राज्य शासनाकडून कोट्यवधी रुपये खर्च करून पिंपरी-चिंचवड आणि पुणे शहरातील चौका-चौकात सीसीटीव्ही कॅमेरे बसविण्यात आले आहेत. परंतु, शनिवारी (१२ ऑगस्ट) मुख्यमंत्री तथा गृहमंत्र्यांच्या भोसरी येथील कै. अंकुशराव लांडगे सभागृहात कायमस्वरूपी सीसीटीव्ही कॅमेरेच नसल्याची धक्कादायक बाब या निमित्ताने उघड झाली. खुद्द मुख्यमंत्री येथे येणार असल्याने महापालिकेने भाडेतत्त्वावर सीसीटीव्ही लावून वेळ मारून नेल्याचा प्रकार समोर आला आहे.
पुणे शहरात झालेल्या साखळी बॉम्बस्फोटानंतर पुण्यासह पिंपरी-चिंचवडमध्ये सीसीटीव्ही कॅमेरे बसविण्यात आले. राज्य शासनाने कोट्यवधी रुपये खर्च करून हे कॅमेरे बसविले आहेत. तसेच, त्याच्या देखभालीवरदेखील मोठा खर्च केला जात आहे. तर दुसरीकडे सर्व शासकीय इमारतींमध्ये सीसीटीव्ही कॅमेरे बसविणे आवश्यक असल्याचेही आदेश शासनाने दिले आहेत. मात्र, शासनाच्या आदेशाला महापालिकेकडूनच केराची टोपली दाखविण्याचा प्रकार घडत आहे.
पुणे-नाशिक मार्गावर महापालिकेकडून काही कोटी रुपये खर्च करून भोसरी येथे कै. अंकुशराव लांडगे सभागृह उभारण्यात आले आहे. अद्ययावत आणि प्रशस्त अशा सभागृहाच्या सुरक्षेसाठी मात्र, महापालिकेकडून म्हणावी तेवढी काळजी घेण्यात आलेली नाही. ९५० आसनव्यवस्था असलेल्या या सभागृहात दिवसाला किमान २ ते ३ कार्यक्रम होत असतात. तसेच, अनेकदा येथे राजकीय मेळावे, बैठका देखील होत असतात. शनिवारी मुख्यमंत्र्यांच्या गाड्यांचा ताफा अडविण्याचा प्रयत्न झाला होता. कार्यक्रमानंतर येथे संतप्त झालेल्या आंदोलकांमुळे काही काळ तणावाचे वातावरण देखील निर्माण झाले होते.
गृहमंत्रिपदाचा भार असलेल्या मुख्यमंत्र्यांच्या हस्ते दिघी आणि एमआयडीसी भोसरी पोलिस ठाण्याच्या नूतन इमारतीचे ई-उद्घाटनदेखील झाले. या वेळी पोलिस आयुक्तांपासून सर्व वरिष्ठ अधिकारी देखील उपस्थित होते. शहराच्या सुरक्षेसाठी नागरिकांनादेखील सीसीटीव्ही कॅमेरे बसविण्याचे आवाहन करणाऱ्या पोलिस प्रमुखांकडूनच आता महापालिकेच्या ढिसाळ कारभारावर कारवाईची मागणी होत आहे.
महापालिकेकडून कोणतेही विकास काम करताना त्याच्या टेंडर प्रक्रियेवरून कायमच आरोप-प्रत्यारोप होत असतात. या सभागृहाच्या कामाकाजाच्या खर्चात झालेल्या वाढीवरून देखील वादंग झाला होता. शहरातील संवेदनशील परिसर म्हणूनदेखील या सभागृहाच्या आसपासच्या परिसराकडे पाहिले जाते. अनेक दिग्गज कलाकार असोत किंवा राजकीय नेते याठिकाणी विविध कार्यक्रमांच्या निमित्ताने येथे येत असतात. त्यामुळे किमान सुरक्षेच्या उपाययोजनांची देखील पुर्तता येथे झाली नसल्याचे शनिवारच्या प्रकारावरून दिसून आले.
सभागृहाच्या उभारणीनंतर लगेचच येथील सीसीटीव्ही कॅमेरे बसविण्याबाबत विद्युत आणि अन्य संबंधित विभागांना पत्रव्यवहार करण्यात आला आहे. तसेच, संबंधित विभागाने यासाठी टेंडर प्रक्रिया देखील केली होती. मात्र, त्याला प्रतिसाद न मिळाल्याने या प्रक्रियेची मुदत वाढविण्यात आली आहे. मुख्यमंत्र्यांचा कार्यक्रम असल्याने भाडेतत्त्वावर सीसीटीव्ही यंत्रणा बसविण्यात आली होती. लवकरच कायमस्वरूपी सीसीटीव्ही बसविण्याबाबत प्रक्रिया करण्यात येणार आहे.
- व्यवस्थापक, अंकुशराव लांडगे सभागृह
मुख्यमंत्र्यांच्या कार्यक्रमासाठी नियोजित सभागृह आणि परिसराची पाहणी करण्यात येत असते. स्थानिक आमदारांसह प्रमुख पदाधिकाऱ्यांसह कै. अंकुशराव लांडगे सभागृहाची देखील पाहणी करण्यात आली होती. त्या वेळी येथे सीसीटीव्ही कॅमेरे नसल्याचे लक्षात आल्यानेच तात्पुरत्या स्वरूपात सीसीटीव्ही कॅमेरे बसविण्याबाबत संबंधितांना सूचना करण्यात आल्या होत्या. त्यावरून येथे सीसीटीव्ही बसविले होते. येथे कायमस्वरूपी सीसीटीव्ही बसविण्याबाबत संबंधित विभागाला सूचित करण्यात येईल.
- गणेश शिंदे, पोलिस उपायुक्त, पिंपरी-चिंचवड
मोबाइल अॅप डाउनलोड करा आणि राहा अपडेट
