म. टा. प्रतिनिधी, पुणे
सध्या निवडणुकीची धामधूम सुरू असून मंगळवारी मतदान आहे. त्यामुळे शेतमाल बाजारात आणणे अशक्य असल्याने मार्केट यार्डात रविवारी फळभाज्यांची मोठी आवक झाली. आवक वाढल्याने लसणासह दोडका, वांगी, फ्लॉवर, कोबी, शेवगा, गाजरासह तोतापुरी कैरी स्वस्त झाली आहे. त्याशिवाय मेथी, कोथिंबीरचे दरही आवाक्यात आहेत.
मार्केट यार्डात परराज्यासह स्थानिक भागातून फळभाज्यांची मोठी आवक झाली. १७० ते १८० ट्रक फळभाज्यांची आवक झाली. परराज्यातून पंजाब, इंदूरहून मटारची ५ ते ६ ट्रक, गुजरात, कर्नाटकातून ५ ते ६ ट्रक कोबीची आवक झाली. कर्नाटकातून ५ ते ६ टेम्पोची तोतापुरी कैरीची आवक झाली. आंध्र प्रदेश, तामिळनाडूतून शेवग्याची ५ ते६ टेम्पो, कर्नाटक, गुजरातमधून हिरवी मिरचीची १४ ते १५ टेम्पोची आवक झाली आहे. राजस्थानमधून ९ ते १० ट्रक गाजराची आवक झाली आहे.
स्थानिक भागातील आल्याची साताऱ्याहून १५०० ते १६०० गोणींची आवक झाली आहे. पुणे विभागातून टोमॅटोची साडेपाच हजार पेटीची आवक झाली आहे. हिरवी मिरचीची ५ ते ६ टेम्पोची आवक झाली. फ्लॉवर आणि कोबीची प्रत्येकी १५ ते १६ टेम्पोची आवक झाली आहे. सिमला मिरची ८ ते १० टेम्पो, गाजराची ६ टेम्पोची आवक झाली. पुरंदर, वाई, सातारा भागातून मटारची ५० गोणींची आवक झाली आहे.
कांद्याची सव्वाशे ट्रक, बटाट्याची आग्रा, इंदूर, तळेगावहून ६० ट्रक तर मध्यप्रदेशातून लसणाची साडेपाच हजार गोणींची आवक झाली आहे. मेथीची सव्वा लाख तर कोथिंबीरची दोन लाख जुडीची आवक झाली आहे.
काही फळभाज्या स्वस्त झाल्या असल्या तरी सिमला मिरची, हिरवी मिरची, मटारची आवक घटल्याने त्याचे दर थोडेसे वाढले आहेत.
डाळिंबासह कलिंगडला वाढली मागणी
उन्हाच्या झळा लागल्याने आता बाजारात कलिंगड, डाळिंबाच्या फळांना मागणी वाढली आहे. बाजारात आवक ही मात्र मागणीच्या तुलनेत कमी आहे. त्यामुळे त्यांच्या दरात थोडीशी वाढ झाली आहे. कलिंगडची २५ ते ३० टेम्पोची आवक झाली असून किलोमागे दोन रुपयांनी दर वाढ झाली आहे. खरबूजाची आवक अद्यापही कमीच आहे. डाळिंबाची २० ते २५ टन एवढी आवक झाली असून त्याच्या दरात १० ते २० टक्क्यांनी वाढ झाली आहे. लिंबाची साडेचार हजार गोणींची आवक झाली. मोसंबीची ४० टन, संत्र्यांची ३० टन आवक झाली आहे. बोरांची पाचशेहून अधिक गोणीची आवक झाली. तर स्ट्रॉबेरीची सहा ते सात टन एवढी आवक झाली आहे. द्राक्षांची सातारा, तासगाव, सांगली येथून ७० ते ७५ टन एवढी आवक झाली आहे. सफरचंदाची दोन हजार पेटींची आवक झाली.
फुलांचे दर उतरले
निवडणुकांचे वातावरण, मंगळवारी मतदान त्यामुळे फूल उत्पादक शेतकऱ्यांनी रविवारी मोठ्या प्रमाणात फूल बाजारात फुले आणली. त्यामुळे आवक वाढल्याने फुलांच्या दरात घसरण आली. गेल्या आठवड्याच्या तुलनेत फुलांचे ४० टक्क्यांनी दर उतरले आहेत. मागणीत मात्र कोणतीही घट झालेली नाही. गुलछडीला १४०ते १८० रुपये असा दर मिळाला तर गुलाबाच्या १२ नगाच्या गड्डीला १० ते २० रुपये दर मिळाला.झेंडूला ६० ते१०० रुपये दर असून मोगऱ्याला एका किलोसाठी ३०० ते ५०० रुपये दर आहे.
आवक घटल्याने मासळीचे दर उतरले
सध्या निवडणुकीची धामधूम असतानाही मासळीची बाजारात आवक कमी आहे. मागणी अधिक असली, तरी आवक कमी असल्याने त्याच्या दरात पाच टक्क्यांनी घसरण झाली आहे. आंध्रहून रहूची १० टन एवढी आवक झाली आहे. खोल समुद्रातील मासळीची ७ ते ८ टन एवढी आवक झाली. तर खाडीची मासळीची ३०० ते ४०० किलो तर नदीच्या मासळीची ३०० ते ४०० किलोची आवक झाली आहे. मासळीला मागणी अधिक नसली तरी चिकनला अधिक मागणी झाली आहे. मागणीत २० टक्क्यांनी वाढ झाल्याचे चिकनच्या विक्रेत्यांनी सांगितले.
गहू, ज्वारीत मंदी, तांदळाची तेजी कायम
गहू, ज्वारीची नव्याने आवक होऊ लागल्याने त्याच्या दरात क्विंटलमागे प्रत्येकी १०० रुपयांची घट झाली आहे. तर, तांदळाची अपेक्षित आवक घटल्याने त्याच्या दरातील तेजी अद्यापही कायम आहे.
मार्केट यार्डातील घाऊक भुसार बाजारात नोटाबंदीनंतर आता निवडणुकीचा थोडासा परिणाम दिसून आला. त्यामुळे ग्राहकांकडून फारशी मागणी नाही. खाद्यतेल, पोहे, रवा, आटा, मैदा, मिरची, डाळी, कडधान्ये, मुरमुरे, गोटा खोबरे या वस्तूंच्या दरात कोणताही बदल झालेला नाही. त्यांचे सर्व दर स्थिर आहेत.
गव्हासह ज्वारीची नव्याने मोठ्या प्रमाणात आवक होण्यास सुरुवात झाली आहे. आवक फारशी होत नसली तरी त्याचा परिणाम म्हणून गव्हासह ज्वारीच्या दरात क्विंटलमागे प्रत्येकी १०० रुपयांनी दर उतरले आहेत. तूरडाळीचे उत्पादन वाढल्याने क्विंटलमागे २०० रुपयांनी दर उतरले आहेत. त्यामुळे तूरडाळ पुन्हा ७० रुपयांच्या आत त्याचे दर आले आहेत. नारळाची आवक वाढल्याने शेकड्यामागे ५० रुपयांनी दर उतरले आहेत. अन्य डाळींचे दर स्थिर आहेत. परंतु, बेसनाच्या दरात थोडीशी घसरण झाल्याचे व्यापारी सांगतात.
तांदळाची आवक गेल्या काही महिन्यांपासून घटत आहे. आवक वाढणे अपेक्षित असताना सुद्धा तांदळाची आवक न झाल्याने त्याचे दर तेजीत आहेत. त्यामुळे दरातील तेजी कायम आहे.
वस्तूंचे दर (क्विंटलमध्ये)
गहूः
लोकवान मिडियम २३५० ते २४५०
लोकवान बेस्ट २५०० ते २७००
लोकवान एक्स्ट्रा २८०० ते ३०००
ज्वारीः
गावरान बेस्ट ३२५० ते ३४००
मिडियम २७०० ते २८००
मिडियम बेस्ट ३००० ते ३२००
नारळः (शेकडा)
नवा माल ११२५ ते ११५०
पालखोल १३०० ते १४००
मद्रास २३०० ते २५००
कवठासह रताळी बाजारात
महाशिवरात्रीच्या उपवासासाठी गुलटेकडी मार्केट यार्डात कवठासह रताळ्यांची बाजारात आवक झाली आहे. निवडणुकीच्या वातावरणाचा कवठांच्या विक्रीला फटका बसला असून फारशी मागणी नसल्याचे शेतकऱ्यांचे म्हणणे आहे.
‘पाथर्डी, औरंगाबाद, बीड येथून सुमारे १००० ते १२०० पोती कवठांची आवक रविवारी बाजारात आवक झाली. दोन दिवस ही आवक सुरू राहील. आणखी आवक वाढण्याची शक्यता आहे. दुष्काळामुळे या वर्षी आवक कमी झाली आहे. तरीही, शेकड्याला २०० ते ३०० रुपये असा दर मिळाला आहे. त्यात सध्या निवडणुकांमुळे मागणी नसल्याने त्याचा फटका आम्हाला बसत आहे. आवक वाढली नाही, तर जादा दर मिळू शकतात. पण, आवक वाढल्यास दर खाली येतील,’ अशी शक्यता पाथर्डी तालुक्यातील कोरडगाव येथील शेतकरी दादा करंजावणे यांनी व्यक्त केली.
रताळ्याचीदेखील कर्नाटक, कराडमधून आवक झाली आहे. कर्नाटकच्या रताळ्याच्या १० किलोला १२० ते १३० रुपये, तर कराडच्या रताळ्यास १६० ते १८० रुपये दर मिळाला आहे. दोन्ही मिळून पाचशे ते सहाशे पोतींची बाजारात आवक झाली आहे. महाशिवरात्रीनिमित्त रताळ्यालादेखील मागणी होऊ लागल्याचे व्यापाऱ्यांनी सांगितले.
रामफळाची आवक बाजारात
बाजारात पुणे जिल्ह्यातील भागातून रामफळाची दोन टन एवढी आवक झाली आहे. त्याच्या एका किलोसाठी ४० ते १५० रुपये दर मिळाला आहे. रामफळाला सध्या गोव्यातून अधिक मागणी आहे. त्या पाठोपाठ मुंबई आणि पुण्यातील ज्यूस विक्रेत्यांसह फळ विक्रेत्यांकडून मागणी होत आहे.
लसणाची फोडणी झाली स्वस्त
प्रत्येक भाज्यांमध्ये फोडणीला टाकण्यात येणाऱ्या लसणाची फोडणी आता स्वस्त झाली आहे. मध्य प्रदेशातून मोठ्या प्रमाणात लसणाची आवक झाल्याने त्याचे दर कोसळले आहे. परिणामी, त्याचा फटका शेतकऱ्यांना बसण्याची चिन्हे आहेत. गेल्या आठवड्याच्या तुलनेत १० किलोमागे सुमारे ३०० रुपयांची घट रविवारी झाली आहे.
मध्य प्रदेशातून लसणाची साडेपाच हजार गोणींची आवक झाली. घाऊक बाजारात १० किलोला २०० ते ६०० रुपये दर मिळाला आहे. गेल्या आठवड्यात ४०० ते ९०० रुपये दर होता. आवक वाढल्याने त्याच्या दरात घट होत आहे. दर कोसळण्याच्या भीतीने शेतकरी मोठ्या प्रमाणात लसूण बाजारात आणत आहेत. या वर्षी गेल्या वर्षीच्या तुलनेत मध्य प्रदेशात लसणाचे लागवडीचे क्षेत्र दीड ते दोन टक्क्यांनी वाढले आहे. त्यामुळे आवक वाढण्यास मदत झाली आहे, अशी माहिती मार्केट यार्डातील लसणाचे व्यापारी विलास रायकर यांनी दिली.
सध्या लसणाला पुण्यासह शहरी ग्रामीण भागातून मागणी होत आहे. फोडणी स्वस्त झाल्याने दक्षिण भारतातातून देखील मागणी वाढली आहे. बाजारात सध्या येणारा लसूण ओला आहे. त्यामुळे त्याची निर्यात करता येत नाही. ओल्या लसणाचे वजन अधिक भरत असले, तरी बाजारात सुकलेला लसूण येत नाही तोपर्यंत निर्यात सुरू होणार नाही, अशी शक्यता व्यापारी व्यक्त करीत आहेत. सध्या उन्हाचा चटका वाढत आहे. त्यामुळे लसूण सुकण्यास मदत होणार आहे. दुसरीकडे त्याचे दर कमी मिळत आहेत. लसणाचा माल जागेवर पडून राहिल्यास गोणीचे वजन घटत आहे. त्यामुळे शेतकऱ्यांना दर कमी मिळणे आणि वजन कमी भरण्याचा दोन्ही प्रकारे तोटा सहन करावा लागत असल्याने त्याचा फटका बसत आहे, असे रायकर यांनी स्पष्ट केले.
राजस्थानातून लसणाची आवक
मध्य प्रदेशानंतर आता राजस्थान येथून लसणाची आवक होण्यास सुरुवात होण्याची शक्यता आहे. सध्या राजस्थानात लसूण काढणीचे सुरू आहे. त्यामुळे अल्प प्रमाणात आवक सुरू आहे. येत्या काही दिवसांत आवक वाढण्याची शक्यता आहे. दीड ते दोन हजार गोणींची आवक होण्याची शक्यता आहे. मध्य प्रदेश, राजस्थान दोन्ही ठिकाणची आवक वाढल्यास दर वाढतील की घटतील अशी शंका व्यापाऱ्यांना येऊ लागली आहे.
मोबाइल अॅप डाउनलोड करा आणि राहा अपडेट
