म. टा. प्रतिनिधी, पुणे
देशाचे संरक्षण करताना हौतात्म पत्करलेल्या सैनिकांच्या कुटुंबीयांना मदत करण्याची संधी सर्वसामान्य नागरिकांना उपलब्ध झाली आहे. त्यासाठी संरक्षण मंत्रालयाने पुढाकार घेऊन नवी दिल्लीस्थित सिंडिकेट बँकेत खास खाते उघडण्यात आले आहे. या खात्याच्या खरेखोटेपणाबद्दल सध्या सोशल मीडियात चर्चा सुरू आहे. हे खाते खरे असून नागरिकांना त्यात मदत जमा करता येईल, असा स्पष्ट निर्वाळा संरक्षण मंत्रालयाने दिला आहे.
संरक्षणमंत्री मनोहर पर्रीकर यांचे विशेष कार्यकारी अधिकारी उपेंद्र जोशी यांच्या स्वाक्षरीचे पत्र सोशल मीडियावर गाजत आहे. पत्रात संरक्षण मंत्रालयाने ‘आर्मी वेल्फेअर फंड बॅटल कॅज्युअल्टीज’ नावाने सिंडिकेट बँकेत खाते उघडल्याचे म्हटले आहे. या खात्याच्या सत्यतेविषयी चर्चा आहे. या पार्श्वभूमीवर ‘महाराष्ट्र टाइम्स’ने खुद्द उपेंद्र जोशी यांच्याशी संपर्क साधून खातरजमा केली.
‘देशासाठी हौतात्म्य पुकारलेल्या जवानांच्या कुटुंबीयांसाठी काहीतरी करता यावे, अशी भावना जनतेच्या मनात आहे. त्यातूनच असे खाते उघडण्याची मागणी केली जात होती. त्यानुसार हे खाते उघडण्यात आले आहे. या खात्यात जमा होणारी रक्कम फक्त हुतात्मा झालेल्या जवानांच्या कुटुंबीयांना आर्थिक मदत देण्यासाठी वापरली जाईल,’ असे जोशी यांनी स्पष्ट केले.
उरी येथील दहशतवाद्यांच्या हल्ल्यात १९ जवान हुतात्मा झाले होते. त्यानंतर देशभरात पाकिस्तान आणि दहशतवाद्यांविरोधात तीव्र संतापाची लाट पसरली होती. त्याचवेळी या खात्याबद्दल माहिती देणारे विविध भाषांमधील मेसेज सोशल मीडियावर फॉरवर्ड केले जात होते. मात्र, अनेकदा त्यातील बँकेचा खाते क्रमांक बदलण्यात येत होता. किंवा त्यासंबंधीच्या मजकुरातही बदल केला जात होता. फक्त हुतात्मा जवानांच्या कुटुंबीयांच्या आर्थिक मदतीसाठी असलेल्या या खात्यात लष्कराला आवश्यक अत्याधुनिक शस्त्रास्त्रांसाठीही रक्कम जमा करण्याचे आवाहन काहींनी स्वतःहून जोडले होते. नागरिकांनी दररोज एक रुपया जरी या खात्यात जमा केला, तरी वर्षभरात सर्व हुतात्मा जवानांच्या कुटुंबीयांना भरघोस मदत मिळेलच, परंतु, लष्करासाठी मोठा निधी मिळून कमतरताही भरून निघेल, असा गैरसमज पसरविण्यात येत होता.
प्रत्यक्षात हे खाते फक्त हुतात्मा जवानांच्या कुटुंबीयांच्या मदतीसाठीच आहे. लष्करी सामुग्रीची स्वतंत्र तरतूद बजेटमध्येच केली जाते; ती पुरेशी आहे. या खात्यात जमा होणाऱ्या निधीचा वापर होत नाही, असे संरक्षण मंत्रालयातील वरिष्ठ सूत्रांनी स्पष्ट केले.
---------------------
खात्याबाबत खातरजमा करा
‘संरक्षण मंत्रालयातर्फे हुतात्मा जवानांच्या परिवाराला आर्थिक मदत करण्यासाठीच हे खाते उघडण्यात आले आहे. ज्यांना या खात्यात पैसे जमा करण्याची इच्छा आहे, अशा व्यक्तींनी लष्कराच्या http://indianarmy.nic.in या वेबसाइटवरील आर्मी बॅटल कॅज्युअल्टी फंड या लिंकवर क्लिक करून खाते क्रमांक, आयएफएसी कोड व इतर माहिती तपासून घ्यावी. त्यानंतरच पैसे जमा करावेत. सोशल मीडियावर फिरत असलेल्या काही मेसेजमध्ये खाते क्रमांक तसेच बँकेचे नाव बदलले असल्याने दक्षता बाळगावी,’ असे आवाहन संरक्षणमंत्र्यांचे विशेष कार्यकारी अधिकारी उपेंद्र जोशी यांनी केले आहे.
मोबाइल अॅप डाउनलोड करा आणि राहा अपडेट
