मावळ प्रांत कार्यालयातील कारकुनाला ५० हजार रुपयांची लाच घेतल्याप्रकरणी १७ जूनपर्यंत पोलिस कोठडी सुनावण्यात आली आहे. विशेष न्यायाधीश दिलीप मुरुमकर यांच्या कोर्टाने हा आदेश दिला.
प्रवीण किसन ढमाले (वय ४०, पिंपळे गुरव) याला याप्रकरणी अटक करण्यात आली आहे. संदीप जयसिंग घाडगे (३८, आंबेगाव बुद्रुक) यालाही अटक करण्यात आली आहे. याप्रकरणी विनायक शिवाजी काळभोर (३५, आकुर्डी) यांनी तक्रार दाखल केली आहे. काळभोर आणि त्याचे मामा गणेश काटे यांनी मावळ येथे १३ एकर सहा गुंठे जागा विकत घेतली होती. त्यातील ४२ गुंठे जागाही एम. आय. डी. सी. संपादनासाठी प्रस्तावित झाल्याने त्याचा मोबदला म्हणून काळभोर व त्यांच्या मामांना मिळून एक कोटी ६६ लाख ४३,००० रुपये आणि १५ टक्के जमीन परतावा मिळणार होता.
ही रक्कम व परताव्यासाठी लागणारी सर्व कागदपत्रे यांची फाइल बनवून काळभोर मावळ प्रांत कार्यालयात गेले असता आरोपी ढमाले यांनी ‘साहेबांचे काहीतरी करावे लागेल,’ असे सांगून एकूण रकमेच्या १२ टक्के रकमेची मागणी केली. त्यावर काळभोर यांनी एवढी रक्कम देणे शक्य नसल्याचे सांगितले. त्यावर ‘मामांचा धनादेश निघाला असून, दोघांनी मिळून दोन दिवसांच्या आत एक लाख रुपये दिले तरच तो धनादेश खात्यावर जमा करण्यात येईल,’ असे ढमाले यांनी सांगितले. त्यातले ५० हजार रुपये लगेच देण्यास सांगितले. काळभोर यांनी ती रक्कम दिली असता त्यांच्या खात्यावर ५५ लाख ४७,६६६ रुपये रक्कम जमा झाली. ढमाले यांच्या कार्यलयातून उर्वरित रक्कम देण्यासाठी फोन येत असल्याने काळभोर यांनी लाचलुचपत विभागाकडे तक्रार दाखल केली. लाचलुचपत विभागाने सापळा रचून ही कारवाई केली. अटक आरोपींना कोर्टात हजर करण्यात आले होते. त्यांच्याकडे अधिक तपास करण्यासाठी त्यांची पोलिस कोठडी देण्यात यावी, अशी मागणी सरकारी वकील प्रेमकुमार अगरवाल यांनी कोर्टात केली.
मोबाइल अॅप डाउनलोड करा आणि राहा अपडेट
