म. टा. प्रतिनिधी, पिंपरी
पिंपरी-चिंचवड महापालिकेच्या २०१७ मध्ये होणाऱ्या निवडणुकीसाठी प्रारूप प्रभाग आराखडा तयार करताना भारतीय जनता पक्षाचा हस्तक्षेप झाला असून, ही रचनाच सदोष असल्याचा आरोप राष्ट्रवादी काँग्रेसने सोमवारी केला. याबाबत शहानिशा करून आराखड्यात योग्य बदल करावेत, अशी मागणी पक्षाच्या प्रमुख पदाधिकाऱ्यांनी राज्य निवडणूक आयोगाकडे केली आहे.
राष्ट्रवादी काँग्रेसचे शहराध्यक्ष संजोग वाघेरे-पाटील, प्रवक्ते योगेश बहल, पक्षनेत्या मंगला कदम यांनी निवडणूक आयोगाकडे केलेल्या तक्रारींबाबत पत्रकारांना माहिती दिली. ते म्हणाले, ‘प्रभाग रचना आराखडा तयार करताना राज्य निवडणूक आयोग गुगल मॅपिंगच्या सहाय्याने नदी, लोहमार्ग, नाले, मोठे रस्ते आणि सलगता या भौगोलिक परिस्थितीचा विचार करून प्रभाग रचना तयार करते. परंतु, शहरातील भाजपचे पदाधिकारी आणि कार्यकर्ते हस्तक्षेप झाल्यासारखी वर्तणूक करीत आहेत. हा प्रभाग असा केला, हा प्रभाग असा तोडला...आता सत्ता आमची आहे... आयुक्त आमचे आहेत... जिल्हाधिकारी आणि राज्य सरकारसुद्धा आमचे आहे. कोणाची कशी वाट लावायची, हे आम्ही ठरवू असे जाहिररीत्या सांगत आहेत. ही खेदाची बाब आहे. याबाबतचे पुरावे आमच्याकडे असून, भाजपचे पदाधिकारी उघडपणे काही बाबी सांगत आहेत. त्यामुळे निवडणूक आयोग स्तरावर शहानिशा करून खातरजमा व्हावी’.
नवीन प्रभाग रचनेनुसार भाजपचे कार्यकर्ते प्रचार करू लागले आहेत. गणेशोत्सवाच्या काळात नवीन भागांतील गणपती मंडळांच्या वर्गणीच्या पावत्यादेखील फाडल्या आहेत. चिंचवडच्या विद्यमान आमदारांनी त्यांच्या सोयीप्रमाणे प्रभाग रचना तयार केली आहे. त्यावरून प्रभाग रचना अव्यवहार्य आणि वस्तुनिष्ठ वाटत नाही. सदरची नवीन प्रभाग रचना दबावाखाली करण्यात आली, हे उघड गुपित आहे, असाही आक्षेप या पदाधिकाऱ्यांनी नोंदविला.
या महापालिकेने पूर्वी राज्य निवडणूक आयोगाच्या मार्गदर्शक तत्त्वाचा अवलंब करून बनविलेले सर्व नकाशे बाजूला ठेवून राज्याचे मुख्यमंत्री देवेंद्र फडणवीस यांच्या आदेशान्वये प्रभाग प्रारूप आराखड्याच्या सॉफ्ट कॉपीवर स्वाक्षरी घेतली आहे, असाही गंभीर आरोप या वेळी करण्यात आला. प्रारूप आराखड्यात भरपूर त्रुटी असून, सदोष प्रभाग रचना करण्यात आली आहे. याबाबतची शहानिशा करून आवश्यक बदल करावेत, अन्यथा कोर्टात याचिका दाखल करण्याचा इशारा या पदाधिकाऱ्यांनी दिला आहे. देशाचे मुख्य निवडणूक आयुक्त डॉ. नसीम झैदी यांच्याकडेही लेखी तक्रार करण्यात आली आहे.
प्रशासन-भाजप संगनमत?
शहराच्या प्रारूप प्रभाग रचनेत भारतीय जनता पक्षाचा हस्तक्षेप होत असल्याच्या तक्रारी राष्ट्रवादी काँग्रेसने नऊ सप्टेंबर, १६ सप्टेंबर आणि २२ सप्टेंबर रोजी निवडणूक आयोगाकडे केल्या आहेत. त्यानंतर गोपनीय आराखडा फुटलाच कसा? असा प्रश्न उपस्थित करून राष्ट्रवादी काँग्रेसने महापालिका प्रशासन आणि भारतीय जनता पक्ष यांच्यात संगनमत झाल्याचा गंभीर आरोप केला आहे. प्रारूप आराखड्याला अंतिम मंजुरी मिळण्यापूर्वीच तो फुटल्याचा प्रकार महापालिकेच्या निवडणुकीच्या इतिहासात प्रथमच घडल्याचेही निदर्शनास आणून देण्यात आले.
‘गुगल काय? भूगोलचीच वाट!’
प्रारूप प्रभाग आराखडा तयार करताना गुगल मॅपिंगचा आधार घ्यावा, असे निर्देश देण्यात आले होते. परंतु, पिंपरी-चिंचवडमध्ये गुगलच काय तर संपूर्ण भूगोलाचीच वाट लावली आहे, असा आरोप राष्ट्रवादी काँग्रेसच्या पदाधिकाऱ्यांनी केला. पालिकेच्या निवडणूक विभागातील एका सेवानिवृत्त अधिकाऱ्याने भाजला सोयीचे ठरेल, अशा पद्धतीने प्रारूप आराखडा तयार केला असून त्यासाठी माहिती अधिकारामध्ये माहिती घेऊन कायम त्रास देणाऱ्या आणि ब्लॅकमेल करणाऱ्या व्यक्तीची मदत घेण्यात आली आहे, असेही या पदाधिकाऱ्यांनी स्पष्ट केले.
मोबाइल अॅप डाउनलोड करा आणि राहा अपडेट
