चिंचवड मतदारसंघाच्या पोटनिवडणुकीचे तिकीट मिळाल्यानंतर अश्विनी जगताप यांनी माध्यमांशी संवाद साधला. कुटुंबात वाद असल्याच्या चर्चांवर त्यांनी मोठे भाष्य केले. आमच्या कुटुंबात कुठलाही वाद नाही. विरोधक याचं भांडवल करण्याचा प्रयत्न करत आहेत. यात कोणतंही तथ्य नाही, असंही अश्विनी जगताप म्हणाल्या. दोन दिवसांपूर्वी दोघांनीही उमेदवारी अर्ज आणल्यामुळे दोघेही इच्छुक असल्याचं चित्र होतं. पण, पक्षाने तिकीट अश्विनी जगताप यांना दिलं आहे.
उमेदवारी कोणालाही दिली तरी त्याला जगताप कुटुंबाचा पाठिंबा होता. गेली ३० वर्षे पडद्याच्या पाठीमागे काम करत असले तरी निवडणूक कशी लढायची हे मला माहीत आहे. दिवंगत आमदार लक्ष्मण जगताप यांचा वारसा पुढे घेऊन जाण्याचा प्रयत्न करणार असल्याचं अश्विनी म्हणाल्या.
आमदारांच्या निधनामुळे रिक्त झालेल्या कसबा पेठ आणि चिंचवड विधानसभा मतदारसंघातील पोटनिवडणुकीसाठी भाजपने उमेदवारांची घोषणा केली. कसब्यातून हेमंत रासने, तर चिंचवडमधून अश्विनी जगताप या भाजपच्या अधिकृत उमेदवार असतील.
चिंचवडमधून लक्ष्मण जगताप यांचे बंधू शंकर जगताप आणि पत्नी अश्विनी जगताप यांच्यापैकी कोणाला उमेदवारी मिळणार, याची उत्सुकता होती.
हेही वाचा : हाडाचा कार्यकर्ता, जातीय गणितं जुळवण्यात माहीर, 'ओंकारेश्वरा'चा वरदहस्त; कसब्यात हेमंत रासनेंना उमेदवारी का मिळाली?
दुसरीकडे, भाजपने मुक्ता टिळक यांचे पुत्र कुणाल यांना प्रदेश प्रवक्तेपदी दिल्याने कसब्याच्या पोटनिवडणुकीत टिळक कुटुंबाबाहेरील व्यक्ती असेल, हे निश्चित झालं होतं. सुरुवातीला ही निवडणूक बिनविरोध करण्यासाठी प्रयत्न करणाऱ्या भाजपातच पाचहून अधिक इच्छुक उमेदवार होते. मात्र पुण्यातील नेत्यांच्या बैठकीनंतर मुंबईतही राज्य पातळीवरील नेत्यांमध्ये खलबतं झाली आणि हेमंत रासने यांच्या नावावर शिक्कामोर्तब करण्यात आलं.
भाजपने आपल्या उमेदवारांची घोषणा केल्यानंतर आता या दोन्ही जागांवर महाविकास आघाडीकडून कोण उमेदवार रिंगणात उतरतात, याबाबत उत्सुकता वाढली आहे.
हेही वाचा : नाना पटोलेंनी १० तास माझ्या माणसाला बसवून ठेवलं आणि चुकीचे एबी फॉर्म पाठवले: सत्यजीत तांबे
मोबाइल अॅप डाउनलोड करा आणि राहा अपडेट
