खरेदी, स्नेहभोजनातून सण उत्साहात साजरा; सोनेखरेदीला मुरड
म. टा. प्रतिनिधी, पुणे
गुढीपाडव्याचे औचित्य साधून काहींनी कार, तर काही दुचाकी घेतल्या, तर घरातील इलेक्ट्रॉनिक वस्तू घेण्याचाही मुहूर्त अनेकांनी साधला. सकाळी गुढीची मनोभावे पूजा, दुपारी गोड पदार्थांच्या जेवणावर ताव अन् सायंकाळी खरेदीचा आनंद लुटून पुणेकरांनी गुढीपाडवा उत्साहात साजरा केला. सराफांच्या संपामुळे सोने खरेदीला मात्र अनेकांना मुरड घालावी लागली.
हिंदू नववर्षाच्या पहिला दिवस अर्थात गुढीपाडवा हा साडेतीन मुहूर्तांपैकी एक असल्याने पुणेकरांनी खरेदीसाठी बाजारपेठेत गर्दी केली होती. वाहनांबरोबरच मोबाइल, इलेक्ट्रॉनिक वस्तूंची मोठ्या प्रमाणात खरेदी केली. गुढीपाडव्यानिमित्त सकाळी घराघरांमध्ये गुढी उभारण्यात आल्या. सण आणि सुट्टी असल्याने दुपारच्या जेवणाला गोड पदार्थांचे बेत रचले होते. त्यामुळे मिठाईच्या दुकानांमध्ये सकाळपासूनच श्रीखंड, अंगूर रसमलई, जिलेबी, गुलाबजामच्या खरेदीसाठी ग्राहकांची वर्दळ होती. आंब्याचे आकर्षण असले, तरी त्यांच्या किमती अद्याप सर्वसामान्यांच्या आवाक्यात आलेल्या नाहीत. त्यामुळे बहुतांश नागरिकांनी इतर पदार्थांचीच नैवेद्यासाठी निवड केली. दुपारी कडक ऊन असल्याने रस्त्यावरची गर्दी ओसरली आणि संध्याकाळी पाचनंतर लोकांची पावले बाजारपेठांकडे वळाली. सणाच्या निमित्ताने वेगवेगळ्या शोरूमध्येही मोफत भेटवस्तू, लकी ड्रॉ, सवलत अशा विविध आकर्षक योजना जाहीर केल्या होत्या. त्यामुळे इलेक्ट्रॉनिक वस्तूंच्या दुकानांमध्ये गर्दी होती. फ्रीज, वॉशिंग मशीन, टीव्ही, कूलर यांसह विविध वस्तूंना चांगली मागणी होती.
वाहनांच्या दुकानात मात्र सकाळीच जास्त गर्दी पाहायला मिळाली. अनेक नागरिकांनी दुचाकी आणि चारचाकी गाड्या खास गुढीपाडव्याचा मुहूर्त साधून खरेदी केल्या. गुढीपाडव्याच्या निमित्ताने गेल्या सात दिवसांत पाच हजार वाहनांची नोंद झाली आणि नागरिकांनी खरेदी मात्र शुक्रवारी केली. एरव्ही या दिवशी सोने खरेदीसाठीही सराफांच्या दुकानांमध्ये ग्राहकांची प्रचंड गर्दी असते. गुढीपाडवा आणि सोने असे समीकरणच जुळलेले आहे; मात्र सध्या सराफांनी आंदोलनामुळे दुकाने बंद ठेवल्यामुळे ग्राहकांना सोने खरेदीचा मुहूर्त साधता आला नाही. दुकान बंद आहे, हे माहिती असतानाही अनेक ग्राहक या दुकानांच्या बाहेर घुटमळताना बघायला मिळाले.
.....................
चौकट
गुढीपाडव्यानिमित्त मिरवणुका
गुढीपाडवा म्हणजे हिंदू नववर्षाची सुरुवात असल्याने शहरातील विविध संस्था-संघटनांतर्फे मिरवणूक आणि सांस्कृतिक कार्यक्रमांचे आयोजन केले होते. भारतीय विद्यार्थी सेनेच्या निमंत्रक मनीषा धारणे यांच्यातर्फे पाडव्यानिमित्त पुस्तकांची गुढी उभारण्यात आली. वरिष्ठ पोलिस अधिकारी तुषार दोशी आणि शिवसेना उपशहरप्रमुख विशाल धनवडे यांच्या हस्ते या गुढीचे उद्घाटन झाले. या गुढीवर लेखकांच्या पुस्तकांच्या मुखपृष्ठांची साडी आणि श्लोकांच्या पुस्तकांची गाठी आणि लेखकांचे फोटो लावले होते. या वेळी ज्येष्ठ व्यंगचित्रकार मंगेश तेंडुलकर, राधिका हरिश्चंद्रे, ज्योती साळुंखे, चंदन साळुंखे आदी उपस्थित होते.
माजी उपमहापौर आबा बागूल आणि पुणे जिल्हा काँग्रेस कमिटीचे सरचिटणीस अमित बागूल यांच्यातर्फे हुतात्मा कर्नल संतोष महाडिक यांच्या सातारा जिल्ह्यातील पोगरवाडीच्या घरी शौर्य गुढी उभारण्यात आली. यंदा या उपक्रमाचे तिसरे वर्ष आहे. या वेळी महाडिक यांचे कुटुंबीय उपस्थित होते. या वेळी देशाच्या रक्षणासाठी बलिदान देणाऱ्या शहीद जवानांच्या स्मृतींना उजाळा दिला. अमित बागूल यांच्यासह धनंजय कांबळे, सागर आरोळे, भरत तेलंग, बाबालाल पोलके आदी कार्यकर्ते उपस्थित होते.
भारतीय जनता पक्षातर्फे प्रत्येक प्रभागामध्ये कार्यकर्त्यांनी निरनिराळे चित्ररथ केले होते. केंद्रात पंतप्रधान नरेंद्र मोदी यांनी आणि राज्य पातळीवर मुख्यमंत्री देवेंद्र फडणवीस यांच्या सरकारने राबवलेल्या विविध योजनांचा आढावा या चित्ररथांमध्ये घेण्यात आला होता. आमदार प्रा. मेधा कुलकर्णी यांनी या उपक्रमाचे नियोजन केले होते. चित्ररथांमध्ये स्वच्छ भारत समर्थ भारत, झाडे लावा झाडे जगवा, जलयुक्त शिवार, भारतरत्न डॉ. बाबासाहेब आंबेडकर आणि सामाजिक समरसता, श्रेष्ठ भारत रथ, स्वातंत्र्यवीर सावरकर, पर्यावरण, बेटी बचाव बेटी पढाव अशा विविध विषयांवर आधारित देखावे सादर करण्यात आले होते.
....................
...............
तरुणाईची पुस्तक दिंडी
मांगल्याचे प्रतीक असणारी गुढी उभारून दिलेला सामाजिक संदेश... विविध क्षेत्रांतील मान्यवरांचा सहभाग असलेली पुस्तक दिंडी...पारंपरिक वेशात सहभागी झालेली तरुणाई आणि पाणी जीवन आहे, असे सांगत पाणी बचतीची गुढी घेऊन सामाजिक संदेश देणाऱ्या चिमुकल्या अशा उत्साही वातावरणात शुक्रवारी पुस्तक दिंडी निघाली. 'सण करू साजरे, माध्यम जरा वेगळे' हे ब्रीद तरुणाईने गुढीपाडव्यानिमित्त या उपक्रमातून जपले.
गुढीपाडव्याच्या परंपरेला सामाजिकतेची जोड देत 'पाणी वाचवा' असा संदेश देऊन मैत्र युवा फाउंडेशनने गुढीपाडवा उत्साहात साजरा केला. फाउंडेशनतर्फे 'गुढी पाणी बचतीची, गुढी परंपरेची, गुढी साहित्याची, गुढी मांगल्याची, गुढी संस्काराची' असा संदेश देत पुस्तक दिंडीचे आयोजन करण्यात आले. या वेळी ज्येष्ठ व्यंगचित्रकार मंगेश तेंडुलकर, शि. द. फडणीस, संतसाहित्याचे गाढे अभ्यासक डॉ. रामचंद्र देखणे, ज्येष्ठ शिक्षणतज्ज्ञ डॉ. न. म. जोशी, महाराष्ट्र साहित्य परिषदेचे कार्याध्यक्ष मिलिंद जोशी, एअरमार्शल (निवृत्त) भूषण गोखले, चारुहास पंडित, ढोल-ताशा महासंघाचे अध्यक्ष पराग ठाकूर, डॉ. राजन नाईक, 'बीएमसीसी'चे प्राचार्य डॉ. चंद्रकांत रावळ, स्वानंद लोमटे, चिंतामणी पटवर्धन, कल्पना वाघ, सुचेता फासे, तेजस्वी सेवेकरी, अश्विनी नायर, फाउंडेशनचे अध्यक्ष संकेत देशपांडे या वेळी उपस्थित होते.
उपक्रमाचे यंदा दहावे वर्ष होते. कोथरूड बालसदन संस्थेतील अनाथ मुलींच्या हस्ते गुढीचे पूजन करण्यात आले. बाजीराव रस्त्यावरील आचार्य अत्रे सभागृहापासून सुरू झालेल्या दिंडीत अश्वराज बँड, फुलांनी सजवलेली पालखी आणि तरुणाईचा मोठा सहभाग होता. महाराणा प्रताप उद्यानासमोर दिंडीचा समारोप झाला. तेंडुलकर म्हणाले, 'केवळ सण-उत्सवापुरतेच नव्हे, तर दररोज चांगले काम करण्याचा संकल्प आपण केला पाहिजे.'
मोबाइल अॅप डाउनलोड करा आणि राहा अपडेट
