म. टा. प्रतिनिधी, पुणे
स्वीकृत नगरसेवकपदासाठी संधी नाकारल्याच्या रागातून भारतीय जनता पक्षाच्या कार्यकर्त्यांनी महापालिकेत धुडगूस घालत तोडफोड केल्याप्रकरणी अखेर शिवाजीनगर पोलिस ठाण्यात गुन्हा दाखल झाला. सार्वजनिक मालमत्तेचे नुकसान केल्याप्रकरणी तसेच दंगल माजवल्याप्रकरणी गणेश घोष आणि त्यांच्या २५ कार्यकर्त्यांविरोधात गुन्हा दाखल करण्यात आला आहे.
पालिकेचे सुरक्षा अधिकारी रमेश कादबाने यांनी दिलेल्या तक्रारीनुसार हा गुन्हा दाखल करण्यात आला होता. शहर सरचिटणीस गणेश घोष आणि त्यांच्या समर्थकांनी महापालिकेतील पक्षाच्या कार्यालयात तुफान तोडफोड करून पक्षाच्या वरिष्ठ पदाधिकाऱ्यांनाच चोप दिला. पक्षाच्या कार्यकर्त्यांचा हा अवतार पाहून संपूर्ण महापालिका अवाक झाली होती. महापौर मुक्ता टिळक यांनी या घटनेची चौकशी करून अहवाल सादर करण्याचे आदेश मुख्य सुरक्षा अधिकारी संतोष पवार यांना देण्यात आले होते.
पवार यांनी अवघ्या चोवीस तासांच्या आत या घटनेचा अहवाल सादर केला आहे. तसेच, पवार यांनी शिवाजीनगर पोलिस ठाण्याला पत्र पाठवून या प्रकरणी गुन्हा दाखल करण्याची सूचनाही केली होती. त्यानुसार कादबाने यांनी तक्रार दिली असून, त्यानुसार घोष आणि त्यांच्या २५ कार्यकर्त्यांविरोधात गुन्हा दाखल केला आहे.
दरम्यान, पवार यांच्या अहवालानुसार घोष यांचे नाव स्वीकृत सदस्याच्या यादीतून वगळण्यात आल्याने ही घटना घडल्याचे निदर्शनास आले असल्याचे म्हटले आहे. मुख्य सुरक्षा अधिकारी आणि सुरक्षा विभागातील कर्मचाऱ्यांनी वेळीच सतर्कता दाखवल्याने कार्यकर्त्यांच्या अंसवेदनशीलतेला आळा घालणे शक्य झाले आणि मोठा अनर्थ टळला. तसेच, मुख्य सुरक्षा अधिकारी यांनी वेळीच पोलिसांना पाचारण करून स्थितीवर नियंत्रण आणले, असा दावा पवार यांनी आपल्या अहवालात केला आहे.
पोलिसांनी या घटनेचे ‘सीसीटीव्ही’ फुटेज पोलिसांना देण्यात आले आहेत. त्यामध्ये लॉबीमधील फोडतोड कैद झाली आहे. पोलिसांनाही प्राथमिक अहवालानुसार २५ जणांविरुद्ध गुन्हा दाखल केला आहे. तपासाअंती घोष यांच्याबरोबर कोण-कोण कार्यकर्ते होते, याची माहिती घेण्यात येईल आणि त्यांच्यावर गुन्हा दाखल करण्यात येईल, असे शिवाजीनगर पोलिसांनी सांगितले.
मोबाइल अॅप डाउनलोड करा आणि राहा अपडेट
