महाराष्ट्र राज्य माध्यमिक व उच्च माध्यमिक शिक्षण मंडळातर्फे जुलै महिन्यात घेण्यात आलेल्या बारावीच्या फेरपरीक्षेचा निकाल २४.९६ टक्के लागला आहे. औरंगाबाद विभागाचा निकाल सर्वाधिक ३७ टक्के लागला असून मुंबईचा निकाल सर्वांत कमी म्हणजे १८.७४ टक्के लागला आहे.
पूर्वी मंडळातर्फे बारावीच्या परीक्षेत अनुत्तीर्ण होणाऱ्या विद्यार्थ्यांसाठी ऑक्टोबर महिन्यात परीक्षा घेण्यात येत होती. त्यामुळे विद्यार्थ्यांचे वर्ष वाया जात होते. त्याऐवजी आता जुलै महिन्यातच परीक्षा घेऊन ऑगस्ट अखेरपर्यंत या विद्यार्थ्यांना पुढे प्रवेश देण्यात येणार आहे. फेरपरीक्षेचे यंदाचे तिसरे वर्ष होते. सन २०१५ मध्ये परीक्षेचा निकाल २१.५९ टक्के, तर २०१६मध्ये २७.०३ टक्के लागला होता.
यंदा एक जुलै ते १० जुलै दरम्यान प्रात्यक्षिक व तोंडी परीक्षा, तर ११ ते १८ जुलै दरम्यान लेखी परीक्षा घेण्यात आली होती. या परीक्षेस नऊ विभागीय मंडळांमधून ९४ हजार ३३६ विद्यार्थ्यांनी अर्ज केले होते. त्यापैकी ९३ हजार २७१ विद्यार्थ्यांनी प्रत्यक्ष परीक्षा दिली. त्यापैकी २३ हजार २८३ म्हणजेच २४.९६ टक्के विद्यार्थी उत्तीर्ण झाले, अशी माहिती मंडळाचे अध्यक्ष गंगाधर मम्हाणे आणि सचिव के. बी. पाटील यांनी दिली.
परीक्षेचा निकाल ऑनलाइन पद्धतीने जाहीर करण्यात आला. येत्या गुरुवारी (२४ ऑगस्ट) दुपारी तीननंतर विद्यार्थ्यांना त्यांच्या ज्युनिअर कॉलेजमध्ये गुणपत्रिकांचे वाटप केले जाईल. इच्छुक विद्यार्थ्यांना २२ ऑगस्ट ते ३१ ऑगस्ट दरम्यान गुणपडताळणीसाठी अर्ज करता येतील. तर उत्तरपत्रिकांच्या फोटोकॉपीसाठी २२ ऑगस्ट ते ११ सप्टेंबरपर्यंत अर्ज करता येऊ शकतील. विद्यार्थ्यांना आता तीनऐवजी सहा विषयांसाठी उत्तरपत्रिकांचे पूनर्मूल्यांकन करता येणार आहे. त्यासाठी उत्तरपत्रिकेची छायाप्रत घेणे आवश्यक आहे. त्यासाठी त्यांना विभागीय मंडळात अर्ज करावा लागेल. या परीक्षेत सर्व विषयांसह उत्तीर्ण झालेल्या विद्यार्थ्यांना श्रेणीसुधार योजनेअंतर्गत फेब्रुवारी मार्च २०१८मध्ये होणाऱ्या बारावीच्या परीक्षेला बसता येईल. सर्व उत्तीर्ण विद्यार्थ्यांना व्यावसायिक अभ्यासक्रमांसह इतर अभ्यासक्रमांना प्रवेश घेता येणार आहे.
मोबाइल अॅप डाउनलोड करा आणि राहा अपडेट
