‘अनेक वर्ष सत्ता उपभोगूनही ज्या पक्षांनी काहीही काम केले नाही, निर्लज्जासारखे ते वर्षानुवर्षे नागरिकांच्या समोर जात आहेत. नागरिक त्यांना प्रश्न विचारत नाहीत. ही लोकशाही मला कळतच नाही, अशी अविकसित शहरे त्यांनाच लखलाभ,’ या शब्दात राज ठाकरे यांनी आपली हतबलता व्यक्त केली. त्याचवेळी ज्यांनी कामे केली नाहीत, त्यांना मते दिलीत आता मलाही संधी द्या, असे भावनिक आवाहनही त्यांनी पुणेकरांना केले.
पुण्यातील जाहीर सभेत राज ठाकरे यांनी पहिल्यांदाच पॉवरपॉइंट प्रेझेंटशनद्वारे मनसेची सत्ता असलेल्या नाशिक महापालिकेतील विकासकामांचे सादरीकरण केले. त्याचबरोबर पक्षाच्या पुण्यातील नगरसेवकांनी केलेली काही कामांचेही त्यांनी सादरीकरण केले. नाशिकमधले रस्ते, बोटॅनिकल गार्डन, कचरा प्रकल्प, मुकणे धरण पाइपलाइन आदी कामांचे दाखलेही त्यांनी दिले. पुण्यात सत्ता दिल्यास नाशिकच्या गोदापार्कच्या धर्तीवर पुण्याच्या नदीकाठाचा विकास करण्याची ग्वाहीही त्यांनी दिली.
‘शिवसेना आणि भाजपकडे राज्याबरोबरच मुंबई महापालिकेची सत्ता आहे. शिवसेनेने तर मुंबईत पाच वेळा सत्ता राखली आहे. गेल्या अनेक वर्षात त्यांनी काय कामे केली? त्यांना फक्त पैसे लाटण्यातच रस आहे. दरवेळी निवडणुकांच्या आधी तेच प्रश्न घेऊन निर्लज्जासारखे हे मतदारांसमोर जातात. विकासकामांच्या नावाखाली वारेमाप शब्द देतात,’ असेही ठाकरे म्हणाले. मतदारांनी सुशिक्षित नव्हे तर सुजाणही व्हायला हवे, असे सांगून ठाकरे म्हणाले की, ‘शहर अधिक चांगले कसे होईल, याचाच विचार माझ्या मनात असतो. तीच माझी पॅशन आहे. आपल्या शहराचे भवितव्य काय, आपल्या भावी पिढ्या इथे कशा जगणार, असा विचारही हे नागरिक प्रस्थापित पक्षांना, नेत्यांना करत नाहीत. तेव्हा ज्या अवस्थेत त्यांना शहरे मिळतात, ती त्यांनाच लखलाभ.’'
ठाकरे निवेदकाच्या शैलीत
राज ठाकरे म्हणजे मनसेची मुलुखमैदानी तोफ. आवेशपूर्ण भाषण करत उपस्थितांवर गारूड करण्याची राज ठाकऱ्यांची शैली. मात्र, गुरुवारच्या सभेत ठाकरे यांची शैली पूर्णतः वेगळी होती. एका निवेदकाच्या भूमिकेत शिरून ठाकरे यांनी आपल्या शिलेदारांनी केलेली कामे सादरीकरण्याच्या माध्यमातून उलगडली आणि अशाच पद्धतीने पुण्यातही काम करण्याची संधी देण्याची विनंतीही केली.
मोबाइल अॅप डाउनलोड करा आणि राहा अपडेट
