मिया मल्हार, रागेश्री, बिलासखानी तोडी अशा रागांमधील बंदिशी सादर करून एसएनडीटी महाविद्यालयाच्या माजी विद्यार्थिनींनी ज्येष्ठ गायिका विदुषी वीणा सहस्रबुद्धे यांना आदरांजली वाहिली. प्रयोगशील वीणा हा कार्यक्रम सादर करून त्यांनी वीणाताईंच्या आठवणींना उजाळा दिला.
वीणा सहस्रबुद्धे यांच्या प्रथम स्मृतिदिनानिमित्त श्रीमती नाथीबाई दामोदर ठाकरसी महाविद्यालयाच्या माजी विद्यार्थिनींतर्फे कार्यक्रमाचे आयोजन करण्यात आले होते. कार्यक्रमाच्या सुरुवातीला ‘वीणावादिनी वरदे’ हे प्रार्थनागीत सादर करण्यात आले. या गीतातून वीणाताईंना आदरांजली अर्पण केली. त्यानंतर गायिका अंजली मालकर यानी राग रागेश्रीतील तराणा; तसेच शुद्धसारंग रागातील ‘आओ रे आओ कारे बदरा’ ही बंदिश सादर केली. आरती पाठक यांनी ‘हमें ना सिखाओ’ ही बिलासखानी तोडीतील बंदिश व ‘सिद्ध भजो’ हे निर्गुणी भजन सादर केले. या दोन्ही सादरीकरणाला उपस्थितांनी भरभरून दाद दिली. डॉ. राजश्री महाजनी यांनी राग मिया मल्हारमधील ‘गहर आयो रे बादरवा’ ही बंदिश सादर केली.
सर्व गायिकांनी एकत्र राग हंसध्वनीतील ‘विहरती ब्रह्मनंदिनी'’ ही बंदिश सादर केली आणि या संगीत मैफलीचा कळस गाठला. अंजली आपटे यांनी वीणाताईंवर केलेल्या स्वरचित कवितेचे गायन केले. अरूण गवई यांनी (तबला) अमृता माळी (हार्मोनियम) या कलाकारांनी सुरेल साथसंगत केली.
‘महाविद्यालयात अध्यापन करताना अनेकदा अपरिहार्यतेमुळे शिकवावे लागणारे संगीत प्रकारही वीणाताईं मन लावून शिकवत असत. कोणत्याही सामान्य शब्दरचना असलेल्या काव्याला उत्तम चाल देऊन ते काव्य उंचीवर कसे जाईल, असा त्यांचा प्रयत्न होता,’ अशा शब्दांमध्ये संगीत विभागातील प्राध्यापिका डॉ. पौर्णिमा धुमाळे यांनी वीणाताईंची कार्यशैली उलगडली. कार्यक्रमात वीणाताईंच्या काही ध्वनिचित्रफितीही दाखवण्यात आल्या. सीड इन्फोटेकच्या संचालिका भारती बऱ्हाटे तसेच डॉ. रेखा इनामदार साने, भारतीय विद्याभवनचे मानद सचिव नंदकुमार काकीर्डे, माजी संगीत विभाग प्रमुख लता गोडसे, गायिका अपर्णा गुरव, किशोरी जानोरीकर, रंजना काळे आदी या वेळी उपस्थित होते.
मोबाइल अॅप डाउनलोड करा आणि राहा अपडेट
