भारतीय जनता पक्षाच्या नगरसेविका फरजाना आयुब शेख यांचा जातीचा दाखला अवैध ठरवण्याच्या जात पडताळणी समितीच्या आदेशाला हायकोर्टाने स्थगिती दिली असून फेर जातपडताळणी करण्याचे आदेश समितीला दिले आहेत.
शेख या फुलेनगर-नागपूर चाळ प्रभागातून इतर मागासवर्ग महिलेसाठी आरक्षित जागेवर निवडून गेल्या आहेत. त्यांच्या जात प्रमाणपत्राची पडताळणी झालेली नव्हती. या पडताळणीदरम्यान विभागीय जात पडताळणी समितीने त्यांचा जातीचा दाखला अवैध ठरवण्यात आला होता. शेख यांनी या निर्णयाविरोधात हायकोर्टात धाव घेतली होती. कोर्टाने यावर निर्णय देताना शेख यांच्यावतीने करण्यात आलेला दावा सकृतदर्शनी ग्राह्य धरण्यात आला आणि जात पडताळणी समितीच्या निर्णयाला स्थगिती देण्यात आली. कोर्टाने ही स्थगिती देतानाच शेख यांच्या जातपडताळणी अर्जाची फेरतपासणी करण्यात आदेश दिले आहेत.
शेख यांच्याविरोधात निवडणूक लढवलेल्या भगवान जाधव आणि अर्चना कुचेकर यांनी त्यांच्या जातीच्या दाखल्यावर आक्षेप घेतला होता. तसेच, याबाबत विभागीय जात पडताळणी समितीकडे तक्रार केली होती. समितीने जातीच्या पडताळणीसाठी १९६७पूर्वीचे पुरावे मागितले होते. मात्र, मुस्लिम धर्मियांची जात पडताळणीसाठी यापूर्वी कोर्टाने काही निकाल दिले असून त्यात ही अट शिथिल करण्यात आली आहे. तरीही शेख यांनी त्यांच्या आई-वडिलांच्या लग्नातील निकाहनामा पुरावा म्हणून सादर केला आहे. हा निकाहनामा १९६१सालचा असून त्यामध्ये त्यांच्या वडिलांचा व्यवसाय हा शिंपी (दर्जी) असल्याचा उल्लेख आहे. या आधारे कोर्टाने स्थगिती दिली असल्याचा दावा उपमहापौर सिद्धार्थ धेंडे यांनी केला.
मोबाइल अॅप डाउनलोड करा आणि राहा अपडेट