कमाल तापमानात झालेली लक्षणीय वाढ आणि त्याच वेळी किमान तापमान मात्र कमी असे चित्र असल्याने शहरात सध्या दुपारी उन्हाळा आणि रात्री हिवाळा असे वातावरण आहे. गेल्या आठवड्यापर्यंत दुपारीही गारठा अनुभवणाऱ्या पुणेकरांना गेले दोन-तीन दिवस दुपारी पंखे लावायची वेळ आली आहे. गेल्या आठवड्यात कमाल तापमान २५ ते २६ अंश सेल्सियसच्या दरम्यान होते; तर किमान तापमान सात ते नऊ अंशांच्या दरम्यान होते. या आठवड्याच्या सुरुवातीपासून कमाल तापमानात वाढ झाली आहे. गेले दोन दिवस तर पारा ३४ अंश सेल्सियसपर्यंत गेला आहे. त्यामुळे दिवसा प्रचंड ऊन कमी जाणवत आहे. त्याच वेळी किमान तापमान मात्र दहा ते अकरा अंशांवर स्थिरावल्याने रात्रीचा गारठा कमी झालेला नाही. कमाल आणि किमान तापमानात तब्बल २४ अंशांचा फरक आहे. पुण्यात शुक्रवारीही कमाल तापमान ३४.२ अंश सेल्सियस, तर किमान तापमान १०.९ अंश सेल्सियस इतके नोंदवले गेले. शहरात पुढील दोन दिवसांतही कमाल तापमान ३३ अंश सेल्सियस, तर किमान तापमान ११ अंश सेल्सियस इतके राहील, असा हवामान विभागाचा अंदाज आहे. राज्यात सर्वांत कमी तापमान जळगाव येथे ९.४ अंश सेल्सियस इतके नोंदवले गेले. कोकण आणि विदर्भातही किमान तापमानात घट झाली आहे.
मोबाइल अॅप डाउनलोड करा आणि राहा अपडेट
