दोन कोटी ९० लाखाच्या जुन्या नोटा बदलून नवीन करण्यासाठी गेलेल्या पुण्यातील दोन बांधकाम व्यावसायिकासह तिघांना पुणे ग्रामीण पोलिसांनी ताब्यात घेतले आहे. ही कारवाई मुबंई-पुणे महामार्गावर उर्से टोल नाक्यावर शुक्रवारी रात्री साडेनऊच्या सुमारास करण्यात आली.
बांधकाम व्यवसायिक नविंदू घनश्याम गोयल (वय ४३, रा. पिपले गुरव), दिलीप सत्यनारायण गुप्ता (वय, ४९, रा. पुणे) आणि मर्सिडीज कार
चालक गौरव भगवानदास आगरवाल (वय ३३, रा. खराळवाडी, पिंपरी) यांना चौकशीसाठी ताब्यात घेतले आहे.
उपअधीक्षक जी.एस. माडगूळकर यांनी दिलेल्या माहितीनुसार, मुंबई येथे जुन्या नोटा बदलण्यासाठी हे तिघे गेले होते. मात्र, ते शक्य झाले नाही. दरम्यान, मुबंईहुन पुण्याला येत असताना याबाबतची माहिती पुणे ग्रामीण पोलिसांच्या राज्य दहशतवाद विरोधी पथक व अधीक्षकांचे पथक यांना मिळाली. त्यावरून ही माहिती लोणावळा ग्रामीण पोलिसांना कळविण्यात आली. परंतु, तोपर्यंत मर्सिडीज लोणावळ्यावरून पुढे निघाली होती. म्हणून तेथील पोलिसांनी मर्सिडीज (एमएच 14, सीके 400) चा पाठलाग सुरू केला. तर पुणे एसपी ऑफिसमधील पथक उर्से येथे सापळा रचून थांबले होते.
लोणावळ्याचे निरीक्षक चंद्रकांत जाधव, एसपी स्कॉडचे सहाय्यक निरीक्षक अर्जुन मोहिते, ग्रामीण एटीएसचे घोगुरकर व पथकाने ही कामगिरी केली. आयकर विभागाला याची माहिती देण्यात आली असून, तळेगाव पोलिस ठाण्यात नोटा मोजण्याचे काम सुरू आहे.
मोबाइल अॅप डाउनलोड करा आणि राहा अपडेट
