‘प्रशासकीय सेवेच्या अभ्यासाला सुरुवात करण्यापूर्वी विद्यार्थ्यांनी आपल्यातील क्षमता आणि कमतरता ओळखावी. विद्यार्थ्यांनी परीक्षेत उत्तीर्ण होण्यासाठी क्लासपेक्षा केवळ आणि केवळ स्वयंअध्ययनाला महत्त्व देण्याची आवश्यकता आहे. आता मला ‘इंडियन फॉरेन सर्व्हिस’मध्ये (आयएफएस) देशसेवा करायची आहे,’ अशी माहिती केंद्रीय लोकसेवा आयोगाच्या वतीने घेण्यात आलेल्या ‘भारतीय प्रशासकीय सेवा परीक्षा २०१६’मध्ये (आयएएस) देशात अकरावी, तर राज्यात पहिली आलेल्या पुण्याच्या विश्वांजली गायकवाड हिने ‘मटा’ला दिली.
शासकीय सेवा परीक्षेचा निकाल बुधवारी रात्री जाहीर झाला. या परीक्षेत विश्वांजलीने राज्यात पहिली येण्याचा बहुमान मिळविला आहे. विश्वांजलीचे शिक्षण शासकीय इंजिनीअरिंग कॉलेजमध्ये (सीओईपी) कम्प्युटर शाखेमध्ये झाले आहे. विश्वांजलीने परीक्षेच्या अभ्यासाची तयारी २०१४पासून सुरू केली. यापूर्वी दिलेल्या परीक्षेत काही टक्क्यांनी विश्वांजली पूर्वपरीक्षा उत्तीर्ण होऊ शकली नाही. मात्र, दुसऱ्या प्रयत्नात तिने हे यश प्राप्त केले आहे. विश्वांजलीचे वडील डॉ. मुरलीधर गायकवाड आणि आई डॉ. ज्योती गायकवाड हे एमएमसीसी कॉलेजात प्राध्यापक पदावर कार्यरत आहेत. तर, भाऊ चैतन्य गायकवाड हा व्हीआयटी कॉलेजमध्ये मेकॅनिकल शाखेत अंतिम वर्षाला आहे.
विश्वांजली म्हणाली, ‘सीओईपीमधून बी-टेकची पदवी मिळविल्यानंतर भारतीय प्रशासकीय सेवेचा अभ्यास करण्याला सुरुवात केली. परीक्षेची माहिती मिळण्यासाठी आणि एकंदरीत आढावा घेण्यासाठी युनिक अॅकॅडमीमध्ये क्लास लावला. केवळ क्लासला महत्त्व दिले नाही. याउलट मी स्व-अभ्यास आणि नियमित अभ्यास करण्याला प्राधान्य दिले. पूर्वपरीक्षा उत्तीर्ण झाल्यानंतर मुख्य परीक्षेचा आणि मुलाखतीचा कसून अभ्यास केला. मुख्य परीक्षेसाठी पॉलिटिकल सायन्स हा विषय निवडला होता. मुलाखतीमध्ये पहिल्यांदाच सामोरे जात असल्याने भीती वाटत होती. मात्र, पॅनेलसमोर गेल्यानंतर त्यांनी प्रश्न विचारायला सुरू केल्यावर भीती राहिलीच नाही. पॅनेलमधील व्यक्ती तुमच्या उत्तरांवरून तुमची ‘ओरिजिनॅलिटी’ तपासतात. त्यामुळे कोणताही ताण न घेता प्रश्नांची उत्तरे दिली आणि परीक्षेत यशस्वी झाली. माझ्या यशात आई, वडील आणि भावाचे योगदान आहे.’
‘विश्वांजलीला बारावीतदेखील सायन्स शाखेत ९६.३३ टक्के गुण होते. दहावीत तिचा पहिला क्रमांक आला होता. तिने अभ्यासासाठी कोणत्याच प्रकारचे शिकवणी वर्ग लावले नाही. तिने लहानपणापासून स्व-अभ्यासालाच अधिक महत्त्व दिले. त्यामुळेच ती आज परीक्षेत यशस्वी झाली आहे. तिच्या यशाचे श्रेय तिने आम्हाला दिले असले, तरी संपूर्ण यश तिचेच आहे,’ असे डॉ. मुरलीधर आणि डॉ. ज्योती गायकवाड यांनी सांगितले.
सीओईपीचे प्रा. संदीप मेश्राम आणि एस. एस. परदेशी यांनी सांगितले, की विश्वांजली ही सीओईपीच्या बोट क्लबची सदस्य असून कॉलेजमध्ये शिकताना ती विविध उपक्रमांमध्ये सहभागी असायची. विश्वांजली ही कॉलेजमध्ये शिकताना बोट क्लबची सक्रिय सदस्य होती. त्यामुळे ती एक उत्कृष्ट रोव्हर होती. तिने रोव्हिंग या क्रीडा प्रकारात सीओईपीच्या संघाचे राष्ट्रीय आणि आंतरराष्ट्रीय पातळीवर प्रतिनिधित्व केले होते. काही वर्षांपूर्वी तिने फिलिपाइन्समध्ये झालेल्या अॅमेच्युअर्स रोव्हिंग स्पर्धेत सीओईपीचे प्रतिनिधित्व केले होते. तसेच, तिचा रिगाटामध्ये देखील सक्रिय सहभाग असायचा.
मोबाइल अॅप डाउनलोड करा आणि राहा अपडेट
