फ्लेक्स, बॅनरला नवी 'डेडलाइन'
म. टा. प्रतिनिधी, पुणे
अनधिकृत फ्लेक्स, बॅनर, होर्डिंग काढून शहराचे विद्रुपीकरण थांबविण्यासाठी महापौरांनी प्रशासनाला २१ एप्रिलची नवी डेडलाइन दिली आहे. यापूर्वीच्या अनेक महापौरांनी दिलेले अनधिकृत फ्लेक्स, बॅनरवर कारवाई करण्याचे आदेश केवळ कागदावरच राहिले असताना, आता या कालावधीत तरी शहराचे विद्रुपीकरण थांबणार का, अशी विचारणा केली जात आहे; तसेच मुंबई हायकोर्टाचे आदेश असतानाही, शहरात सर्वत्र सुरू असलेल्या फ्लेक्सबाजीला आळा घालण्यासाठी नेमका कोणता मुहूर्त मिळणार, असा प्रश्न उपस्थित केला जात आहे.
शहराच्या सर्व भागांतील अनधिकृत फ्लेक्स, बॅनरवर होणाऱ्या कारवाईचा आढावा महापौर प्रशांत जगताप यांनी गुरुवारी घेतला. महापौरांनी घेतलेल्या बैठकीला सर्व क्षेत्रीय कार्यालयांचे सहायक आयुक्त उपस्थित होते. शहराचे विद्रुपीकरण करणाऱ्या सर्वांवर पुढील दोन आठवड्यांत कारवाई करण्याचे आदेश देतानाच, २१ एप्रिलनंतर शहराच्या मुख्य रस्त्यांसह लहान-मोठ्या रस्त्यांवरही अनधिकृत फ्लेक्स, बॅनर दिसता कामा नयेत, असे महापौरांनी सुनावले.
माजी महापौर दत्तात्रय धनकवडे यांनीही शहराचे विद्रुपीकरण थांबविण्यासाठी वारंवार कारवाई करण्याच्या सूचना दिल्या होत्या. महापौरांनी आदेश दिल्यानंतर पालिकेच्या परवाना व आकाशचिन्ह विभागातर्फे तात्पुरत्या स्वरुपात एक-दोन दिवस कारवाई केली जाते; परंतु त्यानंतर शहरात पुन्हा सर्वत्र फ्लेक्स आणि बॅनर झळकू लागतात. वास्तविक, मुंबई हायकोर्टाने अनधिकृत फ्लेक्स आणि बॅनर लावणाऱ्यांविरुद्ध गुन्हे दाखल करून त्यांच्याकडून दंड वसूल करण्याची सक्त ताकीद महापालिकांना दिली आहे. तरीही फ्लेक्स, बॅनरवरील कारवाईबाबत टाळाटाळच केली जात असल्याचे चित्र दिसून येत आहे. त्यामुळे महापौरांनी दिलेल्या नव्या डेडलाइनमध्ये तरी शहरातील फ्लेक्स, बॅनरचे विद्रुपीकरण दूर होणार का, याबाबत साशंकता व्यक्त केली जात आहे.
काही दिवसांपूर्वीच महापालिकेने सर्व राजकीय पक्षांना अनधिकृत फ्लेक्स, बॅनर लावाल; तर कोर्टाच्या दंडासह इतर परिणामांना सामोरे जावे लागेल, असा इशारा देणारे पत्रच लिहिले होते. तरीही त्यानंतर परिस्थितीत कोणताही फरक पडलेला नसून, शहराच्या सर्व भागांत फ्लेक्स, बॅनरचा सुळसुळाट कायमच आहे.
...................
शहराध्यक्षांच्या सल्ल्याला केराची टोपली
भारतीय जनता पक्षाचे नवनिर्वाचित शहराध्यक्ष योगेश गोगावले यांनी फ्लेक्स, बॅनर लावू नयेत, असे आवाहन पहिल्याच दिवशी कार्यकर्त्यांना केले होते. अनधिकृत फ्लेक्स, बॅनरप्रकरणी कोर्टाकडून कोणत्याही परिस्थितीत भाजपच्या कार्यकर्त्यांना दंड झाल्याचे चालणार नाही, अशी तंबीही त्यांनी दिली होती. तरीही भाजपच्या अनेक कार्यकर्त्यांनी आणि नगरसेवकांनीही शहराध्यक्षांच्या सूचनेला हरताळ फासल्याचे दिसून येत आहे. अनेक भागांमध्ये भाजपच्या पदाधिकारी, कार्यकर्त्यांनी फ्लेक्स, बॅनर लावले असून, शहराध्यक्षांच्या सल्ल्याला केराची टोपली दाखवली आहे.
मोबाइल अॅप डाउनलोड करा आणि राहा अपडेट
