म. टा. प्रतिनिधी, बारामती
अनेक जिल्हा परिषदेच्या शाळांमध्ये शाळेच्या पहिल्या दिवशी विद्यार्थ्यांचे उत्साहात स्वागत होत असताना बारामती येथील एका शाळेत मुलांना स्वागताऐवजी झाडू घेऊन शाळेची स्वच्छता करावी लागली. तर, दुसऱ्या शाळेत मुले शिक्षकांच्या आदेशाने बाके उचलताना आढळली.
विद्यार्थ्यांच्या मनातील शाळेची भीती दूर व्हावी आणि त्यांना शिक्षणाची गोडी वाटावी, यासाठी राज्य शासनाच्या शिक्षण विभागाने शैक्षणिक वर्षाच्या पहिल्या दिवशी पहिलीत प्रवेश घेतलेल्या विद्यार्थ्यांना औक्षण करून पुष्पगुच्छ देऊन स्वागत करावे, असे आदेश असतानाही बारामती तालुक्यातील जिल्हा परिषदेच्या गुणवडी व मळद गावांतील शाळांमध्ये मात्र चित्र वेगळे आहे. शाळेच्या पहिल्याच दिवशी मुलांना कामाला लावल्याचे उघड झाले आहे. शाळेतील शिक्षकांना या घटनेचे वैषम्य वाटणे दूरच; उलट ‘खिचडी खाण्यासाठी मुलांनी स्वच्छता केली, तर काय बिघडले, मुलांना बसण्यासाठी बाक नसल्याने ते स्वतः दुसरीकडून उचलून नेत आहेत. त्यात वेगळे काय,’ अशा प्रतिक्रिया त्यांनी व्यक्त केल्या. सरकारच्या नियमाप्रमाणे आम्ही ‘प्रवेशोत्सव’ साजरा केला आहे, असेही येथील शिक्षकांनी ‘मटा’ला सांगितले.
मळद व गुणवडी जिल्हा परिषदेच्या शाळांमधील विद्यार्थ्यांना पहिल्याच दिवशी काम करायला लावले, हे योग्य नाही. संबंधित मुख्याध्यापक व शिक्षकांवर कारवाई केली जाईल. असा प्रकार पुन्हा घडणार नाही, याची काळजी घेतली जाईल.
- किशोर पवार, गट शिक्षणाधिकारी, पंचायत समिती बारामती
शाळेचा पट २०वरून ९३वर
बारामती तालुक्यातील नीरावागज हद्दीतील मदने-डोंबाळेवस्ती शाळेचा पट २०वरून ९३ असा वाढला आहे. मात्र, हे सर्व येथील शिक्षकांचे कौशल्य असल्याचे गटशिक्षणाधिकारी किशोर पवार यांनी सांगितले.
‘प्रवेशोत्सवा’ने विद्यार्थी भारावले
मळद व गुणवडी शाळेतील अपवाद वगळता अनेक शाळांमध्ये विद्यार्थ्यांचे पहिल्या दिवशी जोरदार स्वागत झाले. महात्मा गांधी बालक मंदिर शाळेत पहिलीत प्रवेश केलेल्या विद्यार्थ्यांचे पुष्पगुच्छ देऊन स्वागत करण्यात आले. या वेळी प्रभातफेरीचे आयोजन करण्यात आले होते. प्रवेशोत्सव कार्यक्रम आटोपल्यानंतर विद्यार्थ्यांना मोफत पुस्तकांचे वितरण करण्यात आले. या वेळी संस्थेचे अधीक्षक खंडागळे सतीश, मुख्याध्यापिका सुनीता भोसले आदी उपस्थित होते.
‘प्रत्येक दिवस सुरक्षेचा’
जुन्नर : ‘जीवनात सुरक्षा महत्त्वाची आहे. यशापयशाच्या गोष्टी कमी अधिक होऊ शकतील; परंतु, जर सुरक्षा नसेल, तर काहीच नाही,’ असा विचारप्रबोधनाचा धडा बल्लाळवाडीच्या विद्या इंटरनॅशनल स्कूलमध्ये गिरवण्यात आला. निमित्त होते, शाळेच्या पहिल्या दिवसाचे.
वेगाला आवरा, जिवाला सावरा, रस्ता ओलांडताना सतर्क रहा, सुरक्षित रहा, वाहतुकीचे नियम पाळा, वेगाची मर्यादा ओलांडू नका अशा प्रकारचे रस्ते सुरक्षा विषयक फलक हातात घेऊन मुलांचे शाळेत आगमन झाले. मुलांना शाळेत सोडवण्यासाठी आलेल्या पालकांमध्येही अनोख्या उपक्रमाची विशेष चर्चा होती. लहान मुलांना बाइक चालवायला दिल्या जातात किंवा पालकांची नजर चुकवून लहान मुले दुचाकी चालवतात. त्यामुळे पालकांसह मुलांनादेखील सुरक्षेची जाणीव व्हावी, या हेतूने ‘पहिला दिवस सुरक्षेचा’ हा उपक्रम राबविण्यात आला. ‘विद्या स्कूल’च्या विश्वस्त अक्षता गाडेकर यांनी ही माहिती दिली. शाळेसाठी नव्याने दाखल झालेल्या स्कूल बसचे उद्धाटनदेखील या औचित्याने पालकांमधून चिठ्ठी टाकून निवड झालेल्या पालकाच्या हस्ते करण्यात आले. रस्ते सुरक्षाविषयक नियमांचे पालन करण्याची प्रतिज्ञा या वेळी मुलांनी घेतली.
दुर्गम साकुर्डी गावात मुलांचे जोरदार स्वागत
राजगुरुनगर : साकुर्डी येथील जिल्हा परिषद प्राथमिक शाळेत नवीन प्रवेश घेतलेल्या विद्यार्थ्यांच्या दृष्टीने पहिला दिवस खासच होता. या विद्यार्थ्यांच्या शाळेतील शिक्षकांनी पुष्पगुच्छ देऊन मुलांचे जोरदार स्वागत केले. शिक्षकांच्या या स्वागतामुळे विद्यार्थी भारावले. सर्व उपस्थित विद्यार्थांना पहिल्याच दिवशी नवीन पुस्तके देण्यात आली. तसेच, खाऊ वाटण्यात आला. दुपारच्या जेवणात विद्यार्थांना शिरा देण्यात आला. इयत्ता पहिलीत चार, तर पाचवीमध्ये दोन नवीन विद्यार्थ्यांनी प्रवेश घेतला. या शाळेत इयत्ता पहिली ते सातवी अशा सात तुकड्या असून विद्यार्थ्यांची संख्या अवघी ७० आहे. या शाळेत तीन शिक्षक असून, कमी पटसंख्येमुळे शाळेला मुख्याध्यापकाचे पद नाही. शाळेत दीडशेपेक्षा अधिक विद्यार्थी असेल, तर मुख्याध्यापकाचे पद दिले जाते. साकुर्डी हे गाव चासकमान धरणालगत वसले आहे. दुर्गम भागात असल्यामुळे या गावात दळणवळणाच्या सुविधा अपुऱ्या आहेत.
पहिल्याच दिवशी पुस्तकांचे वाटप
येरवडा : शाळेच्या पहिल्या दिवशी राष्ट्रवादी काँग्रेसच्या नगरसेवकांनी विद्यार्थ्यांना नवीन पाठ्यपुस्तकांचे वाटप करून मुलांची मने जिंकली. पहिल्याच दिवशी नवी कोरी पुस्तके हातात मिळाल्याने विद्यार्थी आनंदी झाले होते.
खराडी चंदननगर प्रभागाचे नगरसेवक महेंद्र पठारे, भैय्यासाहेब जाधव, नगरसेविका संजीला पठारे आणि सुमन पठारे यांच्या हस्ते खुळेवाडी येथील महापालिकेच्या शाळा क्रमांक १८१, ९० जी, १७ जी, १५८ बी, १०२ बी आणि विद्यानिकेतनमधील पहिली ते आठवीच्या विद्यार्थ्यांना पुस्तकांचे वाटप करण्यात आले. महेंद्र पठारे म्हणाले, ‘शाळेच्या पहिल्या दिवसापासूनच विद्यार्थ्यांनी मन लावून अभ्यास करून आपल्या शाळेचे आणि पालकांचे नाव उज्ज्वल करावे.’ या वेळी संबंधित शाळेचे मुख्याध्यापक, शिक्षक आणि पालक उपस्थित होते.
विद्यार्थ्यांचे स्वागत
राष्ट्रवादी काँग्रेस पार्टी तर्फे शाळेच्या पहिल्या दिवसाचे औचित्य साधून पुणे महापालिकेच्या येरवडा येथील जेल लाइनजवळील भाऊसाहेब आप्पासाहेब जाधव शाळेतील मराठी, इंग्रजी व उर्दू विभागातील विद्यार्थ्यांना गुलाबाचे फूल व पेढा देऊन त्यांचे स्वागत करण्यात आले. या वेळी राष्ट्रवादी काँग्रेस पार्टीचे पुणे शहर उपाध्यक्ष अॅड. नानासाहेब नलावडे, गौतम (आबा) खरात, बापू निकम, सुरेश डेकाटे आदी उपस्थित होते.
गुलाबपुष्प, चॉकलेट देऊन विद्यार्थ्यांचे स्वागत
दौंड : तालुक्यातील जिल्हा परिषदांच्या शाळांमध्ये विद्यार्थ्यांचा ‘प्रवेशोत्सोव’ पुस्तके, गुलाबपुष्प व चॉकलेट यांचे वाटप करून करण्यात आला. यवत येथे जिल्हा परिषद व शाळा नंबर एक व दोन यांनी संयुक्तपणे नव्याने शाळेत प्रवेश केलेल्या विद्यार्थ्यांचे स्वागत केले. पुणे जिल्हा परिषदेचे मुख्य कार्यकारी अधिकारी दौलत देसाई यांच्या हस्ते इयत्ता पहिलीच्या मुलांना पुस्तके, गुलाबपुष्प व चॉकलेट वाटण्यात आले. या वेळी उपमुख्य कार्यकारी अधिकारी राहुल साकोरे, दौंड पंचायत समितीचे गटविकास अधिकारी विनायक गुळवे, गट शिक्षणाधिकारी गौतम बेलखेडे, सोमनाथ गायकवाड आदी उपस्थित होते.
शाळांचे व्हरांडे फुलले
शिरूर : दोन महिन्यांच्या सुट्टीनंतर गुरुवारी अनेक शाळांचे व्हरांडे मुलांच्या गर्दीने फुलून गेले होते. शिरूर शहर आणि परिसरात मोठ्या उत्साहात विविध शाळांमध्ये प्रवेशोत्सवाचे कार्यक्रम झाले. काही जणांच्या शालेय शिक्षणाचा गुरुवारी श्री गणेशा झाला. शाळेचा पहिल्याच दिवस असल्याने अनेक मुलांना आई वडील शाळेत सोडवायला आले होते. शाळेतील पहिल्या दिवशी परिसरात सजावट करण्यात आली. विद्यार्थ्यांचे पुष्पगुच्छ आणि खाऊ देऊन स्वागत करण्यात आले. ‘आकांक्षा एज्युकेशनल फाउंडेशन’ या विशेष मुलांच्या संस्थेतील शाळेत ‘चार्टर्ड अकाउंटंट’ आदेश गुंदेचा यांच्या हस्ते विद्यार्थ्यांना पुष्पगुच्छ, शालेय गणवेश देऊन स्वागत करण्यात आले. या वेळी संस्थेच्या संस्थापिका राणी चोरे यांनी प्रास्ताविक केले. डॉ. मनीषा साखरे, डॉ.मनीषा चोरे, सतीश केदारी, पालक व विद्यार्थी व संस्थेतील सर्व कर्मचारी मोठ्या संख्येने उपस्थित होते.
मोबाइल अॅप डाउनलोड करा आणि राहा अपडेट
