यांनी दिलं आहे.
मोबाइल अॅप डाउनलोड करा आणि राहा अपडेट
