राष्ट्रीय संरक्षण प्रबोधिनीच्या (एनडीए) संरक्षक भिंतीपासून तीन किलोमीटर अंतरापर्यंतच्या गावांमधील बांधकामांच्या उंचीवर निर्बंध आणण्याच्या नोटिफिकेशनला आव्हान देण्यात येणार आहे. तसेच एनडीएपासून वीस किलोमीटर हवाई अंतरातील बांधकामांना परवानगी देण्यापूर्वी लष्कराची 'ना हरकत' घेण्यासंदर्भात भारतीय विमानतळ प्राधिकरण आणि भारतीय हवाई दलाकडून मार्गदर्शन मागविण्यात येणार आहे. जिल्हाधिकारी सौरव राव यांनी पत्रकारांना मंगळवारी ही माहिती दिली. लष्करी विद्यार्थ्यांच्या प्रशिक्षणासाठी शिवणे गावाजवळ एनडीएने विमानतळ उभारले आहे. या विमानतळाच्या धावपट्टीच्या विस्तारीकरणाचे काम सध्या सुरू असून विस्तारीकरणानंतर ही धावपट्टी पाच हजार फूट लांब व शंभर मीटर रूंद होणार आहे. या धावपट्टीवर विमानांचे टेकऑफ व लँडींग होण्यात अडथळे येऊ नयेत यासाठी एनडीएने त्यांच्या संरक्षक भिंतीपासून तीन किलोमीटच्या अंतरातील वारजे, माळवाडी, शिवणे, उत्तमनगर व कोंढवे-धावडे या गावांतील इमारतींच्या उंचीवर निर्बंध आणण्याचे पत्र जिल्हाधिकाऱ्यांना दिले आहे. त्यासंदर्भात काढलेल्या नोटिफिकेशनमध्ये वारजे आणि माळवाडी भागात १५ मीटरपेक्षा उंच इमारतीला परवानगी दिली जाणार नाही. तसेच शिवणे, उत्तमनगर, कोंढवे-धावडे या गावांमध्ये ४५ मीटरपेक्षा उंच इमारत बांधण्यास मनाई येणार आहे. याशिवाय, या गावांमध्ये नव्या बांधकामांना परवानगी देण्यापूर्वी एनडीएकडून ना हरकत (एनओसी) घ्यावी लागणार आहे. एनडीएच्या पत्रानुसार पुणे महापालिका, पुणे महानगर प्रदेश विकास प्राधिकरणला (पीएमआरडीए) आता बांधकाम परवानगी देताना एनडीएची एनओसी घेण्याबाबत जिल्हाधिकारी कार्यालयाने कळविण्यात आले आहे. मात्र, एनडीएच्या संरक्षक भिंतीपासून तीन किलोमीटर अंतरातील गावांमध्ये बांधकामांच्या उंचीवर निर्बंध आणण्याच्या नोटिफिकेशनला आव्हान देण्यात येणार आहे. लोहगाव विमानतळाची धावपट्टी वीस हजार फुटांची असताना फक्त ९०० मीटपर्यंत बांधकामांच्या उंचीवर मर्यादा आहेत. त्यामुळे एनडीएने एवढ्या मोठ्या अंतरावर निर्बंध घालण्यात अर्थ नसल्याचे जिल्हाधिकारी राव यांनी स्पष्ट केले. लोहगाव विमानतळासाठी भारतीय हवाई दलाचे असलेले धोरण स्वीकारण्याबाबत आपण एनडीएला सूचविले आहे. तसेच एनओसी देण्याबाबत कालमर्यादा ठरवून द्यावी लागेल असे सांगण्यात आले आहे. विमानतळालगत बांधकाम परवानगीवर निर्बंध आणायचे असतील तर वर्क्स ऑफ डिफेन्स अॅक्टनुसार संबंधित जागामालकांना मोबदला द्यावा लागणार आहे. हा विषय फारच गुंतागुंतीचा असल्याचे लष्करी अधिकाऱ्यांसमवेत येत्या पंधरा दिवसात बैठक घेणार असल्याचेही जिल्हाधिकाऱ्यांनी सांगितले. हवाई दलाचे मार्गदर्शन महत्त्वाचे एनडीएच्या विमानतळापासून किती उंचीवर बांधकाम परवानगी द्यायची याची माहिती नोटिफिकेशनच्या शेड्यूल दोनमध्ये देण्यात आली आहे. तसेच झाडे लावताना त्याची किती उंची असावी याचाही समावेश यात आहे. विमानतळापासून वीस किलोमीटरच्या हवाई अंतराच्या त्रिज्येत हे निर्बंध लागू आहेत. पुणे शहरासह पीएमआरडीएमधील मोठ्या परिसरात हे निर्बंध लागू होणार आहेत. त्यामुळे शहराच्या विकासावर परिणाम होऊ शकतो. त्यासाठी भारतीय विमानतळ प्राधिकरण व भारतीय हवाई दलाकडून मार्गदर्शन मागविण्यात येणार असल्याचे जिल्हाधिकारी राव यांनी सांगितले.
मोबाइल अॅप डाउनलोड करा आणि राहा अपडेट