हिंजवडीतील पर्यायी रस्त्याचा मार्ग मोकळा होणार
म. टा. प्रतिनिधी, पुणे
हिंजवडीतील राजीव गांधी इन्फोटेक पार्कमध्ये ये-जा करताना वाहतूक कोंडीने वैतागलेल्या लाखो आयटी कर्मचाऱ्यांच्या अडचणींवर पुणे महानगर प्रदेश विकास प्राधिकरणाने (पीएमआरडीए) उपाय शोधला आहे. म्हाळुंगे-माणमधून हिंजवडीला जाणाऱ्या प्रस्तावित रस्त्याचे काम त्वरेने मार्गी लावण्यासाठी या परिसरात नगररचना योजना (टीपी स्कीम) राबविण्याचा इरादा जाहीर करण्यात आला आहे. या परिसरातील २९१ हेक्टर (सुमारे सातशे एकर) जागेवर ही योजना प्रस्तावित असून, त्याचे प्रा-रूप तयार करण्याची प्रक्रिया आता सुरू केली जाणार आहे.
हिंजवडीतील आयटी पार्कमध्ये सुमारे अडीच लाखांहून अधिक कर्मचारी काम करत असले, तरी सध्या तेथे जाण्यासाठी एकच रस्ता उपलब्ध आहे. या रस्त्यावर सकाळी-संध्याकाळी प्रचंड वाहतूक कोंडी होते. त्यामुळे, महाराष्ट्र औद्योगिक विकास महामंडळाने (एमआयडीसी) म्हाळुंगे-माणमधून पर्यायी रस्त्याची आखणी केली होती. या रस्त्याचे निम्म्याहून अधिक काम पूर्ण झाले, तरी स्थानिक शेतकऱ्यांच्या विरोधामुळे उर्वरित काम रखडले. हे काम टीपी स्कीमच्या माध्यमातून पूर्ण करण्यासाठी पीएमआरडीएने पुढाकार घेतला असून, त्यासाठी इरादा जाहीर केला आहे. म्हाळुंगे आणि माण या दोन गावांमधील सुमारे सहाशे एकर जागेवर ही टीपी स्कीम राबविण्यात येणार आहे. त्यासाठी, चतुःसीमा पीएमआरडीएने जाहीर केली असून, महिन्याभरात त्यावर हरकती-सूचना नोंदविता येणार आहेत. टीपी स्कीमच्या माध्यमातून रस्त्यासाठी जागा उपलब्ध होणार असून, त्यातून हिंजवडीतील आयटी कंपन्यांच्या कर्मचाऱ्यांना पर्यायी रस्ता उपलब्ध होणार आहे.
महाराष्ट्र प्रादेशिक नियोजन आणि नगररचना अधियनियमातील (एमआरटीपी) तरतुदींनुसार ‘पीएमआरडीए’ने टीपी स्कीमद्वारे या भागाचा नियोजनबद्ध विकास करण्याचे जाहीर केले आहे. या परिसरामध्ये सुमारे साडेतीनशेहून अधिक शेतकऱ्यांच्या जमिनी असून, रस्त्यासह इतर सुविधा निर्माण करताना, त्यांना जागेच्या बदल्यात विकसित भूखंड (डेव्हलप्ड प्लॉट्स) देण्यात येणार असल्याची माहिती पीएमआरडीएच्या वरिष्ठ अधिकाऱ्यांनी दिली.
................
लवकरच जागा मिळेल
टीपी स्कीम अंतर्गत इरादा जाहीर केल्यापासून साधारणतः नऊ महिन्यांमध्ये त्याचे प्रा-रूप जाहीर करावे लागते. त्यानुसार, पीएमआरडीएला पुढील वर्षी मे पर्यंत स्कीमचे प्रा-रूप तयार करावे लागणार आहे. ‘ही स्कीम तयार करताना, संबंधित परिसरातील सर्व जमीन मालक आणि इतर घटकांशी चर्चा करण्यात येणार आहे. पुढील काही दिवसांत या प्रक्रियेला सुरुवात करण्यात येणार असून, त्यानुसार प्रा-रूप योजना तयार करण्यात येईल. ही योजना मंजूर झाल्यावर रस्त्यांसाठी जागा पीएमआरडीएच्या ताब्यात मिळेल’, अशी अपेक्षा महानगर आयुक्त किरण गित्ते यांनी व्यक्त केली.
.................
‘रस्ते आणि इतर सुविधांसह स्थानिक जमीन मालकांसाठी टीपी स्कीम फायदेशीर ठरणार आहे. टीपी स्कीमनुसार आवश्यक जागा ताब्यात येण्यासाठी वर्षभराचा कालावधी लागेल.’
- किरण गित्ते, आयुक्त, पीएमआरडीए
मोबाइल अॅप डाउनलोड करा आणि राहा अपडेट
