म. टा. प्रतिनिधी, पुणे
शहरांमध्ये घरफोड्या करणाऱ्या चोरांचा सुळसुळाट दिवसेंदिवस वाढतच चालला आहे. बिबवेवाडीतील एकाच सोसायटीमधील चार फ्लॅट फोडल्याचा प्रकार बुधवारी सकाळी समोर आला. एका फ्लॅटमधून चोरांनी सोन्याचे दागिने लंपास केले आहेत. इतर फ्लॅटमध्ये चोरी करण्याचा प्रयत्न केला आहे. तसेच, शहरात कर्वेनगर, शिवाजीनगर व येरवडा परिसरात चार घरफोड्या झाल्याचे समोर आले आहे. घरफोड्यांचे प्रमाण वाढत असताना पोलिसांच्या कार्यक्षमतेवर प्रश्नचिन्ह निर्माण झाले आहे.
याबाबत सागर मुकुंद एकबोटे (वय २८, रा. पुखराज सोसायटी, बिबवेवाडी) यांनी तक्रार दिली आहे. त्यानुसार बिबवेवाडी पोलिस ठाण्यात अज्ञातावर गुन्हा दाखल करण्यात आला आहे. पोलिसांनी दिलेल्या माहितीनुसार, सागर एकबोटे यांचे बिबवेवाडी परिसरातील चिंतामणी भाग तीनमधील पुखराज सोसायटीमध्ये फ्लॅट आहे. काही दिवसांपूर्वीच ते या ठिकाणी राहण्यास आले आहेत. ते एका खासगी कंपनीत नोकरी करतात. दरम्यान, त्यांच्या शेजारी तीन फ्लॅट बंद असून त्यामध्ये कुणीही राहत नाही. मंगळवारी रात्री ते फ्लॅटला कुलूप लावून त्यांच्या नातेवाइकांकडे कुटुंबासह गेले होते. त्या वेळी अज्ञात चोरांनी घराचे कुलूप तोडून आत प्रवेश केला. कपाटामध्ये असणारे पाच तोळे सोन्याचे दागिने लंपास केले. त्यानंतर त्यांच्या शेजारी बंद असणारे तीन फ्लॅटही चोरांनी फोडले आहेत. मात्र, त्यामध्ये कोणीही राहत नसल्याने त्यांना काहीच मिळाले नाही. एकबोटे हे बुधवारी सकाळी अकराच्या सुमारास परत आले. त्या वेळी त्यांना चोरी झाल्याचे लक्षात आले. त्यांनी तत्काळ पोलिसांना माहिती दिली. बिबवेवाडी पोलिस ठाण्याचे वरिष्ठ निरीक्षक बाळासाहेब कोपनार व कर्मचाऱ्यांनी घटनास्थळी धाव घेऊन पाहणी केली. या सोसायटीत सीसीटीव्ही असून त्याची वायर चोरांनी अगोदरच तोडल्याचे आढळून आले आहे.
कर्वेनगरमधील ‘स्वानंद बंगला’ येथील फ्लॅट भरदिवसा चोरांनी फोडला आहे. या ठिकाणाहून ७० हजार रुपयांचे तीन लॅपटॉप चोरून नेल्याचे समोर आले आहे. या प्रकरणी मयूर देवगुने (वय २६) यांनी तक्रार दिली आहे. तर, काकडे सिटीमधील सॅम्पल फ्लॅटमध्ये असणाऱ्या थिएटरचे प्रोजेक्टर चोरांनी खिडकीचे काच फोडून चोरून नेल्याचा प्रकार समोर आला. या प्रकरणी आरती दरेकर (वय २२) यांनी तक्रार दिली आहे. तसेच, शिवाजीनगर येथील झेनिथ कॉम्प्लेक्समध्ये चोरांनी फ्लॅट फोडून १० हजार रुपयांची मुद्देमाल चोरून नेला आहे. या प्रकरणी शिवाजीनगर पोलिस ठाण्यात संदीप रासकर (वय ४२) यांनी तक्रार दिली आहे. तर, येरवडा परिसरातील क्लासिक बेकर्स या दुकानाचे लोखंडी शटर उचकटून १२ हजार रुपयांचा माल लंपास करण्यात आहे. या प्रकरणी अबरार अहमद अन्सारी (वय ४५) यांनी तक्रार दिली आहे.
सीसीटीव्हीच्या वायर तोडण्याची चोरण्याची शक्कल
घरफोड्या रोखण्यासाठी सोसायटीमध्ये सीसीटीव्ही बसवा आणि सुरक्षारक्षक नेमा, अशा सूचना पोलिस करीत आहेत. मात्र, दुसरीकडे चोरटे थेट सीसीटीव्ही बंद करून, त्याचा डीव्हीआर चोरून सुरक्षारक्षकासमोरून घरफोड्या करत असल्याचे चित्र पुण्यात दिसत आहे. या चोरांना पकडण्यात व गस्त घालण्यात पोलिस अपयशी ठरत असल्याची चर्चा नागिरकांमध्ये सुरू झाली आहे.
गेल्या काही दिवसांपासून शहरात घरफोड्यांचे प्रमाण वाढले आहे. दिवसाला तीन ते चार घरफोड्या सुरू आहेत. एखाद्या दिवशी हा आकडा सहा ते आठवरदेखील पोहोचला आहे. शहरात सोसयट्यांचे प्रमाण मोठ्या प्रमाणात आहे. त्यामुळे पोलिस ठाण्यांकडून सोसायट्यांच्या बैठका घेऊन त्यांना सीसीटीव्ही व सुरक्षारक्षक नेमण्याच्या सूचना केल्या जात आहेत. या सूचनांचे पालन करून काही सोसायट्यांनी सीसीटीव्ही बसविले, सुरक्षारक्षक नेमले. पण, चोरटे सीसीटीव्हीचा डीव्हीआर चोरून, सीसीटीव्हीची वायर तोडून घरफोड्या करीत असल्याचे दिसून येत आहे. तर, गेल्या काही दिवसांत घडलेल्या घरफोड्यांमध्ये सोसायटीला सुरक्षारक्षक असतानादेखील त्याचा काहीही फायदा झालेला नाही. या सुरक्षारक्षकांसमोरून चोर पसार झाले आहेत. सोसायटीत सुरक्षारक्षक नाहीत, सीसीटीव्ही बसविलेले नसल्याचे कारण देऊन पोलिस सोसायट्यांना दोषी धरतात. पण, सीसीटीव्ही हे घरफोडीनंतर चोरांना शोधण्यासाठी उपयोगी ठरणार आहेत.
शहरात पोलिसांची रात्रीची गस्त पुरेसी नसल्यामुळेच घरफोड्या व लूटमारीचे प्रमाण वाढत चालले आहे. रात्रीची गस्त व्यवस्थित घातली गेली, तर या घटनांना आपोआप थोडासा अंकुश लागेल. शहरात विविध चौकांत सीसीटीव्ही कॅमेरे बसविण्यात आलेले आहेत. त्याचा या आरोपींना पकडण्यासाठी उपयोग किती होतो, हादेखील प्रश्न विचारला जात आहे. सर्वसामान्य नागरिकांच्या बचतीवर चोर डल्ला मारू लागल्यामुळे नागरिक चिंतेमध्ये आहेत. या घरफोड्या करणाऱ्यांचा लवकरात लवकर बंदोबस्त करण्याची मागणी नागरिकांकडून होत आहे.
मोबाइल अॅप डाउनलोड करा आणि राहा अपडेट
