पिंपरी-चिंचवड महापालिकेतील राष्ट्रवादी काँग्रेसचे नगरसेवक अविनाश टेकवडे यांच्या खून प्रकरणातील नऊ जणांविरोधात 'मोक्कां'तर्गत कारवाईचे आदेश गुन्हे शाखेचे अप्पर पोलिस आयुक्त सी. एस. वाकडे यांनी दिले आहेत.
अमोल विठ्ठल वहिले (२६, रा. वहिले चाळ, चिंचवड), किशोर उर्फ गुल्या विजय भिगवणकर ऊर्फ कुंभार (२०, रा. रुपीनगर, निगडी), बालाजी ऊर्फ बाल्या दामोदर शिंदे (२०, रा. मोहननगर, चिंचवड), नरेश रामगोपाल वर्मा (३२, रा. चिंचवड स्टेशन), आकाश अनिल पोटघन (२०, रा. मोहननगर, चिंचवड), इंद्रास युवराज पाटील (३८, रा. पूर्णानगर, चिखली रोड), सुशील तानाजी गायकवाड (२८, रा. दत्तनगर, थेरगाव), आनंद नामदेव दणाणे (२४, रा. विद्यानगर, चिंचवड) व ओंकार राजू चौधरी (१९, रा. मोहननगर, चिंचवड) असे 'मोक्का'तर्गत कारवाई करण्यात आलेल्या गुन्हेगारांची नावे आहेत.
टेकवडे यांचा ३ सप्टेंबर २०१५ रोजी खून झाला होता. त्या आरोपावरून अमोल वहिले व त्याच्या साथीदारांना अटक करण्यात आली आहे. हा गुन्हा वहिले व त्याच्या साथीदारांनी संघटितपणे केल्याचे निष्पन्न झाले होते. वहिले व त्याच्या साथीदारांनी टोळीच्या आणि स्वत:च्या फायद्यासाठी पिंपरी-चिंचवडमध्ये दहशत निर्माण करून टोळीचे वर्चस्व स्थापन करण्याच्या उद्देशाने संघटितपणे गुन्हे केल्याचे उघडकीस आले आहे. त्यामुळे अप्पर पोलिस आयुक्त वाकडे यांनी वहिले व त्याच्या टोळीतील साथीदारांविरोधात महाराष्ट्र संघटित गुन्हेगारी नियंत्रण कलमाखाली कारवाई केली आहे
मोबाइल अॅप डाउनलोड करा आणि राहा अपडेट
