स्वीकृत सदस्यांच्या निवडीवरून भारतीय जनता पक्षाच्या कार्यकर्त्यांमध्ये झालेल्या जोरदार हाणामारीनंतर पक्षाकडे अद्याप या सर्व घटनेची माहिती उपलब्ध नाही. त्यामुळे, पक्षातील नेमक्या कोणत्या कार्यकर्त्यांवर शिस्तभंगाची कारवाई करायची, यावरून पक्ष संभ्रमावस्थेत असल्याचे दिसून येत आहे.
गेल्या मंगळवारी महापालिकेत स्वीकृत सदस्यांसाठी अर्ज भरायचे होते. पक्षाचे सरचिटणीस गणेश घोष यांच्याऐवजी माजी गटनेते गणेश बीडकर यांना संधी देण्यात आली. यामुळे, संतापलेल्या घोष यांच्या समर्थकांनी पालिकेतील सभागृहनेते आणि पक्षाच्या कार्यालयाची नासधूस केली. दोन्ही गटांमध्ये बाचाबाची आणि हाणामारी झाली. ही सर्व घटना भाजपच्या पालिकेतील पदाधिकाऱ्यांसह अनेकांनी ‘याचि देही याची डोळा’ अनुभवली असली, तरी पक्षाकडे त्याची कोणतीच माहिती अजूनही उपलब्ध झालेली नाही.
शिस्तबद्ध पक्ष म्हणून लौकिक असलेल्या भाजपच्या कार्यकर्त्यांनी बेशिस्त वर्तणूक करून पक्षाचे कार्यालय फोडण्याचा पराक्रम केला आहे. तर, हे कार्यालय फोडण्यावरून पक्षाचे विद्यमान सरचिटणीस गणेश घोष यांच्याविरुद्ध गुन्हा दाखल झाला आहे. त्यामुळे, शिस्तीचा भंग केल्यावरून पक्षातर्फे कारवाई केली जाणार का, याकडे सर्वांचे लक्ष लागले आहे. या संदर्भात भाजपचे शहराध्यक्ष योगेश गोगावले यांच्याशी संपर्क साधला असता, ‘या सर्व प्रकरणाची माहिती अद्याप माझ्यापर्यंत पोहोचलेली नाही. ही सर्व माहिती घेण्याचे काम सुरू आहे. पुढील दोन दिवसांत सर्व सविस्तर माहिती मला मिळेल. त्यानंतर, त्याबद्दल बोलता येईल’, अशी भूमिका त्यांनी मांडली.
महापालिका निवडणुकीदरम्यान गटबाजीला लगाम घालण्यात पक्षाला बऱ्यापैकी यश मिळाले होते. महापालिकेतील सत्तेची सूत्रे स्वीकारल्यानंतर अवघ्या महिन्याभरात घडलेल्या या घटनेमुळे पक्षातील गटबाजी पुन्हा उफाळून आली आहे. माजी गटनेते बीडकर यांच्या नियुक्तीवरून अजूनही पक्षातील निष्ठावंत कार्यकर्त्यांमध्ये नाराजी पसरली आहे. काही ज्येष्ठ कार्यकर्त्यांनी नव्या नेतृत्वाला संधी देण्याची गरज व्यक्त केली आहे.
मोबाइल अॅप डाउनलोड करा आणि राहा अपडेट
