शहर आणि जिल्हा परिसरात सुरू असलेल्या संततधारेमुळे जिल्ह्याला पाणीपुरवठा करणाऱ्या धरणांमध्ये सुमारे १४.७५ टीएमसी पाणीसाठा झाला आहे. जिल्ह्यातील प्रमुख धरणे निम्मी भरल्याने नागरिकांना दिलासा मिळाला आहे.
गेल्या काही दिवसांतील पावसामुळे वरसगाव धरण ४१.८८ टक्के, पानशेत ६७.३८ टक्के, खडकवासला ६२.९२ टक्के आणि टेमघर २५.५६ टक्के भरले आहे. टेमघर धरणात पाणी साठविण्यात येत नसले, तरी धरण क्षेत्रात पाणीसाठा झाला आहे. गेल्या वर्षी याच काळात धरणांमध्ये सुमारे १५.५२ टीएमसी पाणीसाठा होता. यंदा सुरुवातीला पावसाचे प्रमाण कमी होते. मात्र, गेल्या चार ते पाच दिवसांपासून पावसाने जोर धरल्यामुळे धरणांच्या पातळीत समाधानकारक वाढ झाली आहे. पानशेत, वरसगाव, खडकवासला आणि टेमघर या धरणांमधील पाणीसाठा सुमारे १४.७५ टीएमसीवर पोहोचला आहे. वरसगाव धरणाच्या परिसरात दिवसभरात सुमारे ३८ मिलिमीटर पाऊस पडला. त्यामुळे पाणीसाठा ५.३७ टीएमसीवर गेला आहे. पानशेत धरणाच्या क्षेत्रात सुमारे ३६ मिलिमीटर पाऊस झाल्यामुळे पाणीसाठा ७.१८ टीएमसीवर गेला आहे. खडकवासलाच्या क्षेत्रात तुलनेने कमी पाऊस झाला आहे. दिवसभरामध्ये १४ मिलिमीटर पाऊस झाल्याने धरणातील पाणीसाठा १.२४ टीएमसीवर गेल्याचे जलसंपदा विभागाकडून सांगण्यात आले. सध्या टेमघर धरणाचे काम सुरू असल्याने धरणात पाणी साठविण्यात येत नाही. तरीही, या धरणात ०.९६ टीएमसी पाणीसाठा झाला आहे.
पिंपरी चिंचवड परिसराला पाणीपुरवठा करणाऱ्या पवना धरणाच्या परिसरात दिवसभरात सुमारे ३० मिलिमीटर पावसाची नोंद झाली. त्यामुळे पाणीसाठा ५.९३ टीएमसीवर पोहोचला आहे.
धरण आणि पाणीसाठा (टीएमसीत)
खडकवासला १.२४
पानशेत ७.१८
पवना ५.९३
भामा आसखेड ५.०३
चासकमान ६.२८
माणिकडोह ३.६८
डिंभे ७.२३
मुळशी ११.१३
वरसगाव ५.३७
टेमघर ०.९६
भाटघर १०.२८
वीर ३.४९
नीरा देवघर ५.४६
उजनी १.९९ (उणे)
मोबाइल अॅप डाउनलोड करा आणि राहा अपडेट
