केंद्रीय मंत्री रूडी यांचे क्रेडाईला आवाहन
म. टा. प्रतिनिधी, पुणे
‘भारतात खेडोपाड्यांत असंख्य गरीब व्यक्ती शिक्षणापासून, कौशल्यांपासून वंचित आहेत. क्रेडाईने तिथपर्यंत पोहोचून त्यांना कौशल्य प्रशिक्षण देऊन देशभरात कुशल कामगारांचे जाळे निर्माण करावे,’ अशी सूचना केंद्रीय कौशल्यविकास राज्यमंत्री राजीव प्रताप रूडी यांनी केली. तसेच, ‘त्यासाठी अनुदानाची मागणी न करता अल्पदराचे कर्ज घेऊन हे काम करणे आवश्यक आहे,’ अशी पुस्तीही त्यांनी जोडली.
‘कॉन्फिडरेशन ऑफ रिअल इस्टेट डेव्हलपर्स असोसिएशन ऑफ इंडिया’ अर्थात क्रेडाई पुणे मेट्रो आणि ‘कुशल’ यांच्या वतीने आयोजित कुशलता दिवस कार्यक्रमात ते बोलत होते. राज्याचे कामगार आणि कौशल्य विकास मंत्री संभाजी पाटील निलंगेकर, क्रेडाई कुशलचे अध्यक्ष जे. पी. श्रॉफ, क्रेडाईचे नियोजित राष्ट्रीय अध्यक्ष सतीश मगर, आशियाना हाउसिंगचे अध्यक्ष विशाल गुप्ता, क्रेडाई महाराष्ट्रचे अध्यक्ष शांतीलाल कटारिया, क्रेडाई पुणे मेट्रोचे सचिव रणजित नाईकनवरे, क्रेडाई युथ विंगचे समन्वयक आदित्य जावडेकर, जितेंद्र ठक्कर आदी उपस्थित होते.
‘क्रेडाई बांधकाम कामगारांना कौशल्याचे प्रशिक्षण देण्यात आघाडीवर आहे. मात्र, त्यांनी पुण्यातल्याच कामगारांना हे प्रशिक्षण देण्यापेक्षा खेडोपाडी जाऊन तिथल्या वंचित, गरीब घटकांना दोन-तीन आठवड्यांचे प्रशिक्षण द्यावे. त्यातून ते स्वतःच्या पायावर उभे राहतील,’ असे रूडी म्हणाले. ‘क्रेडाईला यापूर्वी वीस कोटी रुपयांचे अनुदान देण्यात आले होते. मात्र, अनुदान मागण्याची सवय चुकीची असून आता नव्याने अनुदान मागण्यापेक्षा तीन टक्के व्याजाने कर्ज घेऊन हे प्रशिक्षण द्यावे. त्यासाठी क्रेडाईच्या महिला विभागाने पुढाकार घ्यावा,’ अशी सूचनाही रूडी यांनी केली. जे. पी. श्रॉफ व सतीश मगर यांनीही मनोगत व्यक्त केले.
‘बांधकाम कामगार इतरांचे घराचे स्वप्न साकारतात. मात्र, त्यांचे स्वतःचे घर व्हावे, यासाठी राज्याने पुढाकार घेतला आहे. क्रेडाईच्या माध्यमातून सर्व कामगारांना प्रशिक्षण देण्यावरही सरकारचा भर असेल,’ असे निलंगेकर म्हणाले.
राज्यातील दहा प्रमुख शहरांमध्ये ‘कुशल’ अंतर्गत कामगारांना प्रशिक्षण देण्यासंदर्भात या वेळी करार करण्यात आला. त्यापैकी एक हजार कामगारांना विलास जावडेकर डेव्हलपर्सतर्फे प्रशिक्षण दिले जाईल. तसेच महिला बांधकाम कामगारांना योग्य प्रशिक्षण देण्यासंदर्भातील एक प्रस्ताव दर्शना परमार जैन यांनी रूडी यांनी सादर केला. आंतरराष्ट्रीय पातळीवरील जागतिक कौशल्य स्पर्धेत भारताचे प्रतिनिधित्व करणाऱ्या रोहिम मोमीन आणि शैलेंद्र चौहान यांचा सत्कार रूडींच्या हस्ते झाला.
लालूंचा घोटाळा दहा हजार कोटींचा
‘लालूप्रसाद यादव पूर्वीच चारा घोटाळ्यात अडकले आहेत. आता त्यांनी रेल्वेमंत्रिपदाच्या काळात केलेल्या भ्रष्टाचाराची प्रकरणेही पुढे येत आहेत. त्याची पाळेमुळे खणून काढली जातील. सक्तवसुली संचालनालय, केंद्रीय अन्वेषण विभाग, प्राप्तिकर विभाग आणि कायदा आपले काम करेल. बिहारमध्ये आता नितीशकुमार लालूंच्या दबावातून मुक्त झाले आहेत. भाजप व जेडीयूच्या युतीमुळे बिहार मोठ्या परिवर्तनाच्या दिशेने वाटचाल करत असून बिहारमध्ये आता स्वच्छ राजकारणाचे पर्व पाहायला मिळेल,’ असे मूळचे बिहारचे असलेले राजीव प्रताप रूडी म्हणाले.
मोबाइल अॅप डाउनलोड करा आणि राहा अपडेट
