मध्य रेल्वेच्या मेगा ब्लॉकमुळे शनिवारी मध्यरात्रीपासून रविवारी सायंकाळपर्यंत बंद असलेली पुणे-मुंबई दरम्यानची रेल्वे वाहतूक सोमवारी पूर्ववत झाली. त्यामुळे सोमवारी सकाळपासून नेहमीप्रमाणे रेल्वे स्टेशन गजबजून गेले होते.

मुंबईतील भायखळा ते छत्रपती शिवाजी टर्मिनस दरम्यान असलेला ब्रिटिशकालीन हँकॉक पूल पाडण्यात आला. रविवारी सायंकाळपर्यंत ते काम सुखरूपपणे पूर्ण झाल्यानंतर तेथील लोकल सेवा सुरू झाली. तर, रात्री पुण्याहून जाणाऱ्या लांब पल्ल्याच्या गाड्या उशिराने सोडण्यास सुरुवात झाली. सोमवारी सकाळी सिंहगड एक्स्प्रेस, डेक्कन क्वीन व प्रगती सुपरफास्ट एक्स्प्रेस या चाकरमान्यांच्या समजल्या जाणाऱ्या नेहमीप्रमाणे गर्दीने फुलून गेल्या होत्या. एसटी महामंडळाच्या बस नेहमीप्रमाणे सोडण्यात येत होत्या. त्यामुळे पुणे-मुंबई दरम्यानची वाहतूक पूर्ववत व विनाअडथळा सुरू होती.

दरम्यान, पुणे विभागात लोणी आणि उरुळीकांचन स्टेशन दरम्यान रेल्वे रुळाच्या दुरुस्तीच्या कामासाठी १२, १४ व १७ जानेवारीला दुपारी साडेबारापासून तीन वाजून ४० मिनिटांपर्यंत मेगाब्लॉक घेण्यात येणार आहे. त्यामुळे पुण्याहून सव्वातीन वाजता सुटणारी पुणे-निजामाबाद पॅसेंजर (५१४२१) ५० मिनिटे उशिराने सुटणार आहे.
..

जुन्या आठवणींना उजाळा

कामशेत येथे पावसात रेल्वेचा पूल व अनेक ठिकाणी ट्रॅक वाहून गेल्याची घटना पाच ते सात वर्षांपूर्वी घडली होती. त्यावेळी पुणे ते मुंबई आणि पुणे ते लोणावळा लोकलही पूर्णपणे बंद होती. तर, डेक्कन क्वीन सात दिवस बंद होती. रविवारी पुणे-मुंबई दरम्यान वाहतूक बंद ठेवण्यात आल्याने त्या घटनेच्या आठवणींना पुन्हा उजाळा मिळाल्याचे रेल्वे कर्मचाऱ्यांनी सांगितले.

Vandana.Ghodekar@timesgroup.com

पुणे : आपले मूल अचानक हरविल्यानंतर त्याचे पालक बैचेन होतात..त्याच्याबरोबर काही बरेवाईट झाले नसेल ना या काळजीने हैराणही होतात..पोलिसांकडे तक्रार देण्यासाठी गेले तर त्यांच्याकडून थंड प्रतिसाद मिळतो..मूल सापडत नसल्यामुळे मानसिक धक्का बसलेले पालक वारंवार पोलिसांकडे चौकशी करतात..तर काहीजण भीतीपोटी तक्रार करतच नाहीत..हरविलेल्या मुलांची वाढती आकडेवारी लक्षात घेऊन जुलै २०१५मध्ये पोलिसांकडून राज्यात राबविण्यात आलेल्या 'ऑपरेशन मुस्कान' अंतर्गत ४,२९६ मुलांचा शोध घेण्यात यश आले आहे.

शोध घेण्यात आलेल्या मुलांपैकी ३,५११ मुले हरविल्याची तक्रार पोलिसांकडे करण्यातच आली नसल्याचे उघड झाले आहे. 'ऑपरेशन मुस्कान'अंतर्गत रेकॉर्डवर असलेली ७७० मुले आणि रेकॉर्डव्यतिरिक्त ३,०९० मुले मिळून एकूण ३,८६० मुले त्यांच्या पालकांकडे, तर ४०३ अनाथ मुले चाइल्ड वेलफेअर केअरकडे सुपूर्द करण्यात आली.

राज्य गुन्हे अन्वेषण विभागातर्फे प्रसिद्ध करण्यात आलेल्या 'ऑपरेशन मुस्कान' या अहवालात ही आकडेवारी प्रसिद्ध करण्यात आली आहे. एक जुलै ते ३१ जुलै २०१५ या कालावधीत हरवलेल्या मुलांचा शोध घेण्यासाठी 'ऑपेरशन मुस्कान' राबविण्याच्या सूचना केंद्रीय गृहमंत्रालयाने दिल्या होत्या. त्यानुसार राज्यात वेगवेगळ्या टीम करून ही मोहीम राबविण्यात आली. बेपत्ता मुलांना शोधणे आणि त्यांचे पुनर्वसन करणे हा या मोहिमेचा उद्देश होता. त्यानुसार विविध संस्था, सार्वजनिक ठिकाणे, हॉटेल, दुकाने, धार्मिक स्थळे, आश्रम, रेल्वेस्थानक, बसस्थानक आदी ठिकाणी आढळणाऱ्या मुलांची चौकशी करून त्यांची आणि पालकांची भेट घडवून आणण्यात आली.

राज्यात या मोहिमेत पोलिसांकडे मुले हरवल्याची नोंद असलेल्या ७८५ मुलांची पालकांसोबत भेट घडवून आणण्यात आली. त्यामध्ये मुंबई पोलिसांनी सर्वाधिक कामगिरी करीत १५४ मुलांची पालकांसोबत भेट घडवून आणली. त्यानंतर नागपूर पोलिसांनी १४३, नाशिक ६८, नवी मुंबई पोलिसांनी ४६, ठाणे पोलिसांनी ४५ मुलांचा शोध लावला.

मुंबई पोलिस अव्वल

राज्यात मुंबई रेल्वे पोलिसांनी रेकॉर्डवर नसलेल्या १,१५२ मुलांचा शोध लावला आहे. त्यानंतर अनुक्रमे नागपूर रेल्वे पोलिस (३८२), बुलडाणा (२३८), ठाणे ग्रामीण (२२८) आणि सोलापूर शहर (२२८) यांनी मुलांचा शोध लावण्यात महत्त्वाची कामगिरी केली आहे.

..

पुणे जिल्हा आकडेवारी

जुलै २०१५ मध्ये सापडलेली मुले ३८

३१ जुलैनंतर न सापडलेली मुले २६८

पालकांकडे सुपूर्द केलेली मुले ३८

चाइल्ड केअरकडे दिलेली मुले १५

भारतीय लष्कराचा सर्वांत मोठा संयुक्त लष्करी सराव दोन ते आठ मार्च दरम्यान पुण्यात होणार आहे. आशियाई देशांबरोबरच जपान, अमेरिका, रशियाचा सहभाग असलेल्या या सरावाच्या पूर्वतयारीने आता वेग घेतला आहे. या संदर्भात सरावात सहभागी होणाऱ्या देशांच्या वरिष्ठ लष्करी अधिकाऱ्यांची बैठक आज, मंगळवारपासून पुण्यात सुरू होणार आहे.

भारतीय लष्कराच्या इतिहासातील पहिल्याच सर्वांत मोठ्या अशा या संयुक्त लष्करी सरावात आशियान समूहातील दहा देशांबरोबरच चीन, जपान, रशिया, अमेरिका आदी देशही सहभागी होणार आहेत. या सरावाची पूर्वतयारी आणि नियोजनाच्या दृष्टीने यात सहभागी होणाऱ्या देशांच्या लष्कराच्या वरिष्ठ अधिकाऱ्यांची दोन दिवसीय बैठक आजपासून (मंगळवार) आयोजिण्यात आली आहे. यामध्ये या सरावाची रूपरेषा अंतिम करण्यात येणार आहे. लष्कराच्या दक्षिण क्षेत्राचे चीफ ऑफ स्टाफ लेफ्टनंट जनरल आर. जे. नरोन्हा यांच्या मार्गदर्शनाने या बैठकीला प्रारंभ होईल, असे लष्करातर्फे सांगण्यात आले. या संयुक्त सरावाला फिल्ड ट्रेनिंग एक्सरसाइज (एफटीएक्स २०१६) असे नाव देण्यात आले आहे. भारतीय लष्कराच्या इतिहासातील हा पहिला सर्वांत मोठा संयुक्त लष्करी सराव असल्याने लष्करातर्फे जोरदार तयारी सुरू करण्यात आली आहे. पुणे आणि परिसरात असलेल्या अनेक लष्करी संस्था, सरावासाठी भरपूर व बंदिस्त मोकळी जागा, उत्तम पायाभूत सुविधा, उत्तम हवामान आणि सांस्कृतिक परंपरा लक्षात घेऊन सरावासाठी पुण्याची निवड करण्यात आल्याचे लष्करातर्फे स्पष्ट करण्यात आले आहे. या सरावात भूसुरुंगांचा शोध घेऊन ते नष्ट करणे आणि शांतता मोहिमेदरम्यानच्या कसरतींचा सराव केला जाणार आहे. अनेक देशांच्या सहभागामुळे या सरावाला मोठे महत्त्व प्राप्त झाले आहे.

पिंपरी : पिंपरी-चिंचवड येथे येत्या शुक्रवारपासून (१५ जानेवारी) सुरू होणारे अखिल भारतीय मराठी साहित्य संमेलन ८९ वे असले तरी, त्यासाठी प्रत्यक्षात राबणारे हात तरुण आहेत. यंदाचे संमेलन तरुणाईला आकर्षित करणारे असेल, असा प्रयत्न संयोजकांकडून होत आहे.

संमेलनाच्या निमित्ताने हिंदुस्थान अँटिबायोटिक्स (एच. ए.) कंपनीच्या मैदानावर प्रत्यक्षात जोरदार तयारी चालू आहे. संमेलनाच्या कालावधीत मिरवणारे, चर्चेत सहभागी होणारे असंख्य मान्यवर असतील. परंतु, गेल्या अनेक महिन्यांपासून राबणारे हात मात्र तरुण असल्याचे दिसून येते. सुमारे सहाशेहून अधिक तरुण स्वयंसेवक प्रत्यक्ष आणि अप्रत्यक्ष कार्यात सहभागी होत आहेत. यंदा या प्रकारचा जाणीवपूर्वक वेगळा प्रयत्न संयोजकांनी केला आहे.

मोबाइल अॅप, अद्ययावत वेबसाइट, व्हॉटस्अॅप, फेसबुक पेज, मोबाइल रिंगटोन, रेडिओ जिंगल आदी माध्यमातून मराठी भाषा, मराठी संस्कृती आणि संमेलनानिमित्त होणारे कार्यक्रम याबाबतची विशेष खबरदारी डॉ. डी. वाय. पाटील विद्यापीठाने घेतली आहे. सुमारे ७० हजारांहून अधिक निमंत्रण पत्रिकांचे वाटप, तितक्याच संख्येने ई-मेल पाठविण्यात आले आहेत. सुनील चव्हाण, किरण पाटील यांच्या मार्गदर्शनाखाली तरुणांचा गट गेल्या पंधरा दिवसांपासून अक्षरशः राबत आहे. यामध्ये अंकिता वाठारे, अमृता जोशी, अभिषेक सिंग, अक्षय शिरसाट, प्रियांका पाटील, चिरंतन कुलकर्णी, महेश जोशी, तेजय रायभर यांच्यासह अन्य स्वयंसेवकांचा समावेश आहे. या कामासाठी विद्यापीठात स्वतंत्र कक्षच स्थापन करण्यात आला आहे.

संमेलनाच्या निमित्ताने येणारे मान्यवर पाहुणे, विशेष निमंत्रित, माजी संमेलनाध्यक्ष, मान्यवर लेखक यांच्या स्वागतासाठी तरुणांची पथके तयार करण्यात आली आहेत. त्यामध्ये संयोजक विद्यापीठ आणि प्रतिष्ठानचे पाचशेहून अधिक युवक-युवती सहभागी असतील. या शिवाय पुणे विद्यापीठातून सुमारे शंभर स्वयंसेवकांची तुकडी मदतीला येणार आहे. याशिवाय निमंत्रण पत्रिकेतही मुले आणि तरुणांसाठीच्या विशेष कार्यक्रमांचे आयोजन करण्यात आले आहे. यामध्ये लेखक चेतन भगत यांचा तरुणांशी संवाद, आजची तरुणाई काय वाचते, काय लिहिते, आजचे बालसाहित्य आणि बालरंगभूमी सकस आहे का, मुलांचा आनंदोत्सव आदी कार्यक्रमांचा उल्लेख करता येईल.

....

आयटी दिंडी अन् पारंपरिक पोशाख

संमेलनात ग्रंथदिंडी हे प्रमुख आकर्षण राहणार आहे. यामध्ये वारकऱ्यांबरोबरच विद्यार्थ्यांची आणि आयटी क्षेत्रात कार्यरत असणाऱ्या तरुणांची दिंडी सहभागी होणार आहे. हे सर्वजण पारंपरिक पांढरा झब्बा, पायजमा आणि मुली किंवा महिला पांढऱ्या रंगाची साडी परिधान करणार आहेत. सुमारे तीन हजारांहून अधिक विद्यार्थी, युवकांचा दिंडीत सहभाग असेल, असे नियोजन आहे.

'सर्वच शेतीमालाच्या भावात घसरण झाली असून, सध्या अडचणीचा काळ आहे. अशी संकटे येतच असतात, पण त्यातून बाहेर पडण्यासाठी धीराची गरज आहे. शेतीमालाच्या भावाबाबत देशात अथवा राज्यात कोणतेही सरकार येवू दे; तुम्ही काळजी करू नका. आगामी दोन ते तीन वर्षांत चांगली परिस्थिती निर्माण होईल, असा विश्वास वाटतो,' अशी भावना शिवनगर विद्या प्रसारक मंडळातर्फे आयोजित अमृतमहोत्सवी अभिष्ट चिंतनसोहळ्यात माजी केंद्रीय कृषिमंत्री शरद पवार यांनी व्यक्त केली.

या वेळी बारामतीच्या खासदार सुप्रिया सुळे, माळेगाव कारखान्याचे अध्यक्ष रंजनकुमार तावरे, पवारांचे जुने सहकारी चंद्रराव तावरे, विजय कोलते आणि शिवाजीराव भोसले उपस्थित होते . 'मध्यंतरीचे काही दिवस थोडे धाकधुकीचे होते. देशातील साखर उद्योगाबाबत लोक माझ्याकडून जास्त अपेक्षा ठेवतात. कारखाने खासगी असो की सहकारी त्यांच्याशी माझा सुसंवाद होतोच. ऊसाचे उत्पादन वाढल्यामुळे साखरही वाढली. त्यामुळे थोडी अडचण झाली खरी; पण आता हे चित्र पुन्हा बदलायला सुरुवात झाली आहे. साखरेच्या भावाची घसरण थांबण्याची वेळ आली आहे. पुढील वर्षी ऊसाचे उत्पादन जवळपास २० ते २५ टक्क्यांनी घटेल,' असे संकेतही पवारांनी दिले.

माळेगावच्या शैक्षणिक संकुलात पाऊल ठेवल्यावर जुन्या माळेगावची आठवण झाल्याशिवाय राहात नाही, असेही पवार म्हणाले. जुन्या सहकाऱ्यांच्या आठवणींनाही पवारांनी उजाळा दिला. आपल्याला लाभलेले ​जिवाभावाचे सहकारी हीच आपली कमाई आहे. पहिली निवडणूक संघर्षाची झाली, मात्र पुन्हा कधीच मतांचा जोगवा मागण्याची वेळ मतदारांनी माझ्यावर येऊ दिली नाही. असे मतदार संपूर्ण देशात कुठेही नाहीत, या शब्दांत पवारांनी मतदारांचे आभार मानले.

यंदा पुणे, सातारा आणि कोल्हापूर जिल्ह्यांत तुलनात्मकदृष्ट्या परिस्थिती बरी राहील. मात्र, आपल्या तरुणाईने शेती किंवा नोकरी व्यतिरिक्त उद्योगांकडे पहिले पाहिजे. भविष्यात नोकरी मागण्यासाठी माझ्यासाठी येऊ नका.मात्र, मात्र उद्योगासाठी सहकार्य हवे असल्यास अवश्य माझ्याकडे या.

शरद पवार

ओ. पी. नय्यर फाउंडेशन ट्रस्टच्या वतीने देण्यात येणारा 'ओ. पी. नय्यर पुरस्कार' प्रख्यात संतूरवादक पं. शिवकुमार शर्मा यांना जाहीर झाला आहे. ५१ हजार रुपये रोख आणि स्मृतिचिन्ह असे या पुरस्काराचे स्वरूप असून यंदा पुरस्काराचे सहावे वर्ष आहे.

या पूर्वी हा पुरस्कार शमशाद बेगम, इनॉक डॅनियल, मनोहरी सिंग, पं. राम नारायण, केर्सी लॉर्ड आणि बर्जोर लॉर्ड या गायक-वादकांना प्रदान करण्यात आला आहे. संगीतकार ओ. पी. नय्यर यांच्या जयंतीदिनी १६ जानेवारी रोजी गणेश कलाक्रीडा रंगमंच येथे सायंकाळी ६ वाजता होणाऱ्या कार्यक्रमात प्रसिद्ध सारंगी वादक पं. राम नारायण यांच्या हस्ते पं. शर्मा यांना हा पुरस्कार प्रदान करण्यात येईल. कार्यक्रमात 'श्रुती' ही संस्था नय्यर साहेबांच्या गाण्यांचा नजराणा पेश करणार आहे.

पं. नारायण व पं. शर्मा हे दोन दिग्गज कलाकार प्रथमच एकत्र येणार असून, या कार्यक्रमातील बहुसंख्य गाणी शिवजींनी निवडलेली आहेत. या गाण्यांवर ते भाष्य करणार असून, नय्यर साहेबांच्या आठवणीही उलगडणार आहेत. सुलतान खाँ यांचे शागीर्द दिलशान खाँ (सारंगी), पं. हरिप्रसाद चौरसिया यांचे शिष्य सुनील अवचट (बासरी), शिवजींचे शिष्य दिलीप काळे (संतूर) संगीतकार आणि सतारवादक भास्कर चंदावरकर यांच्या शिष्या गायत्री गोरे (सतार) या कलावंतांची अनोखी जुगलबंदी या कार्यक्रमात अनुभवता येईल. सुहास काटदरे यांची व्हायोलिनवर साथसंगत असेल. तसेच सॅक्सोफोन, अॅकॉर्डियन, माउथ ऑर्गन, ग्रँड पियानो या वाद्यांची सूरमयी अनुभूती कार्यक्रमातून मिळणार आहे. संगीत संयोजन अमृता ठाकूरदेसाई यांचे असून, शैलजा सुब्रह्मण्यम, प्रियांका बर्वे, अली हुसेन व धवल चांदवडकर गाणी सादर करणार आहेत. 'महाराष्ट्र टाइम्स' या कार्यक्रमाचा माध्यम प्रायोजक आहे.

सशुल्क प्रवेशिकांसाठी संपर्क

शुल्क प्रवेशिकांसाठी ९८२२४५६३००, ९८२२०१५६९६ या क्रमांकांवर संपर्क साधता येईल.

मुंबई बॉम्बस्फोट खटल्यातील गुन्हेगार अभिनेता संजय दत्त शिक्षा भोगून २५ फेब्रुवारीला बाहेर पडण्याची शक्यता आहे. मात्र, तुरुंग प्रशानाकडून तारीख निश्चीत केली नसल्याचे स्पष्ट करण्यात आले. संजय दत्तच्या शिक्षेतील सुटीच्या दिवसांचा हिशोब लावून जेल प्रशासनाने ही तारीख निश्चित केल्याचे संजयचे वकील अ‍ॅड. हितेश जैन यांनी सांगितले. मात्र, तुरुंग प्रशासनाकडून अद्याप कोणतीही तारीख जाहीर करण्यात आलेली नाही. पण, संजय दत्त हा फेब्रुवारी अखेरपर्यंत जेलच्या बाहेर पडणार असल्याचे येरवडा जेलचे अधीक्षक यू. टी. पवार यांनी स्पष्ट केले.

जांभुळवाडी येथील दरीपुलाखाली झाडांमध्ये एका महिलेचा मृतदेह सोमवारी दुपारी आढळून आला. या महिलेचा खून करून पुरावा नष्ट करण्याच्या उद्देशाने मृतदेह या ठिकाणी टाकून दिल्याची शक्यता पोलिसांनी व्यक्त केली आहे. या प्रकरणात भारती विद्यापीठ पोलिस ठाण्यात खुनाचा गुन्हा दाखल करण्यात आला आहे.
याबाबत सहयक पोलिस निरीक्षक विष्णू सूर्यवंशी यांनी तक्रार दिली आहे. पोलिसांनी दिलेल्या माहितीनुसार, मुंबई-बेंगळुरू महामार्गावरील जांभुळवाडी येथील दरीपुलाखाली कापडात गुंडाळलेल्या अवस्थेत तीस वर्षांच्या महिलेचा मृतदेह आढळून आला. धारदार शस्त्राने वार करून या महिलेचा खून केल्याचे व पुरावा नष्ट करण्यासाठी झाडांमध्ये टाकल्याचे पोलिसांनी सांगितले. मृतदेहाच्या डोक्‍यावर गंभीर जखम आहे. सुमारे दहा-पंधरा दिवसापूर्वी खून करून हा मृतदेह येथे आणून ठेवला असावा, असा अंदाज पोलिसांनी व्यक्त केला. खुनाचा तपास सहायक पोलिस निरीक्षक एस. आर. शिंदे यांनी सुरू केला आहे.

येरवडा परिसरात पालिकेच्या अतिरिक्त आयुक्तांसह अतिक्रमण विभागातील अधिकारी-कर्मचाऱ्यांना मारहाण केल्याप्रकरणी पोलिसांनी मंगळवारी सायंकाळपर्यंत सात जणांना अटक केली आहे. सरकारी कामात अडथळा, मारहाण, सार्वजनिक मालमत्तेचे नुकसान, जीवे मारण्याचा प्रयत्न आणि दंगल माजविणे, अशा कलमांतर्गत त्यांच्यावर गुन्हे दाखल करण्यात आले आहेत. तसेच परिसरातील बेकायदा होर्डिंगवरही कारवाई करण्यात आली आहे.

लालू हसन शेख (वय ५५), मौला हसन शेख (वय ५०), इरफान लालू शेख (वय २८), फिरोझ लालू शेख (वय २५), रियाझ लालू शेख (वय २३), इम्रान मौला शेख (वय २९) आणि वसीम मौला शेख (वय २६) अशी अटक करण्यात आलेल्यांची नावे आहेत. हे सर्व जण येरवड्यातील मदर तेरेसा नगर येथे राहतात. यात सहभागी असलेल्या इतर आरोपींचा शोध सुरू असल्याची माहिती येरवडा पोलिसांनी दिली.

लालू शेख हा सिद्रा हॉटेलचा मालक असून, मौला हा भाऊ तर इम्रान हा पुतण्या आहे. येरवड्यातील गुंजन चौकात विमानतळाकडे जाणाऱ्या रस्त्याच्या कडेला लालू शेख याने 'सिद्रा चायनीज व फास्टफूड' अनधिकृत हॉटेल उभारले होते. पालिकेच्या अतिक्रमण विभागाकडून मंगळवारी पर्णकुटी चौकापासूनच रस्त्यावरील पथारीवाले, टपऱ्यांवर कारवाईस सुरुवात झाली. पालिकेचे वरिष्ठ अधिकारी या वेळी उपस्थित होते. शेख यांच्या हॉटेलसमोरील पान टपरीवर कारवाई सुरू होताच हॉटेल मालक लालू शेख, भाऊ मौला, पुतण्या इम्रान आणि दहा ते बारा तरुणांनी पालिका अधिकारी, कर्मचाऱ्यांना धक्काबुक्की आणि मारहाण करण्यास सुरुवात केली.

या तरुणांना दरडावून हुसकावून लावण्याचा प्रयत्न पोलिसांनी करताच, हॉटेलच्या आवारात पडलेल्या सिमेंटच्या विटा, बियरच्या बाटल्यांचा वापर करून दगडफेक आणि मारहाण करण्यास सुरुवात केली. पोलिसांनी हस्तक्षेप करण्याचा प्रयत्न केला असता, त्यांनाही धक्काबुक्की करण्यात आली. लालू शेख याने माधव जगताप यांच्या डोक्यात काठीने प्रहार केल्याने रक्त वाहू लागले. त्यानंतरही, माधव जगताप यांचा पाठलाग करून त्यांना विटा आणि बाटल्या फेकून मारण्यात आल्या. या दरम्यान काहींनी अतिरिक्त आयुक्त राजेंद्र जगताप यांना देखील मारहाण करण्याचा प्रयत्न केला. परंतु, अतिक्रमण पोलिसांनी त्यांना सुरक्षेचे कडे करून संरक्षण दिल्याने अनर्थ टळला. या मारहाणीत अतिक्रमणचे पोलिस उपनिरीक्षक आजिनाथ सल्गर यांच्या हाताला दुखापत झाली आहे.

पालिका अधिकाऱ्यांना मारहाण केल्याचे समजताच येरवडा पोलिसांनी घटनास्थळी धाव घेऊन परिस्थिती नियंत्रणात आणली. पोलिस उपयुक्त सुधीर हिरेमठ, पोलिस निरीक्षक संजय पाटील यांच्या नेतृत्वाखाली येरवडा पोलिसांनी मोठा बंदोबस्त तैनात केल्यानंतर आयुक्तांच्या आदेशानुसार संपूर्ण हॉटेल जमीनदोस्त करण्यात आले. तसेच, हॉटेलच्या आवारात बेकायदेशीरपणे उभारलेल्या होर्डिंगवर कारवाई करण्यात आली.

कारवाईसाठी पालिकेची टाळाटाळ

गुंजन चौकाच्या रस्त्याच्या कडेला उभारलेल्या चायनीज हॉटेलची जागा अतिक्रमण मुक्त करावी ,बेकायदेशीर होर्डिंग काढून टाकावे, याबाबत लालू शेख याला पालिकेने वारंवार नोटीस बजाविली होती. परंतु, नोटीस बजावण्यापलीकडे कारवाई करण्यास पालिकेनेच टाळाटाळ केली. परिणामी, हॉटेलच्या अनधिकृत शेड वाढतच गेल्या. येरवडा परिसरात अजूनही अनेक ठिकाणी अतिक्रमणे असून, त्यावरही कारवाई करावी, अशी मागणी होत आहे.

पोलिस बंदोबस्तात कारवाई सुरू राहणार

येरवडा येथील अतिक्रमणे हटवण्यासाठी गेलेल्या उपायुक्तांना झालेल्या मारहाणीच्या पार्श्वभूमीवर पुढील दहा दिवस पोलिस बंदोबस्त घेऊन शहरातील विविध भागातील अतिक्रमणांवर कारवाई करण्याचा निश्चय पालिका प्रशासनाने केला आहे. स्थानिक पोलिस स्टेशनची मदत घेऊन अतिक्रमणविरोधी कारवाई सुरूच ठेवली जाणार असल्याचे पालिकेचे अतिरिक्त आयुक्त राजेंद्र जगताप यांनी मंगळवारी पत्रकार परिषदेत सांगितले.

शहरातील विविध भागात मोठ्या प्रमाणात बेकायदा बांधकामे, अनधिकृत हॉटेल, फूटपाथवरील स्टॉल यामुळे सर्वसामान्य नागरिकांना त्रास सहन करावा लागत आहे. अनधिकृत बांधकामे, स्टॉलवर कारवाई करण्यासाठी पालिकेने गेल्या काही दिवसांपासून मोहीम सुरू केली आहे. येरवडा भागातील पर्णकुटी चौकात अतिक्रमण कारवाई सुरू असताना काही नागरिकांना या पथकावर दगडफेक करून अतिक्रमण विभागाचे प्रमुख माधव जगताप यांनाल मारहाण केली. यामध्ये जगताप यांच्या डोळ्याला गंभीर इजा झाली‌ आहे.

अतिक्रमण कारवाई करण्यासाठी गेलेल्या अधिकाऱ्यांना झालेल्या मारहाणीनंतर पालिकेने सुरू केलेल्या मोहिमेमध्ये कोणताही खंड पडणार नाही. या घटनेमुळे पुढील काही दिवस पुरेसा पोलिस बंदोबस्त घेऊन ही कारवाई अधिक कठोरपणे करण्याचा निर्णय घेतल्याचे अतिरिक्त आयुक्त जगताप यांनी स्पष्ट केले. अतिक्रमण कारवाई करण्यासाठी आवश्यक तो पोलिस बंदोबस्त द्यावा, अशी मागणी पालिकेने पोलिस आयुक्त के. के. पाठक यांच्याकडे केली आहे. पोलिस आयुक्तांनी त्याला सकारात्मक प्रतिसाद देत बंदोबस्त देण्याची तयारी दाखविल्याने ही अतिक्रमण कारवाई अधिक तीव्र होणार असल्याचे अतिरिक्त आयुक्त ओमप्रकाश बकोरिया यांनी स्पष्ट केले.

महापालिका आयुक्त कुणाल कुमार यांच्या परदेश दौऱ्यामुळे आयुक्तांचे बजेट स्थायी समितीसमोर सादर करण्यासाठी दहा दिवस उशीर होणार आहे. ३१ जानेवारीपूर्वी आयुक्तांच्या बजेटला मान्यता देण्याचे बंधन स्थायी समितीवर असल्याने आयुक्तांच्या बजेटवर चर्चा करण्यासाठी स्थायी समितीला अवघे चार दिवस मिळणार आहे. आयुक्तांच्या बजेटला स्थायीने ३१ जानेवारीपूर्वी मान्यता द्यावी, असा ठराव मुख्य सभेनेच मान्य केल्याने स्थायीला चार दिवसामध्ये तारेवरच‌ी कसरत करून बजेटला मान्यता द्यावी लागणार आहे.

महापालिका आयुक्तांनी चालू वर्षाचे बजेट तयार करताना त्याची माहिती १५ जानेवारीपूर्वी स्थायी समितीसमोर ठेवावी. आयुक्तांनी ठेवलेल्या बजेटवर १५ दिवस चर्चा करून स्थायी समितीने १ फेब्रुवारीपर्यंत त्यावर निर्णय घेणे बंधनकारक आहे. स्थायी समितीने अभ्यास करुन तयार केलेल्या बजेटच्या प्रती आयुक्तांनी ११ फेब्रुवारीपूर्वी सभासदांना देणे बंधनकारक आहे. पालिकेच्या मुख्य सभेने चार ऑक्टोबर १९८३ मध्ये याबाबतचा ठराव करून या सर्व कालावधीला मंजुरी दिली आहे. मुख्य सभेने केलेल्या ठरावानुसार गेले अनेक वर्षापासून या कालावधीत बजेट तयार करून त्याला मंजुरी घेतली जाते.

जपान सरकारने पालिका आयुक्तांना जपानच्या भेटीसाठी निमंत्रण दिले आहे. १६ ते २४ जानेवारी या काळात पालिका आयुक्त जपान दौऱ्यावर जाणार असल्याने पालिकेचे बजेट १५ जानेवारीपर्यंत सादर करता येणार नसल्याचे पालिका आयुक्त कुमार यांनी नगरसचिव कार्यालयाला कळविले आहे. या दौऱ्यावरून आल्यानंतर २४ जानेवारीनंतर स्थायी समितीला बजेट सादर केले जाइल, असे आयुक्तांनी स्पष्ट केले आहे. त्यामुळे २४ तारखेनंतर कुमार यांनी स्थायी समितीसमोर बजेट सादर केल्यास ते समजावून घेऊन त्याचा अभ्यास करून त्यावर निर्णय घेण्यासाठी समितीला केवळ चार दिवस उपलब्ध होणार आहे. तारेवरची कसरत करून समितीला हे काम करावे लागणार आहे.

मुदतवाढीसाठी मुख्य सभेकडे?

पालिका आयुक्तांनी दहा दिवस उशीरा स्थायी समितीसमोर बजेट सादर करण्याचा निर्णय घेतल्याने समितीला त्यावर निर्णय घेण्यासाठी चार दिवस मिळणार आहे. समितीला प्रशासनाने तयार केलेल्या बजेटचा सविस्तर अभ्यास करण्यासाठी अधिक मुदत घ्यायची असल्यास मुख्य सभेमध्ये हा प्रस्ताव मांडून त्याला मंजुरी घ्यावी लागेल. बजेट कधी सादर करावे, याचा ठराव पालिकेच्या मुख्य सभेतच झाल्याने मुदतवाढीसाठी मुख्य सभेकडेच जावे लागणार असल्याचे नगरसचिव विभागातील अधिकाऱ्यांनी स्पष्ट केले.