‘सध्याच्या काळात संरक्षण दलांपैकी कोणतेही एक दल युद्ध जिंकू शकत नाही,’ असे सांगत नौदलप्रमुख अॅडमिरल सुनील लांबा यांनी एनडीएच्या छात्रांना ‘जॉइंटमनशिप’ची वृत्ती अंगी बाणण्याचे आवाहन केले. भारतीय नौदलाने हिंदी महासागराबरोबरच पॅसिफिक व अटलांटिक महासागरापर्यंत आपले अस्तित्व निर्माण केल्याचे सांगत कोणत्याही हल्ल्याला किंवा धोक्याला सामोरे जाण्यासाठी भारतीय नौदल सक्षम असल्याचेही लांबा यांनी स्पष्ट केले.
‘एनडीएमध्ये छात्रांना तिन्ही दलांमध्ये समन्वय ठेवून काम करण्याचे (जॉईंटमनशिप) धडे दिले जातात. ते तुम्हाला पुढील कारकीर्दीत उपयोगी येतील,’ असे अॅडमिरल लांबा यांनी छात्रांना उद्देशून केलेल्या भाषणात सांगितले. त्यानंतर पत्रकारांशी बोलताना लांबा म्हणाले, ‘तिन्ही दलांमधील समन्वय वाढावा, यासाठी एकत्रित प्रशिक्षण कार्यक्रम केले जात आहेत. भविष्यात फक्त गुप्तचर विभागच नव्हे; तर अन्य क्षेत्रांतील सहकार्यही वाढविण्यात येईल’. ‘भारतीय नौदलाने हिंदी महासागरात आपला दबदबा आणखी वाढवला आहे. एडनच्या आखातात युद्धनौका कायमस्वरूपी तैनात आहे. तर पश्चिमी ताफ्याने मध्य समुद्रापासून अॅटलांटिकपर्यंत आपले अस्तित्व निर्माण केले आहे. पूर्व ताफ्याने दक्षिण चीन समुद्रात सिंगापूरच्या नौदलासोबत सराव केला; तर सध्या आपल्या नौका ऑस्ट्रेलियन नौदलासोबत सरावासाठी रवाना झाल्या आहेत. त्यामुळे भारतीय नौदलाचा पसारा पॅसिफिक ते अटलांटिक असा झाला आहे,’ असे लांबा यांनी सांगितले. ‘नौदलाने पहिल्यापासूनच ‘मेक इन इंडिया’ला प्राधान्य दिले आहे. सध्या ४२ नौका व पाणबुड्यांची बांधणी सुरू आहे. हा सर्व ताफा सांभाळायला कुशल मनुष्यबळही नौदलाकडे उपलब्ध आहे,’ असेही लांबा म्हणाले.
पुन्हा २६-११ सारखा हल्ला झाल्यास त्याला तोंड देण्यासाठी आपण सक्षम आहोत का, या प्रश्नाला उत्तर देताना लांबा म्हणाले, ‘नौदल कोणताही हल्ला परतवून लावण्यासाठी सक्षम आहे. सरकार सांगेल ती कामगिरी आम्ही अचूक पार पाडू’.एनडीएचेच माजी छात्र असलेले लांबा यांनी जुन्या आठवणींना उजाळा दिला. ‘जानेवारी १९७४ मध्ये मी एनडीएत दाखल झालो. इथली तीन वर्षे खूप वेगळी होती. माझी गोल्फ स्क्वाड्रन ही एनडीएतली सर्वोत्तम स्क्वाड्रन आहे. गोल्फच्या प्रथा-परंपरा खूप वेगळ्या आहेत’, असे ते म्हणाले.
‘विराट’च्या संग्रहालयाचा प्रस्ताव नाही’
भारताची पहिली विमानवाहू नौका विक्रांत नौदलाने भंगारात काढली होती. या पार्श्वभूमीवर सहा मार्च रोजी निवृत्त झालेल्या विराट या दुसऱ्या विमानवाहू नौकेचे तरी संग्रहालयात रूपांतर व्हावे, ही मागणी जोर धरत आहे. त्या पार्श्वभूमीवर ‘महाराष्ट्र टाइम्स’च्या प्रतिनिधीने अॅडमिरल लांबा यांना विचारले असता, ‘विराट सध्या निवृत्तीचे जीवन जगत आहे. तिचे संग्रहालयात रूपांतर करण्याविषयी अजूनही आम्हाला ठोस प्रस्ताव आलेला नाही. योग्य प्रस्ताव आल्यास त्याबाबत निर्णय घेतला जाईल,’ असे त्यांनी सांगितले. त्यामुळे योग्य प्रस्तावाअभावी विराटही भंगारात निघण्याची शक्यता वाढली आहे.
मोबाइल अॅप डाउनलोड करा आणि राहा अपडेट
